ଚଣ୍ଡିଗଡ଼, ୩/୮ :  ଜିଲ୍ଲା କୋର୍ଟରେ ଆଜି ଗୁଳି ଚାଳନା ଘଟଣା ସାମ୍ନାକୁ ଆସିଛି । ମିଳିଥିବା ସୂଚନା ଅନୁସାରେ ପଞ୍ଜାବ ପୋଲିସର ପୂର୍ବତନ ଏଆଇଜି ନିଜ ଜ୍ବାଇଁଙ୍କୁ ଗୁଳି ମାରି ହତ୍ୟା କରିଛନ୍ତି । କୁହାଯାଉଛି କି ଉଭୟ ପରିବାର ମଧ୍ୟରେ ଘରୋଇ ବିବାଦ ଚାଲୁଥିଲା । ଏହି ମାମଲାରେ ଦୁଇ ପକ୍ଷ ଶନିବାର ଚଣ୍ଡିଗଡ଼ ଫ୍ୟାମିଲି କୋର୍ଟରେ ପହଞ୍ଚିଥିଲେ । ଅଭିଯୁକ୍ତଙ୍କ ପରିଚୟ ପୂର୍ବତନ ଏଆଇଜି ମଲାବିନ୍ଦର ସିଂହ ସିଦ୍ଧୁ ଭାବେ ହୋଇଛି । ମୃତ ଜ୍ବାଇଁ କୃଷି ବିଭାଗରେ ଆଇଆରଏସ ଥିଲେ । 

ଉଭୟ ପକ୍ଷଙ୍କ ମଧ୍ୟରେ କଥାବାର୍ତ୍ତା ଚାଲୁ ରହିଥିବାବେଳେ ଅଭିଯୁକ୍ତ ଜଣଙ୍କ ବାଥରୁମ୍ ଯିବାକୁ କହିଥିଲେ । ଏହା ପରେ ତାଙ୍କ ଜ୍ବାଇଁ କହିଥିଲେ କି ମୁଁ ରାସ୍ତା କହୁଛି । ଉଭୟ କୋଠରୀ ଭିତରୁ ବାହାରକୁ ଚାଲିଯାଇଥିଲେ । ଏହି ସମୟରେ ଅଭିଯୁକ୍ତ ନିଜ ବନ୍ଧୁକରୁ ୫ଫାଇରିଂ କରିଥିଲେ । ଏହା ମଧ୍ୟରୁ ଦୁଇଟି ଗୁଳି ଯୁବକଙ୍କୁ ଲାଗିଥିଲା । ସେହିଭଳି ଗୋଟିଏ ଗୁଳି ଭିତରେ କୋଠରୀର କବାଟ ପାଖରେ ଲାଗିଥିଲା । ଦୁଇଟି ଫାଇରିଂ ଖାଲି ଚାଲିଥିଲା । ଗୁଳିର ଶଦ୍ଦ ଶୁଣିବା ମାତ୍ରକେ କୋର୍ଟରେ ଆତଙ୍କ ଖେଳିଯାଇଥିଲା ।

ଘଟଣାସ୍ଥଳରେ ପହଞ୍ଚିଥିବା ଓକିଲ ଅଭିଯୁକ୍ତକୁ ଧରି ଗୋଟିଏ କୋଠରୀରେ ବନ୍ଦ କରି ଦେଇଥିଲେ ଏବଂ ପୋଲିସକୁ ସୂଚନା ଦେଇଥିଲେ । ଏହାପରେ ଆହତଙ୍କୁ ସେକ୍ଟର ୧୬ ହସ୍ପିଟାଲକୁ ନେଇଯାଇଥିଲେ କିନ୍ତୁ ରାସ୍ତାରେ ହିଁ ସେ ଶେଷ ନିଶ୍ବାସ ତ୍ୟାଗ କରିଥିଲେ । ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚିଥିଲା ଏବଂ କୋଠରୀରେ ବନ୍ଦ ଅଭିଯୁକ୍ତକୁ ନିଜ ହେପାଜତକୁ ନେଇଥିଲା ଏବଂ ଥାନାକୁ ନେଇଯାଇଥିଲା । ଘଟଣା ପରେ କିଛି ଜଜ୍ ବି ଘଟଣାସ୍ଥଳରେ ପହଞ୍ଚିଥିଲେ । ପୋଲିସ ମାମଲାର ଯାଞ୍ଚ କରୁଛି ।