ପୁରୀ, ୧୨/୦୮: ଶ୍ରୀକ୍ଷେତ୍ରରେ ଝୁଲଣ ମହୋତ୍ସବର ଶୁଭାରମ୍ଭକୁ ମଝିରେ ରହିଲା ମାତ୍ର ଗୋଟିଏ ଦିନ । ଆସନ୍ତା ୧୪ ତାରିଖ ବୁଧବାରଠାରୁ ଆରମ୍ଭ ହେବ ଠାକୁରଙ୍କ ସପ୍ତ ଦିବସୀୟ ବର୍ଷାକାଳୀନ ରାହାସ ଉତ୍ସବ । ମହୋତ୍ସବର ପ୍ରସ୍ତୁତି ପାଇଁ ଶ୍ରୀମନ୍ଦିର ଓ ମଠ ଏବେ ଚଳଚଞ୍ଚଳ । କୁଞ୍ଜକାନନର ପଶୁପକ୍ଷୀଙ୍କ କଳରବ ମଧ୍ୟରେ ଠାକୁରେ  ଝୁଲୁଥିବେ । ଶ୍ରୀମଦନମୋହନଙ୍କ ଲକ୍ଷ୍ମୀ ଓ ସରସ୍ୱତୀ ଶ୍ରୀମନ୍ଦିର ଝୁଲଣ କୁଞ୍ଜରେ ଝୁଲିବେ। ବୃନ୍ଦାବନରେ ଶ୍ରୀକୃଷ୍ଣଙ୍କ ଲୀଳାକୁ ମନେ ପକାଇ  ଶ୍ରୀକ୍ଷେତ୍ର ମଠ ମନ୍ଦିରରେ ମଧ୍ୟ  ସୁସଜ୍ଜିତ ଝୁଲଣ କୁଞ୍ଜରେ ବିଜେ ହେବେ ଦେବଦେବୀ । ହଜାର ହଜାର ଶ୍ରଦ୍ଧାଳୁ ଶ୍ରୀମନ୍ଦିର ସମେତ ମଠ ମନ୍ଦିର ବୁଲି ଠାକୁରଙ୍କ ଏହି ରାହାସ ଉତ୍ସବର ଆନନ୍ଦ ନେବେ । 

ଝୁଲଣ ଯାତ୍ରା ପାଇଁ ଶ୍ରୀମନ୍ଦିର ସମେତ ମଠବାଡ଼ିରେ  ପ୍ରସ୍ତୁତି ଚାଲିଛି । ଏହି ଅବସରରେ ବଡ଼ଦେଉଳରେ  ଅନୁଷ୍ଠିତ ହେବ ସ୍ୱତନ୍ତ୍ର ନୀତି । ମହାପ୍ରଭୁଙ୍କ ମଧ୍ୟାହ୍ନ  ଧୂପ ପରେ ତିନି ବାଡ଼ରେ ସର୍ବାଙ୍ଗ ଲାଗି ଓ ବେଶ  ହେବ । ମହାଜନମାନେ ସିଂହାସନରୁ ଲକ୍ଷ୍ମୀ ସରସ୍ୱତୀଙ୍କୁ  ଓ ଦକ୍ଷିଣଘରୁ ମଦନମୋହନଙ୍କୁ ଆଣି ଖଟ ଶେଯରେ  ବିଜେ କରାଇବେ । ପୂଜାପଣ୍ଡା ସାମନ୍ତ ମାଣ୍ଡୁଅ ଭୋଗ  ଅର୍ପଣ କରିବେ । ତିନି ବାଡ଼ରେ ଆଳତି ହେବ ।  ଏହାପରେ ତିନି ମୂର୍ତ୍ତିଙ୍କୁ ଝୁଲଣମଣ୍ଡପ ଦୋଳିକୁ  ଅଣାଯିବ । ବେହେରଣ ଦ୍ୱାର ସମ୍ମୁଖ ମୁକ୍ତି ମଣ୍ଡପରେ  ଝୁଲଣ ମଣ୍ଡପ ପ୍ରସ୍ତୁତ ହେଉଛି । କାରିଗରମାନେ ଝୁଲଣ  କୁଞ୍ଜ ସଜାରେ ଲାଗିଛନ୍ତି । ୭ଦିନ ବ୍ୟାପି ଚାଲିବ ଯାତ୍ରା ।  

ସେହିଭଳି ବିଭିନ୍ନ ମଠ ବାଡ଼ି ସମେତ ବ୍ୟକ୍ତିଗତ  ଘରମାନଙ୍କରେ ମଧ୍ୟ ଚାଲିଛି ଝୁଲଣ ସଜବାଜ । ପାରମ୍ପରିକ କାରିଗରୀର ଶ୍ରେଷ୍ଠ ନିଦ୍‌ର୍ଶନ ଝୁଲଣ  ଯାତ୍ରାର ରୂପରେଖ । ଜରିଜମ୍ଭୁରା  ସାଜରେ ଝଲସିବ କୁଞ୍ଜ । କୁଞ୍ଜରେ ଶୁଆଶାରୀ, ବଣିପାରା, ଗୁଣ୍ଡିଚି  ମୂଷା, ଗାଈ, ମାଙ୍କଡ଼ ଆଦି ମୂର୍ତ୍ତି  ଖଞ୍ଜା ଯାଉଛି । ଜୀବଜନ୍ତୁଙ୍କ ଛାଞ୍ଚରେ ସୋଲପଟିରେ  କାଗଜ ଗୁଡ଼ାଯାଇ ରଂଗ ଦିଆଯାଏ । କାରିଗରମାନେ  ମଠରେ ଥିବା ସାଜକୁ ସଜାଡ଼ି କୁଞ୍ଜ ନିର୍ମାଣରେ  ଲାଗିଛନ୍ତି । ଶ୍ରୀକ୍ଷେତ୍ରରେ ଏଭଳି ସୁକ୍ଷ୍ମ କାରିଗରୀର  ସ୍ୱତନ୍ତ୍ରତା ରହିଛି । ଦ୍ୱାପର ଯୁଗ ଆଧାରିତ ଶ୍ରୀକୃଷ୍ଣ  ଲୀଳା ଓ ପ୍ରକୃତିର ରଙ୍ଗରୂପକୁ ନେଇ କୁଞ୍ଜ ପ୍ରସ୍ତୁତ  ହେଉଛି । ଜଗନ୍ନାଥ ବଲ୍ଲଭ ମଠ, ରାଧାବଲ୍ଲଭ ମଠ,  ବଡ଼ ଓଡ଼ିଆ ମଠ, ଜିୟରସ୍ୱାମୀ ମଠ ସମେତ ପୁରୀର  ବହୁ ମଠ ଓ ମନ୍ଦିରରେ ଝୁଲଣଯାତ୍ରା ପାଳନ ହେବ ।