ନୂଆଦିଲ୍ଲୀ: ଗତ ତିନି ସପ୍ତାହ ଧରି ଇସ୍ରାଏଲ ଏବଂ ହାମାସ ମଧ୍ୟରେ ଯୁଦ୍ଧ ଚାଲିଛି । ହମାସ କବଳରୁ ନିଜ ବନ୍ଧକକୁ ଛଡାଇବା ପାଇଁ ଗାଜାରେ ଆକ୍ରମଣକୁ ଜୋରଦାର କରିଛି । ଆଉ ଏହି ସମୟରେ ସିଙ୍ଗାପୁର ସରକାର ଦେଶରେ ରହୁଥିବା ବିଦେଶୀମାନଙ୍କ ପାଇଁ ଚେତାବନୀ ଜାରି କରିଛନ୍ତି । ସିଙ୍ଗାପୁରର ଜନଶକ୍ତି ମନ୍ତ୍ରଣାଳୟ କହିଛି ଯେ, ଦେଶରେ ରହୁଥିବା ତଥା କାର୍ଯ୍ୟ କରୁଥିବା ବିଦେଶୀମାନେ ନିଜର ରାଜନୈତିକ ଉଦ୍ଦେଶ୍ୟକୁ ଆଗକୁ ବଢାଇବା ପାଇଁ ଏହାକୁ ଏକ ପ୍ଲାଟଫର୍ମ ଭାବରେ ବ୍ୟବହାର କରିବା ଉଚିତ୍ ନୁହେଁ ।

ଜନଶକ୍ତି ମନ୍ତ୍ରଣାଳୟ (MOM) ଏକ ଫେସବୁକ୍ ପୋଷ୍ଟ ମାଧ୍ୟମରେ ଏହି ଚେତାବନୀ ଜାରି କରିଛି। ଏଥିରେ ମନ୍ତ୍ରଣାଳୟ ଲେଖିଛି ଯେ, 'ଇସ୍ରାଏଲ ଏବଂ ହମାସ୍ ମଧ୍ୟରେ ବଢୁଥିବା ତିକ୍ତତାକୁ ଦୃଷ୍ଟିରେ ରଖି ଆମେ ଶାନ୍ତ ରହିବା ଜରୁରୀ । ଏହି ବାହ୍ୟ ଘଟଣା ଗୁଡ଼ିକୁ ନେଇ ସିଙ୍ଗାପୁରରେ ଜାତିଗତ ଏବଂ ଧାର୍ମିକ ସମନ୍ୱୟ ଏବଂ ଶାନ୍ତି ଉପରେ ପ୍ରଭାବ ପକାଇବାକୁ ଦିଅନ୍ତୁ ନାହିଁ । 

 ସିଙ୍ଗାପୁରର ବିଦେଶୀମାନଙ୍କୁ ମଧ୍ୟ ବ୍ୟାନର, ପତାକା ଏବଂ ପୋଷ୍ଟର ଭଳି ସାମଗ୍ରୀର ବ୍ୟବହାର କରି ସର୍ବସାଧାରଣ ପ୍ରଦର୍ଶନ ସହିତ କୌଣସି ପ୍ରକାରେ ବିଦେଶୀ ରାଜନୀତିକୁ ସମର୍ଥନ ନକରିବାକୁ କୁହାଯାଇଛି । ସେମାନଙ୍କୁ ବ୍ୟକ୍ତିଗତ କିମ୍ବା ସାମାଜିକ ଗଣମାଧ୍ୟମରେ କୌଣସି ପୋଷ୍ଟ କିମ୍ବା ବିବୃତ୍ତି ନଦେବାକୁ କୁହାଯାଇଛି । ଏହା କରିବା ଏକ ଅପରାଧ ଏବଂ ସିଙ୍ଗାପୁର ନିୟମ ଅନୁଯାୟୀ ଦଣ୍ଡନୀୟ। ଏହିପରି ଅପରାଧୀଙ୍କୁ ସିଙ୍ଗାପୁରରେ କାମ କରିବା ଉପରେ ପ୍ରତିବନ୍ଧକ ଲଗାଯାଇପାରେ।