ନୂଆଦିଲ୍ଲୀ,୧୧।୫:  ନିର୍ବାଚନୀ ସରଗରମ୍ ଭିତରେ ଚାଲିଛି ନେତାଙ୍କ ବୟାବାଜି। ଆରୋପ ପ୍ରତ୍ୟାରୋପ ଏବଂ ପ୍ରତିଦିନ ନୂଆ ନୂଆ କଥାର ହେଉଛି ଖୁଲାସା। ଏବେ  ପଶ୍ଚିମବଙ୍ଗ ରାଜ୍ୟପାଳ ଆନନ୍ଦ ବୋଷଙ୍କ ବିରୋଧରେ ଆସିଥିବା ଯୌନ ନିର୍ଯାତନ ଅଭିଯୋଗକୁ ପ୍ରସଙ୍ଗ କରି ଶନିବାର ବର୍ଷିଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ। ମମତା କହିଛନ୍ତି,ରାଜ୍ୟପାଳ ଭାବେ ଆନନ୍ଦ ବୋଷ କାର୍ଯ୍ୟ କରୁଥିବା ଯାଏ ସେ ରାଜଭବନ ଯିବେ ନାହିଁ। ଯଦି ରାଜ୍ୟପାଳ  ଚାହିଁବେ, ସେ ତାଙ୍କୁ ରାସ୍ତାରେ ଭେଟିବେ, କିନ୍ତୁ କେବେ ହେଲେ ରାଜଭବନ ଯିବେ ନାହିଁ। ଏହା ସହ ସେ କହିଛନ୍ତି ରାଜ୍ୟପାଳଙ୍କ ପାଖରେ ବସିବା ମଧ୍ୟ ପାପ।

ଉଲ୍ଲେଖନୀୟ ଯେ,  ରାଜଭବନର ଜଣେ ଅସ୍ଥାୟୀ କର୍ମଚାରୀ ରାଜ୍ୟପାଳଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗ ଆଣିଥିଲେ। ପୋଲିସ ନିକଟରେ ମହିଳା ଜଣକ ଅଭିଯୋଗ କରିବା ପରେ ଆସିଥିବା ସିସିଟିଭି ଫୁଟେଜ କଥା ମଧ୍ୟ ମମତା ଉଠାଇଛନ୍ତି। ରାଜ୍ୟପାଳ ଜାରି କରିଥିବା ସିସିଟିଭି ଫୁଟେଜ ଏଡିଟ କରାଯାଇଛି ଓ ସଂପୂର୍ଣ୍ଣ ଫୁଟେଜ ଓ ଏକାଧିକ ଭିଡିଓ ଥିବା ପେନ ଡ୍ରାଇଭ୍ସ ତାଙ୍କ ପାଖରେ ଅଛି ବୋଲି ମମତା କହିଛନ୍ତି।

ଶନିବାର ହୁଗୁଳିରେ ଏକ ରାଲିକୁ ସମ୍ବୋଧିତ କରି ମମତା ହିନ୍ଦୀ ଓ ବଙ୍ଗାଳୀ ମିଶା ଭାଷଣ ଦେଇ କହିଛନ୍ତି, ମାନନୀୟ ରାଜ୍ୟପାଳ, ମୋର ଭୁଲ କ’ଣ ? ମୋତେ ଏହା ବି ଜଣାନାହିଁ ପୁରା ଘଟଣା କ’ଣ ? ରାଜ୍ୟ ପାଳ କରିଥିଲେ ଦିଦିଗିରି ଚାଲିବନି ଓ ଏବେ ମୁଁ କହୁଛି ଦାଦାଗିରି ଓ ଦିଦିଗିରି ଚାଲିବନି, କିନ୍ତୁ ରାଜ୍ୟପାଳ ଆପଣ ଆଗ ନିଜର ପଦରୁ ଇସ୍ତଫା ଦିଅନ୍ତୁ। ଆପଣ କିଏ ଜଣେ ମହିଳାଙ୍କୁ ନିର୍ଯାତନା ଦେବାକୁ ? ମୋ ପାଖରେ ସିସିଟିଭି ଫୁଟେଜ୍‌ର ଆଉ ଏକ କପି ରହିଛି। ମୋତେ ଏହାକୁ ଜଣେ ସାମ୍ବାଦିକ ଭାଇ ଦେଇଛନ୍ତି। ଯୌନ ନିର୍ଯାତନାର ପୁରା  କଥା ଏବେ ବି ସାମନାକୁ ବସିନି। ମୋତେ ଆଉ ଏକ ଭିଡିଓ ମିଳିଛି। ଏହି ପେନ୍‌ଡ୍ରାଇଭରେ ଆହୁରି ଘଟଣା ଅଛି। ଯଦି ମୋତେ ରାଜଭବନ ଡକାଇବ ତେବେ ମୁଁ ଯିବିନ। ରାସ୍ତା ଉପରେ ଡାକିବେ ଯଦି ଯିବି, କିନ୍ତୁ ଏହି ଘଟଣା ବିଷୟରେ ଜାଣିବା ପରେ ଆପଣଙ୍କ ପାଖରେ ବସିବା ବି ପାପ ବୋଲି କହିଛନ୍ତି ମମତା।