ଭୁବନେଶ୍ୱର, ୩।୨: ଅଧିକାଂଶ ଲୋକ ଥଣ୍ଡାରୁ ରକ୍ଷା ପାଇବା ପାଇଁ କମ୍ୱଳ, ରେଜେଇ ଆଦି ବ୍ୟବହାର କରିଥାନ୍ତି । ଆଉ କେହି କେହି ଶରୀରକୁ ଗରମ ଅନୁଭବ ଦେବାକୁ ଭିନ୍ନ ଭିନ୍ନ ଉପାୟ ଆପଣାଇଥାନ୍ତି । ଏମିତି ବି ଅନେକ ଅଛନ୍ତି, ଯେଉଁମାନେ ହଟ୍ ୱାଟର ବ୍ୟାଗ୍କୁ ସାରା ରାତି ରେଜେଇ ଭିତରେ ରଖି ଶୋଇଥାନ୍ତି । ଏହି ଅଭ୍ୟାସ ଶରୀର ପାଇଁ ବିପଦଜନକ ବୋଲି ସ୍ୱାସ୍ଥ୍ୟ ବିଶେଷଜ୍ଞମାନେ ମତ ଦିଅନ୍ତି ।
ଯଦିଓ ଏହି ହଟ୍ ୱାଟର ବ୍ୟାଗ୍ ଯୋଗୁଁ ଲୋକେ ଗରମ ଅନୁଭବ କରନ୍ତି, କିନ୍ତୁ ଏହାକୁ ପାଖରେ ରଖି ଶୋଇବା ଆଦୌ ଠିକ୍ ନୁହେଁ । ଏହାକୁ ରାତିରେ ରଖି ଶୋଇବା ଦ୍ୱାରା କଡ଼ ଲେଉଟାଇବା ସମୟରେ ଏହା ଫାଟିଯିବାର ଆଶଙ୍କା ଥାଏ । କେବଳ ସେତିକି ନୁହେଁ, ଏଥିରେ ଥିବା ପାଣିରେ ଜଣେ ଜଳିଯାଇ, ଫୋଟକା ହେବା ଆଶଙ୍କା ମଧ୍ୟ ଥାଏ । ଏହାକୁ ପାଖରେ ରଖି ଶୋଇବା ଦ୍ୱାରା କୁଣ୍ଡାଇ ହେବା ଭଳି ସମସ୍ୟା ଦେଖାଦେଇପାରେ ।
ଏଥିସହ ଏହାକୁ ଏଠି ସେଠି ରଖାଯାଉଥିବାରୁ ଏଥିରେ ଅଧିକ ସଂଖ୍ୟାରେ ଜୀବାଣୁ ଥାନ୍ତି, ଯେଉଁଥିପାଇଁ ସଂକ୍ରମଣ ହେବାର ଆଶଙ୍କା ଥାଏ । ଏହାକୁ ପାଖରେ ରଖି ଶୋଇବା ଦ୍ୱାରା ଗରମ ଲାଗି ଅଧିକ ମାତ୍ରାରେ ଝାଳ ବୋହି ଅଣନିଶ୍ୱାସୀ ଲାଗିଥାଏ । ତେଣୁ ହଟ୍ ୱାଟରକୁ କମ୍ୱଳ କିମ୍ୱା ରେଜେଇ ଭିତରେ ରଖି ଶୋଇବା ଅନୁଚିତ୍ । ଏହାବାଦ୍ ହଟ୍ ୱାଟର ବ୍ୟାଗ୍କୁ ଜୀବାଣୁମୁକ୍ତ ରଖିବାକୁ ଏହାକୁ ନିୟମିତ ବ୍ୟବଧାନରେ ଧୋଇବା ଆବଶ୍ୟକ ।