ଭୁବନେଶ୍ୱର ୦୩/୦୬: ଓଡ଼ିଆ ଘରର ଜଳଖିଆ କହିଲେ ଚୁଡ଼ା କଦଳୀ ଚକଟା, ଛତୁଆ, ମୁଢି, ଚକୁଳି ଆଦିକୁ ବୁଝାଏ । ହେଲେ ଏବେ ସେହି ଜାଗା ନେଇଗଲାଣି ଦକ୍ଷିଣ ଭାରତୀୟ ଖାଦ୍ୟ । ଓଡ଼ିଆଙ୍କୁ ଆଉ ଚୁଡ଼ା କି ମୁଢ଼ି ରୁଚୁନି । ଟିଫିନ୍ ଦୋକାନକୁ ଯାଇ ଖୋଜାପଡ଼ୁଛି ଦୋସା ନ ହେଲେ ଇଡିଲି । ତା’ ସହ ଟିକେ ସମ୍ବର ଓ ନଡିଆ ବାଦାମ ଚଟଣି ହୋଇଗଲେ ଖାଇବାଟା ଜମିଗଲା ।
ଓଡ଼ିଆ ଘରର ଖାଦ୍ୟ ତାଲିକାରେ ଏବେ ଯୋଡ଼ିହୋଇଯାଇଛି ଇଡିଲି, ଦୋସା, ଉପମା, ସମ୍ବର, ନଡ଼ିଆ ବାଦାମ ଚଟଣି, ଉପମା, ବରା ଇତ୍ୟାଦି । ସେଥିପାଇଁ ସକାଳ ୭ଟା ହେଲା କ୍ଷଣି ଲୋକଙ୍କ ସୁଅ ଛୁଟୁଛି ସାଉଥ ଇଣ୍ଡିଆନ୍ ଟିଫିନ୍ ଷ୍ଟଲ୍କୁ । କେବଳ ଟିଫିନ୍ ଷ୍ଟଲ୍ କାହିଁକି ଏବେ ଘରୋଇ ଖାଦ୍ୟରେ ମଧ୍ୟ ସାମିଲ ହୋଇଗଲାଣି ଦକ୍ଷିଣ ଭାରତୀୟ ଖାଦ୍ୟ । ଗତ କିଛି ବର୍ଷ ହେବ ରାଜଧାନୀବାସୀ ଏହି ଖାଦ୍ୟ ପ୍ରତି ଅଧିକ ଆକର୍ଷିତ ହେଉଛନ୍ତି ।
ଏଥିପାଇଁ ବିଭିନ୍ନ ଛକରେ ସାଉଥ୍ ଇଣ୍ଡିଆନ୍ ଟିଫିନ୍ ଷ୍ଟଲ୍ ଖୋଲିଗଲାଣି । କର୍ମଜୀବୀମାନେ ଘରୁ ବାହାରି ଏହି ଷ୍ଟଲ୍ରେ ଯାଇ ହାଜର ହୋଇଯାଉଛନ୍ତି । କିଏ ସେଠି ଖାଉଛି ତ ଆଉ କେହି ଘରକୁ ନେଉଛନ୍ତି । ଦୋସା ମୂଲ୍ୟ ୩୦ ଟଙ୍କାରୁ ଆରମ୍ଭ ହୋଇ ୨ଶହ ଟଙ୍କା ପର୍ଯ୍ୟନ୍ତ ରହିଥିବା ବେଳେ ଇଡିଲି ଗୋଟେ ପ୍ଲେଟ୍କୁ କେଉଁଠି ୩୦ ଟଙ୍କା ତ ଆଉ କେଉଁଠି ୫୦ ଟଙ୍କା । ଏବକାର ପିଢି ଖାଦ୍ୟପେୟକୁ ନେଇ ମଧ୍ୟ ଅଧିକ ସଚେତନ । ତେଲ କମ୍ ପଡ଼ିଥିବା ବା ଆଦୌ ତେଲ ପଡିନଥିବା ଖାଦ୍ୟକୁ ନିଜ ଜଳଖିଆରେ ସାମିଲ କରିବାକୁ ସେମାନେ ପସନ୍ଦ କରୁଛନ୍ତି । ଫଳରେ ଦୋସା, ଇଡିଲି ଆଦି ପ୍ରତି ଆଗ୍ରହ ବଢ଼ୁଛି । ପ୍ରତିଦିନ ଜଣେ ଦେକାନୀ ୨ଶହରୁ ଅଧିକ ଦୋସା ଏବଂ ୫ଶହରୁ ଅଧିକ ଇଡିଲି ବିକ୍ରି କରୁଛନ୍ତି । ବଜାରରେ ଦୋସା ଓ ଇଡିଲି ଆଣର ପ୍ୟାକେଟ୍ ମଧ୍ୟ ମିଳୁଛି ଯାହାକୁ ଲୋକେ ଘରକୁ ନେଇ ଗୋଳେଇ ଦୋସା ଏବଂ ଇଡିଲି କରିପାରୁଛନ୍ତି ।
ଏବେ ବଡ଼ ବଡ଼ ରେସ୍ତୋରାଁରେ ମଧ୍ୟ ଦକ୍ଷିଣୀ ଖାଦ୍ୟର ରହୁଛି ପ୍ରଚୁର ବରାଦି । ପ୍ଲେନ୍ ଦୋସା, ମସଲା ଦୋସା, ଆଳୁ ଦୋସା, ପରିବା ଦୋସା, ଅଣ୍ଡା ଦୋସା, ମିଲେଟ୍ ଦୋସା, ଚକୋଲେଟ୍ ଦୋସା, ମୈସୁର ଦୋସା, ରାଭା ଦୋସା, ପିଆଜ ଦୋସା ଆଦି ବିଭିନ୍ନ ପ୍ରକାରର ଦୋସା ଏବେ ବଜାରରେ ମିଳୁଛି । ଏହାସହ ଦୋକାନୀ ପରସୁଛନ୍ତି ଆଳୁପିଆଜ ତରକାରୀ, ସମ୍ବର, ନଡ଼ିଆ ଚଟଣି ଓ ବାଦାମ ଚଟଣି ।
ମଞ୍ଚେଶ୍ୱର ନିକଟ ଶୁଭଶ୍ରୀ ସାଉଥ୍ ଇଣ୍ଡିଆନ୍ ଟିଫିନ୍ ଷ୍ଟଲର ଉମାକାନ୍ତ ବେହେରା କହନ୍ତି, ପ୍ରତିଦିନ ପାଖାପାଖି ୧୦୦ ଦୋସା ଓ ୪ଶହରୁ ଅଧିକ ଇଡିଲି ବିକୁଛି । ଏବେ ଦକ୍ଷିଣ ଭାରତର ଖାଦ୍ୟ ଅଧିକ ଚାଲିଛି । ଓଡ଼ିଆ ଘରେ ପୂଜା ପାର୍ବଣରେ ବିଭିନ୍ନ ପିଠା ସାମିଲ ହେଉଥିଲା । ହେଲେ ଦୋସାର ସ୍ୱାଦ ଟିକେ ଭିନ୍ନ ହୋଇଥିବା ବେଳେ ଇଡିଲି ବହୁତ ନରମ ହୋଇଥିବାରୁ ଲୋକେ ଏସବୁ ଖାଦ୍ୟକୁ ଅଧିକ ପସନ୍ଦ କରୁଛନ୍ତି ।
