ଲକ୍ଷ୍ନୌ: ଉତ୍ତର ପ୍ରଦେଶରେ ହାପୁର ଜିଲ୍ଲାରେ ହତ୍ୟାକାଣ୍ଡ ନେଇ ଖବର ମିଳିଛି । ସମାଜବାଦି ପାର୍ଟି ନେତାଙ୍କ ପତ୍ନୀଙ୍କୁ ଗୁଳି କରି ହତ୍ୟା କରାଯାଇଛି । ସପା ନେତାଙ୍କ ପତ୍ନୀଙ୍କ ମୃତଦେହ ତାଙ୍କ ଘରୁ ଉଦ୍ଧାର ହୋଇଛି । ପ୍ରଥମେ ସିଢିରୁ ପଡ଼ି ତାଙ୍କର ମୃତ୍ୟୁ ହୋଇଥିବା ନେଇ ଚର୍ଚ୍ଚା ହୋଇଥିଲା । ପରେ ହସ୍ପିଟାଲରେ ତାଙ୍କ ଦେହରେ ଗୁଳି ବାଜିଥିବା ନେଇ ସ୍ପଷ୍ଟ ହୋଇଛି ।
ଘଟଣା ସଂପର୍କରେ ସୂଚନା ମିଳିବା ପରେ ପୋଲିସ ପହଞ୍ଚି ତଦନ୍ତ ଚଳାଇଛି । ହେଲେ ନେତାଙ୍କ ଘରେ କୌଣସି ବାହାର ବ୍ୟକ୍ତି ପଶିଥିବା ନେଇ କୌଣସି ସୁରାକ ମିଳିନାହିଁ । ସପା ନେତା ଜାହିର ସଲମାନୀଙ୍କ ଦ୍ବିତୀୟ ପତ୍ନୀ ଥିଲେ ମୃତ ନାଜରୀନ । ସେପଟେ ଘଟଣା ସମୟରେ ଜାହିର ସଲମାନୀ ଘରେ ନଥିବା ନେଇ କହିଛନ୍ତି । ସେ ମେରଠ ଯାଇଥିଲେ ବୋଲି ମିଡିଆରେ କହିଛନ୍ତି ଜାହିର ।
ତାଙ୍କୁ ଘରୁ ଫୋନ୍ ଯାଇଥିଲା ଯେ ନାଜରୀନ ସିଢ଼ିରୁ ପଡ଼ିଯାଇଛନ୍ତି ଏବଂ ତାଙ୍କ ମୁଣ୍ଡରେ ଆଘାତ ଲାଗିଛି । ତାଙ୍କୁ ଘରେ କାମ କରୁଥିବା ଶ୍ରମିକ ମେଡିକାଲ ନେଇଛନ୍ତି । କିନ୍ତୁ ସେଠାରେ ନାଜରୀନଙ୍କ ଶରୀରରେ ଗୁଳି ଲାଗିଛି ଏବଂ ସେ ମୃତ୍ୟୁବରଣ କରିଛନ୍ତି ବୋଲି ଡାକ୍ତର କହିଥିଲେ । ସେପଟେ ଘର ବାହାରେ କ୍ୟାମେରା ଲାଗିଥିବା ବେଳେ ଯିଏ ବି ଆସିଥିବ ଜଣାପଡ଼ିବ ବୋଲି ଏସପି ଅଭିଷେକ ବର୍ମା କହିଛନ୍ତି ।
