କେସିଙ୍ଗା,୭/୯ : କଳାହାଣ୍ଡି ଜିଲ୍ଲା କେସିଙ୍ଗା ରେଳ ଷ୍ଟେସନ ନିକଟସ୍ଥ ଏକ ହୋଟେଲ ନିକଟରେ ବୁଧବାର ରାତିରେ ଜଣେ ଯୁବକଙ୍କୁ ଛୁରା ମାଡ଼ ହୋଇଛି । ଛୁରା ମାଡ଼ରେ ଆହତ ହୋଇଥିବା ଯୁବକ ଜଣକ ହେଉଛନ୍ତି କେସିଙ୍ଗା ସହର ବଗାଡ ଗ୍ରାମର କେଶବ ନାୟକ। କେଶବଙ୍କୁ ରାତିରେ ଗୁରୁତର ଅବସ୍ଥାରେ ଉଦ୍ଧାର କରାଯାଇ କେସିଙ୍ଗା ସରକାରୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି। କେସିଙ୍ଗା ପୁଲିସ ଏନେଇ ଏକ ମାମଲା ରୁଜୁ କରିଥିବା ବେଳେ ଅଭିଯୁକ୍ତମାନଙ୍କୁ ଥାନାରେ ଅଟକ ରଖି ତଦନ୍ତ କରୁଥିବା ଜଣାପଡିଛି । 

ଅଭିଯୁକ୍ତମାନେ କେସିଙ୍ଗା ସହରର ହୋଇଥିବା ବେଳେ ଘଟଣାରେ ୩ ଜଣଙ୍କୁ ଅଟକ ରଖି ପଚରାଉଚରା ଚାଲିଛି ବୋଲି ଆଇଆଇସି ପ୍ରଦ୍ୟୁମ୍ନ ମହାପାତ୍ର ସୂଚନା ଦେଇଛନ୍ତି । ତେବେ ଘଟଣାର କାରଣ ଜଣା ପଡିନଥିବା ବେଳେ ପୁଲିସ ପକ୍ଷରୁ ମଧ୍ୟ ଘଟଣା ବିଷୟରେ ସ୍ପଷ୍ଟ ସୂଚନା ମିଳିପାରି ନାହିଁ । 

କେସିଙ୍ଗା ସହରରେ ଦିନକୁ ଦିନ ବେକାରୀ ସଂଖ୍ୟା ସହ ଅସାମାଜିକ ଯୁବକଙ୍କ ସଂଖ୍ୟା ବୃଦ୍ଧି ପାଉଥିବା ନେଇ ଅଭିଯୋଗ ହେଉଛି । ସହରର ବିଭିନ୍ନ ସ୍ଥାନରେ ସେମାନଙ୍କ ଆଡ୍ଡା ଜମୁଥିବା ବେଳେ ସହରରେ ଅଶାନ୍ତି ବାତାବରଣ ସୃଷ୍ଟି କରୁଥିବା ନେଇ ବୁଦ୍ଧିଜିବୀ ମହଲରେ ମତପ୍ରକାଶ ପାଇଛି । ସହରର ମୁଖ୍ୟ ରାସ୍ତାରେ ଯୁବକମାନଙ୍କ ମଧ୍ୟରେ ଗଣ୍ଡଗୋଳ ହେବା ଘଟଣା କେସିଙ୍ଗା ସହରରେ ଏକପ୍ରକାର ନିତିଦିନିଆ ଘଟଣା ହେଉଥିବା ଶୁଣିବାକୁ ମିଳୁଛି । ସେହିପରି ଅସାମାଜିକ ଯୁବକମାନେ ବେପରୁଆ ବାଇକ୍ ଚାଲନା କରି ଲୋକଙ୍କ ଜୀବନ ପ୍ରତି ବିପଦ ସୃଷ୍ଟି କରୁଥିବା ତଥା ବିଭିନ୍ନ ସମୟରେ ନିରୀହ ଲୋକଙ୍କୁ ଧମକ ଚମକ ଦେଇ ଦାଦା ବଟି ଆଦାୟ କରୁଛନ୍ତି। ହେଲେ ସ୍ଥାନୀୟ ପୁଲିସ ଏଥିପ୍ରତି ଦୃଷ୍ଟି ଦେଉନଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି।