ଭୁବନେଶ୍ୱର,୦୨/୧୨: ଚଳିତବର୍ଷ ଯୁକ୍ତ ୨ ପାସ୍‌ କରିଥିବା ମେଧାବୀ  ଛାତ୍ରଛାତ୍ରୀଙ୍କୁ ଲାପଟପ୍‌ କିଣିବା ପାଇଁ ମିଳିବ ଆର୍ଥିକ ସହାୟତା । ରାଜ୍ୟ ସରକାରଙ୍କ ପକ୍ଷରୁ ଏହି ସହାୟତା ରାଶି ସିଧାସଳଖ ପ୍ରତ୍ୟକ୍ଷ ଲାଭ ହସ୍ତାନ୍ତର(ଡିବିଟି)  ମାଧ୍ୟମରେ ଦିଆଯିବ । ଏଥିପାଇଁ ଗତ ୧୮ ତାରିଖରୁ ରାଜ୍ୟ ସ୍କଲାରସିପ୍‌ ପୋର୍ଟାଲରେ ଆବେଦନ ଆରମ୍ଭ ହୋଇଛି । ମାତ୍ର  ଆବେଦନ ତାରିଖରୁ  ହିଁ ଏହି ପୋର୍ଟାଲ୍‌ କାମ  କରୁନି । ତେଣୁ ଛାତ୍ରଛାତ୍ରୀ  ଆବେଦନ କରିବାରୁ  ବଞ୍ଚିତ ହେଉଛନ୍ତି । ଏନେଇ  ଉପଲବ୍ଧ ହେଲ୍‌ପଲାଇନ୍‌ ନମ୍ବରରେ ଯୋଗାଯୋଗ କଲେ ମଧ୍ୟ ଉତ୍ତର ମିଳୁନି । 

ଯଦି  କୌଣସି ଅଧିକାରୀ ଫୋନ୍‌ ଉଠାଉଛନ୍ତି, ଉତ୍ତର ମିଳୁଛି ଏହି ସମସ୍ୟା ସମ୍ପର୍କରେ  ଆମେ ବିଭାଗୀୟ ଅଧିକାରୀଙ୍କୁ ଜଣାଇଛୁ । ଆମ ହାତରେ କିଛି ନାହିଁ । ଏପଟେ  ଲାପଟପ୍‌ ସହାୟତା ପାଇଁ ଆବେଦନ କରିବାକୁ ବାରମ୍ବାର ସାଇବର କାଫେ ଦୌଡ଼ି  ଦୌଡ଼ି ମେଧାବୀ ଛାତ୍ରଛାତ୍ରୀ ନିରାଶ ହେଉଛନ୍ତି । ଉଚ୍ଚଶିକ୍ଷା ବିଭାଗର ଏପରି  ବେଫିକର କାର୍ଯ୍ୟକୁ ଅଭିଭାବକମାନେ ନିନ୍ଦା କରିଛନ୍ତି । ସୂଚନାଯୋଗ୍ୟ, ଲାପଟପ୍‌  ଆର୍ଥିକ ସହାୟତା ପାଇଁ ଆବେଦନ ଶେଷ ତାରିଖ ଡିସେମ୍ବର ୧୭ ତାରିଖ ରହିଛି ।  ଚଳିତ ବର୍ଷ ଯୁକ୍ତ ୨ ପରୀକ୍ଷାରେ ପାସ୍‌ କରିଥିବା ୧୫ଶହ ମେଧାବୀଙ୍କୁ ଲାପ୍‌ଟପ୍‌  କିଣିବା ପାଇଁ ଆର୍ଥିକ ସହାୟତା ରାଶି ଦିଆଯିବ ।