ଭୁବନେଶ୍ୱର,୨୩/୦୪: ଗ୍ରୀଷ୍ମ ପ୍ରବାହ ପାଇଁ ଆସନ୍ତା ୨୫ରୁ ରାଜ୍ୟର ସମସ୍ତ ସ୍କୁଲ୍‌ରେ ଖରା ଛୁଟି ଘୋଷଣା କରାଯାଇଛି । ଗ୍ରୀଷ୍ମ ଅବକାଶକାଳୀନ ପାଠପଢ଼ା ପାଇଁ ଏବେଠୁ ସରକାରୀ  ଓ ସରକାରୀ ଅନୁଦାନପ୍ରାପ୍ତ ସ୍କୁଲର ପ୍ରଧାନଶିକ୍ଷକଙ୍କୁ ଚିଠି କରାଯାଇଛି ।  ଏନେଇ ଜିଲ୍ଲା ଶିକ୍ଷା ଅଧିକାରୀ (ଡିଇଓ) ମାନେ ସ୍କୁଲ୍‌ କର୍ତ୍ତୃପକ୍ଷଙ୍କୁ ଏକ ସ୍ୱତନ୍ତ୍ର  ଚିଠି କରିଛନ୍ତି । 

ଖରାଛୁଟି ସମୟରେ ବହି ବଣ୍ଟନ  କରାଯିବ। ଓଡ଼ିଶା ରାଜ୍ୟ ଶିକ୍ଷା କାର୍ଯ୍ୟକ୍ରମ ପ୍ରାଧିକରଣ (ଓସେପା) ପକ୍ଷରୁ ଜାରି ହୋଇଥିବା ଏକାଡେମିକ କ୍ୟାଲେଣ୍ଡର ଅନୁଯାୟୀ ରୁଟିନ୍‌ ପ୍ରସ୍ତୁତ କରାଯିବ । ଏସ୍‌ଏ-୨ ପରୀକ୍ଷା ଫଳକୁ ସମୀକ୍ଷା କରାଯିବ । କିପରି ଅଧିକ ଭଲ ରେଜଲ୍ଟ  ହୋଇପାରିବ ସେନେଇ ଯୋଜନା  ପ୍ରସ୍ତୁତ କରାଯିବ । ଏକ୍ସଟ୍ରା କ୍ଲାସ ପାଇଁ  ଯୋଜନା ହେବ । ପ୍ରତ୍ୟେକ କ୍ଲାସ ଏବଂ  ବିଷୟବସ୍ତୁ ପାଇଁ ଲେସନ୍‌ ପ୍ଲାନ ହେବ ।  ଅବକାଶକାଳୀନ ଛୁଟିରେ ପିଲାଙ୍କୁ  ଶିକ୍ଷକମାନେ ହୋମୱାର୍କ ଦେବେ । ସ୍କୁଲ  ଖୋଲିବା ପୂର୍ବରୁ ଭଙ୍ଗାରୁଜା ଜିନିଷର  ମରାମତି କରାଯିବ । ସ୍କୁଲ୍‌ ଖୋଲିବାର  ୨ଦିନ ପୂର୍ବରୁ ସ୍କୁଲ କ୍ୟାମ୍ପସକୁ ପରିଷ୍କାର  କରାଯିବ । ଶୌଚାଳୟ ଓ ପାନୀୟଜଳ  ବ୍ୟବସ୍ଥାର ଯାଞ୍ଚ ସହ ସୁନିଶ୍ଚିତ କରିବାକୁ  କୁହାଯାଇଛି । ପ୍ରଧାନଶିକ୍ଷକମାନେ ସ୍କୁଲ  ବିଭିନ୍ନ ସମସ୍ୟାକୁ ନେଇ ନିଜର ସ୍କୁଲ  ଶିକ୍ଷକଙ୍କ ସହ ଆଲୋଚନା କରିବେ । ଏହାର ସମାଧାନ ନେଇ ମତାମତ  ସଂଗ୍ରହ କରିବେ । ତେବେ ଗଞ୍ଜାମ  ଜିଲ୍ଲା ଶିକ୍ଷା ଅଧିକାରୀଙ୍କ ପକ୍ଷରୁ ସମସ୍ତ  ସ୍କୁଲକୁ ଚିଠି କରାଯାଇଥିବା ବେଳେ  ଅନ୍ୟ ଜିଲ୍ଲାମାନଙ୍କରେ ମଧ୍ୟ ଏପରି ଚିଠି  କରାଯାଇଛି ।