ନୂଆଦିଲ୍ଲୀ: କୋଲକାତାର ଆର.ଜି କର ହସ୍ପିଟାଲରେ ମହିଳା ଡାକ୍ତରଙ୍କ ସହ ଦୁଷ୍କର୍ମ ଓ ହତ୍ୟା ମାମଲାରେ ମଙ୍ଗଳବାର ସୁପ୍ରିମକୋର୍ଟରେ ଶୁଣାଣି ହୋଇଛି । ଗତ ଦିନରେ ବେଙ୍ଗଲ ସରକାର ମହିଳା ଡାକ୍ତରଙ୍କ ସୁରକ୍ଷା ପାଇଁ ଡାକ୍ତରଖାନାରେ ନାଇଟ୍ ସିପ୍ଟ ଦିଆନଯିବା ପାଇଁ ନିର୍ଦ୍ଦେଶ ଦେଇଥିଲେ। ତେବେ ବେଙ୍ଗଲ ସରକାରଙ୍କ ଏହି ଆଦେଶକୁ ନେଇ ସୁପ୍ରିମକୋର୍ଟ ତୀବ୍ର ଅସନ୍ତୋଷ ବ୍ୟକ୍ତ କରିଛନ୍ତି । ବେଙ୍ଗଲ ସରକାରଙ୍କ ଏହି ଆଦେଶକୁ ପରିବର୍ତ୍ତନ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି । 

ମଙ୍ଗଳବାର ଦିନ ଶୁଣାଣି ସମୟରେ ପ୍ରଧାନ ବିଚାରପତି ଡିଓ୍ବାଇ ଚନ୍ଦ୍ରଚୁଡ କହିଛନ୍ତି ଯେ, 'ଆପଣ (ବେଙ୍ଗଲ ସରକାର) କିପରି କହିପାରିବେ ଯେ ମହିଳା ମାନେ ରାତିରେ କାମ କରିପାରିବେ ନାହିଁ ? ମହିଳା ଡାକ୍ତରଙ୍କ ଉପରେ କାହିଁକି ପ୍ରତିବନ୍ଧକ ଲଗାଯାଉଛି ? ସେମାନେ ଏଭଳି ଆରାମ ଚାହାଁନ୍ତି ନାହିଁ । ମହିଳା ମାନେ ସମାନ ସିଫ୍ଟରେ କାମ କରିବାକୁ ପ୍ରସ୍ତୁତ । 

ପ୍ରଧାନ ବିଚାରପତି କହିଛନ୍ତି, 'ସିବଲ (ବେଙ୍ଗଲ ସରକାରଙ୍କ ଓକିଲ) ଆପଣ ଏହି ପ୍ରସଙ୍ଗରେ ଧ୍ୟାନ ଦେବା ଆବଶ୍ୟକ । ଏହାର ସମାଧାନ ଉପଯୁକ୍ତ ସୁରକ୍ଷା ବ୍ୟବସ୍ଥା ସୁନିଶ୍ଚିତ କରିବା । ପଶ୍ଚିମବଙ୍ଗ ସରକାର ଏହାର ଆଦେଶରେ ସଂଶୋଧନ କରିବା ଉଚିତ୍ । ରାଜ୍ୟର ମହିଳା ଡାକ୍ତର ମାନଙ୍କୁ ସୁରକ୍ଷା ଯୋଗାଇବା ଆପଣଙ୍କର ଦାୟିତ୍ବ । ଆପଣ ମହିଳା ମାନଙ୍କୁ ରାତିରେ କାମ କରିବାରେ ଅଟକାଇ ପାରିବେ ନାହିଁ । ପାଇଲଟ, ସେନା କର୍ମଚାରୀ ଏବଂ ଅନ୍ୟମାନେ ମଧ୍ୟ ରାତିରେ କାମ କରନ୍ତି ।