ନୂଆଦିଲ୍ଲୀ ୩୦/୦୫: ଟି-ଟ୍ୱେଣ୍ଟି ଫର୍ମାଟ୍ ସ୍ୱଳ୍ପ ଦିନର ହେଇଥିଲେ ହେଁ ଅବିଶ୍ୱସନୀୟ ସଟ୍, ବିସ୍ଫୋରକ ବ୍ୟାଟିଂ ଓ ବିଚକ୍ଷଣ ରଣ କୌଶଳକୁ ନେଇ ଲୋକପ୍ରିୟତାର ଶୀର୍ଷରେ ରହିଛି । ପ୍ରତି ବିଶ୍ୱକପ୍ରେ କିଛି ଦର୍ଶନୀୟ ପ୍ରଦର୍ଶନ ଦେଖିବାକୁ ମିଳିଛି । ଅନେକ ରେକର୍ଡ ସ୍ଥାପନ ହୋଇଛି ଓ ପରବର୍ତ୍ତୀ ସଂସ୍କରଣରେ ଏହି ସବୁ ରେକର୍ଡ ଭଙ୍ଗ ହୋଇଛି । ଆଗାମୀ ଟି-ଟ୍ୱେଣ୍ଟି ବିଶ୍ୱକପ୍ରେ ମଧ୍ୟ ଅନେକ ନୂଆ ରେକର୍ଡ ସ୍ଥାପନ ହେବାକୁ ଯାଉଛି ।
ଦ୍ରୁତତମ ବିଶ୍ୱକପ୍ ଶତକ
ଏଥର ଗୋଟିଏ ରେକର୍ଡ ଉପରେ ସମସ୍ତଙ୍କ ନଜର ରହିବ । ତାହା ହେଉଛି ଦ୍ରୁତତମ ଶତକ ରେକର୍ଡ । ଟି-ଟ୍ୱେଣ୍ଟି ବିଶ୍ୱକପ୍ରେ ଦ୍ରୁତତମ ଶତକ ରେକର୍ଡ ୱେଷ୍ଟ ଇଣ୍ଡିଜ୍ର କ୍ରିସ ଗେଲ୍ଙ୍କ ନାମରେ ରହିଛି । ଦ୍ରୁତତମ ବିଶ୍ୱକପ୍ ଶତକ ତାଲିକାର ପ୍ରଥମ ୨ଟି ଯାକ ସ୍ଥାନ ଗେଲଙ୍କ ଅକ୍ତିଆରରେ ରହିଛି । ସେ ୪୭ଟି ବଲ୍ ଓ ୫୦ଟି ବଲ୍ରେ ଶତକ ଅର୍ଜନ କରିଛନ୍ତି । ୨୦୧୬ବିଶ୍ୱକପ୍ରେ ସେ ଇଂଲଣ୍ଡ ବିପକ୍ଷରେ ୪୭ଟି ବଲ୍ରୁ ଶତକ ଅର୍ଜନ କରିଥିଲେ । ୱାଙ୍ଖଡ଼େ ଷ୍ଟାଡ଼ିୟମ୍ରେ ଏହି ମ୍ୟାଚ୍ ଆୟୋଜିତ ହୋଇଥିଲା । ସେହିପରି ୨୦୦୭ ବିଶ୍ୱକପ୍ରେ ଗେଲ୍ ଦକ୍ଷିଣ ଆଫ୍ରିକା ବିପକ୍ଷରେ ୫୦ଟି ବଲ୍ରୁ ଶତକ ଅର୍ଜନ କରିଥିଲେ । ଦ୍ରୁତତମ ବିଶ୍ୱକପ୍ ଶତକ ତାଲିକାର ତୃତୀୟ ସ୍ଥାନରେ ରହିଛନ୍ତି ନ୍ୟୁଜିଲାଣ୍ଡର ବ୍ରେଣ୍ଡନ ମ୍ୟାକ୍କୁଲମ । ସେ ୨୦୧୨ ବିଶ୍ୱକପ୍ରେ ବାଂଲାଦେଶ ବିପକ୍ଷରେ ୫୧ଟି ବଲ୍ରୁ ଶତକ ଅର୍ଜନ କରିଥିଲେ । ଟି-ଟ୍ୱେଣ୍ଟି ଅନ୍ତର୍ଜାତୀୟରେ ଦ୍ରୁତତମ ଶତକ ରେକର୍ଡ ନାମିବିୟାର ଜାନ ନିକୋଲ ଲଫ୍ଟି-ଇଟନଙ୍କ ନାମରେ ରହିଛି । ସେ ୩୩ଟି ବଲ୍ରେ ଶତକ ଅର୍ଜନ କରିଥିଲେ । ଏଥର ବିଶ୍ୱକପ୍ରେ ୨୦ଟି ଦଳ ଭାଗ ନେଉଥିବାରୁ ଦ୍ରୁତତମ ଶତକ ରେକର୍ଡ ଭଙ୍ଗ ହେବା ଆଶା କରାଯାଉଛି ।
ସର୍ବାଧିକ ଚୌକା
ଟି-ଟ୍ୱେଣ୍ଟି ବିଶ୍ୱକପ୍ରେ ସର୍ବାଧିକ ଚୌକା ରେକର୍ଡ ମାହେଲା ଜୟବର୍ଦ୍ଧନେଙ୍କ ନାମରେ ରହିଛି । ଏଥର ବିରାଟ କୋହଲି ତାଙ୍କ ରେକର୍ଡ ଭାଙ୍ଗିବା ସମ୍ଭାବନା ରହିଛି । ଜୟବର୍ଦ୍ଧନେ ବିଶ୍ୱକପ୍ରେ ମୋଟ୍ ୧୧୧ଟି ଚୌକା ମାରିଛନ୍ତି । କୋହଲି ଇତି ମଧ୍ୟରେ ୧୦୩ଟି ଚୌକା ମାରି ସାରିଛନ୍ତି । ସେହିପରି ରୋହିତ ଶର୍ମା ୯୧ଟି ଚୌକା ମାରିସାରିଛନ୍ତି ଓ ତାଲିକାର ଚତୁର୍ଥ ସ୍ଥାନରେ ରହିଛନ୍ତି । ଅଷ୍ଟ୍ରେଲିଆର ଡେଭିଡ୍ ୱାର୍ଣ୍ଣର ମଧ୍ୟ ଚୌକା ରେକର୍ଡ ଭାଙ୍ଗିବା ପାଇଁ ଦୌଡରେ ରହିଛନ୍ତି । ସେ ଇତି ମଧ୍ୟରେ ୮୬ଟି ଚୌକା ମାରିସାରିଛନ୍ତି ।
ସର୍ବାଧିକ କ୍ୟାଚ୍
ବିଶ୍ୱକପ୍ରେ ସର୍ବାଧିକ କ୍ୟାଚ୍ ରେକର୍ଡ ଦକ୍ଷିଣ ଆଫ୍ରିକାର ଏବି ଡି ଭିଲର୍ସଙ୍କ ନାମରେ ରହିଛି । ସେ ମୋଟ୍ ୨୩ଟି କ୍ୟାଚ୍ ଧରିଛନ୍ତି । ଏଥର ୱାର୍ଣ୍ଣର ତାଙ୍କ ରେକର୍ଡ ଭାଙ୍ଗିପାରନ୍ତି । ୱାର୍ଣ୍ଣର ଇତି ମଧ୍ୟରେ ୨୧ଟି କ୍ୟାଚ୍ ଧରିସାରିଛନ୍ତି । ରୋହିତ ଶର୍ମା ଓ ଗ୍ଲେନ ମ୍ୟାକ୍ସୱେଲ୍ ୧୬ଟି ଲେଖାଏଁ କ୍ୟାଚ୍ ଧରି ତୃତୀୟ ସ୍ଥାନରେ ରହିଛନ୍ତି ।
ଗୋଟିଏ ସଂସ୍କରଣରେ ସର୍ବାଧିକ ରନ୍
ବିରାଟ କୋହଲିଙ୍କ ନାମରେ ରହିଥିବା ଏହି ରେକର୍ଡକୁ ଏଥର ବହୁ ଖେଳାଳି ଚ୍ୟାଲେଞ୍ଜ ଦେଇ ପାରନ୍ତି । ଏପରିକି ଫର୍ମରେ ରହିଥିବା କୋହଲି ମଧ୍ୟ ନିଜ ରେକର୍ଡ ଭାଙ୍ଗିବା ସମ୍ଭାବନା ରହିଛି । ଏଥର ବିଶ୍ୱକପ୍ରେ ୨୦ଟି ଦଳ ଭାଗ ନେଉଥିବାରୁ ମ୍ୟାଚ୍ ସଂଖ୍ୟା ବୃଦ୍ଧି ପାଇଛି । ୨ଟି ଦଳ ଫାଇନାଲ୍ ଖେଳିବା ପର୍ଯ୍ୟନ୍ତ ୯ଟି ଲେଖାଏଁ ମ୍ୟାଚ୍ ଖେଳିବେ । ଫଳରେ କୋହଲିଙ୍କ ରେକର୍ଡ ଭଙ୍ଗ ହେବାର ଯଥେଷ୍ଟ ସମ୍ଭାବନା ରହିଛି । ୨୦୧୪ ସଂସ୍କରଣରେ କୋହଲି ୬ଟି ମ୍ୟାଚ୍ରୁ ୩୧୯ ରନ୍ ସଂଗ୍ରହ କରିଥିଲେ । ୧୦ବର୍ଷ ଧରି ଏହି ରେକର୍ଡ ଅତୁଟ ରହିଛି ।
୨୦୦୭ ବିଶ୍ୱକପ୍ରେ ସର୍ବାଧିକ ରନ୍ ସଂଗ୍ରହ କରିଥିଲେ ଅଷ୍ଟ୍ରେଲିଆର ମାଥ୍ୟୁ ହେଡେନ । ସେ ମୋଟ୍ ୨୬୫ ରନ୍ ସଂଗ୍ରହ କରିଥିଲେ । ୨୦୦୯ ବିଶ୍ୱକପ୍ରେ ଶ୍ରୀଲଙ୍କାର ତିଳକରତ୍ନେ ଦିଲସାନ ୩୧୭ ରନ୍ ସଂଗ୍ରହ କରିଥିବାବେଳେ ୨୦୧୦ରେ ଜୟବର୍ଦ୍ଧନେ ୩୦୨ ରନ୍, ୨୦୧୨ରେ ଅଷ୍ଟ୍ରେଲିଆର ସେନ ୱାଟସନ୍ ୨୪୯ରନ୍, ୨୦୧୬ରେ ବାଂଲାଦେଶର ତାମିମ ଇକବାଲ୍ ୨୯୫ ରନ୍, ୨୦୨୧ରେ ପାକିସ୍ତାନର ବାବର ଆଜମ ୩୦୩ ରନ୍ ଓ ୨୦୨୨ରେ କୋହଲି ୨୯୬ ରନ ସଂଗ୍ରହ କରିଥିଲେ ।
ଟ୍ରଫି ମୂଳପୋଛ ଲକ୍ଷ୍ୟରେ ଅଷ୍ଟ୍ରେଲିଆ
ପ୍ୟାଟ୍ କମିନ୍ସଙ୍କ ନେତୃତ୍ୱରେ ଅଷ୍ଟ୍ରେଲିଆ ଏଥର ଟାଇଟଲ ଜିତି ବିରଳ ରେକର୍ଡ ସ୍ଥାପନ କରିବାକୁ ଲକ୍ଷ୍ୟ ରଖିଛନ୍ତି । ଅଷ୍ଟ୍ରେଲିଆ ଗତ ବର୍ଷ ଆଇସିସି ଟେଷ୍ଟ ଚାମ୍ପିଅନ୍ସିପ୍ ଓ ଦିନିକିଆ ବିଶ୍ୱକପ୍ ଚାମ୍ପିଅନ୍ ହୋଇଥିଲେ । ଏଥର ପ୍ରଥମ ଦଳ ଭାବେ ଅଷ୍ଟ୍ରେଲିଆ ଟ୍ରଫି ମୂଳପୋଛ କରିପାରେ । କାରଣ କେବଳ ପୁରୁଷ ଟ୍ୱେଣ୍ଠି ବିଶ୍ୱକପ୍କୁ ଛାଡ଼ିଦେଲେ ବର୍ତ୍ତମାନ ଆଇସିସିର ସମସ୍ତ ଟ୍ରଫି ଅଷ୍ଟ୍ରେଲିଆ ନିକଟରେ ରହିଛି । ୧୯ବର୍ଷରୁ କମ୍ ବିଶ୍ୱକପ୍, ମହିଳା ଦିନିକିଆ ଓ ଟି-ଟ୍ୱେଣ୍ଟି ବିଶ୍ୱକପ୍ରେ ମଧ୍ୟ ଅଷ୍ଟ୍ରେଲିଆ ଡିଫେଣ୍ଡିଂ ଚାମ୍ପିଅନ୍
