ନୂଆଦିଲ୍ଲୀ, ୧୮/୦୩: ତେଲଙ୍ଗାନା ରାଜ୍ୟପାଳ ଓ ପୁଡୁଚେରି ଉପରାଜ୍ୟପାଳ ପଦରୁ ଇସ୍ତଫା ଦେଇଛନ୍ତି ତାମିଲସାଇ ସୁନ୍ଦରାଜନ । ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ସେ ତାଙ୍କର ଇସ୍ତଫା ପତ୍ର ପଠାଇ ଦେଇଛନ୍ତି । ତାମିଲସାଇ ସୁନ୍ଦରାଜନ ରାଜ୍ୟପାଳ ପଦରୁ ଇସ୍ତଫା ଦେବା ପରେ ଚର୍ଚ୍ଚା ହେଉଛି, ସେ ବିଜେପି ଟିକେଟରେ ତାମିଲନାଡ଼ୁରୁ ଲଢ଼ି ପାରନ୍ତି ଲୋକସଭା ନିର୍ବାଚନ ।

ଆଜି ସୋମବାର ତେଲଙ୍ଗାନାର ଜଗତିୟାଲ ଓ ତାମିଲନାଡ଼ୁର କୋଏମ୍ବାଟୁରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରୋଡ୍ ଶୋ ଓ ରାଲି କରିବାକୁ ଥିବା ବେଳେ ତାମିଲସାଇ ସୁନ୍ଦରାଜନ ଇସ୍ତଫା ଦେଇଛନ୍ତି । ସୂଚନା ଅନୁସାରେ, ପିଏମ୍ ମୋଦିଙ୍କୁ ଜଣାଇ ଇସ୍ତଫା ଦେଇଛନ୍ତି ତେଲଙ୍ଗାନା ରାଜ୍ୟପାଳ ।

ଜଣେ ଅଧିକାରୀଙ୍କ ଅନୁସାରେ, ତାମିଲସାଇ ସୁନ୍ଦରାଜନ ତାମିଲନାଡ଼ୁ କିମ୍ବା ପୁଡୁଚେରିରୁ ଲୋକସଭା ନିର୍ବାଚନ ଲଢ଼ି ପାରନ୍ତି । ଚେନ୍ନାଇର କୌଣସି ଲୋକସଭା ଆସନରୁ ବିଜେପି ତାଙ୍କୁ ପ୍ରାର୍ଥୀ କରିବା ସମ୍ଭାବନା ଅଧିକ ଥିବା ମଧ୍ୟ କୁହା ଯାଉଛି ।

୨୦୧୯ରେ ତାମିଲନାଡ଼ୁ ବିଜେପି ସଭାପତି ଥିଲେ ତାମିଲସାଇ ସୁନ୍ଦରାଜନ । ପରେ ସେହିବର୍ଷ ସେପ୍ଟେମ୍ବରରେ ତାଙ୍କୁ ତେଲଙ୍ଗାନା ରାଜ୍ୟପାଳ ଭାବେ ନିଯୁକ୍ତି ମିଳିଥିଲା । କିଣର ବେଦୀ ପୁଡୁଚେରି ଉପରାଜ୍ୟପାଳ ଛାଡ଼ିବା ପରେ ଅତିରିକ୍ତ ଦାୟିତ୍ୱ ତୁଲାଉଥିଲେ ତାମିଲସାଇ ସୁନ୍ଦରାଜନ । ରାଜ୍ୟପାଳ ହେବା ପୂର୍ବରୁ ଦୀର୍ଘ ୨୦ ବର୍ଷ ହେଲା ସେ ବିଜେପି ସହ ଜଡ଼ିତ ଥିଲେ । ତାମିଲସାଇ ୨୦୧୯ ଲୋକସଭା ନିର୍ବାଚନରେ ଥୁଥୁକୁଡି ଆସନରୁ ଲଢ଼ି ହାରି ଯାଇଥିଲେ ।