ଘଟଗାଁ, ୧୬।୫ : କେନ୍ଦୁଝର ଜିଲ୍ଲା ଘଟଗାଁ ଥାନା ଅନ୍ତର୍ଗତ ବଣଚକୁଳିଆ ଗ୍ରାମ ନିକଟ ଜଂଗଲରେ ସାହାରପଡା ବ୍ଲକର କନିଷ୍ଠଯନ୍ତ୍ରୀ ଚନ୍ଦ୍ର ହାସ୍ୟ ନାୟକଙ୍କ ମୃତ ଦେହ ଉଦ୍ଧାର ହୋଇଛି। ଚନ୍ଦ୍ରହାସ୍ୟଙ୍କ ଘର ମୟୁରଭଞ୍ଜ ଜିଲ୍ଲା ରରୁଆଁ ଥାନା ଅଞ୍ଚଳର ହୋଇଥିବା ବେଳେ ସେ ସାହାରପଡା ବ୍ଳକରେ କନିଷ୍ଠଯନ୍ତ୍ରୀ ଭାବେ କାର୍ଯ୍ୟରତ ଥିଲେ ଏବଂ ଘଟଗାଁ ସୌଭାଗ୍ୟନଗରରେ ଏକ ଭଡାଘରେ ରହୁଥିଲେ।
ତେବେ ସେ ଗତକାଲି ଘଟଗାଁ ଗ୍ରାମର ୩ଜଣ ଯୁବକଙ୍କ ସହିତ ଏକ ବାଇକ ଯୋଗେ କୌଣସି କାମରେ ବଣଚକୁଳିଆ ଗ୍ରାମକୁ ଯାଇଥିଲେ। ସେଠାରୁ ଅନ୍ୟମାନେ ଫେରି ଆସିଥିବା ବେଳେ ଚନ୍ଦ୍ରହାସ୍ୟଙ୍କ ମୃତଦେହ ଆଜି ଗ୍ରାମ ନିକଟ ଜଂଗଲରେ ଏକ ପୋଖରୀ ନିକଟରେ ପଡିଥିବା ଦେଖିବାକୁ ମିଳିଥିଲା। ଘଟଣା ସମ୍ପର୍କରେ ପରିବାର ଲୋକେ ଖବର ପାଇ ଘଟଗାଁ ଥାନାରେ ଅଭିଯୋଗ କରିଥିଲେ। ଅଭିଯୋଗ ପାଇବା ପରେ ଘଟଣା ସ୍ଥଳରେ ଘଟଗାଁ ଏସଡିପିଓ ପ୍ରଭାତ କୁମାର ତ୍ରିପାଠୀ ,ଆଇଆଇସି ସୁଭ୍ରାନ୍ତ ଜେନା ସାଇଣ୍ଟିଫିକ ଟିମ ସହ ପହଁଚି ପ୍ରାଥମିକ ତଦନ୍ତ ଆରମ୍ଭ କରିଛନ୍ତି। ଅନ୍ୟପକ୍ଷରେ ଏହା ହତ୍ୟା ନା ଅନ୍ୟ କେଉଁକାରଣ ତାଙ୍କର ମୃତ୍ୟୁ ଘଟିଛି ତାହା ସ୍ପଷ୍ଟ ହୋଇନାହିଁ। ପୋଖରୀ ନିକଟରେ ଚନ୍ଦ୍ରହାସ୍ୟଙ୍କ ମୃତ ଦେହ ପଡିଥିବା ବେଳେ କିଛି ଦୂରରେ ତାଙ୍କର ଚପଲ ପଡିଥିବା ଦେଖିବାକୁ ମିଳିଛି। ଗୋଟିଏ ବାଇକରେ ୪ଜଣ ଯାଇଥିବା ବେଳେ ଚନ୍ଦ୍ରହାସ୍ୟଙ୍କୁ ଛାଡି ଅନ୍ୟ ୩ଜଣ କାହିଁକି ଫେରିଆସିଲେ ତାକୁ ନେଇ ଏବେ ନାନା ସନ୍ଦେହ ସୃଷ୍ଟି ହୋଇଛି। ତେବେ ତଦନ୍ତ ପରେ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ପୋଲିସ ପକ୍ଷରୁ ସୂଚନା ମିଳିଛି।
