ଭୁବନେଶ୍ୱର ୦୮/୦୬: ବଜାରରେ ହାଉଯାଉ ବେନାମୀ ଔଷଧ କମ୍ପାନି । ଉକ୍ତ କମ୍ପାନୀ ଦ୍ୱାରା ପ୍ରସ୍ତୁତ ଔଷଧର ଗୁଣବତ୍ତା କ’ଣ, ତାହା ସନ୍ଦେହ ଘେରରେ । ଫଳରେ ନକଲି ଔଷଧର ବିକ୍ରି ରାଜ୍ୟରେ କାୟାବିସ୍ତାର କରୁଛି । ଏହା ଉପରେ ଅଂକୁଶ ଲଗାଇବାକୁ ଔଷଧ ଡାଟାବ୍ୟାଙ୍କ ଗଠନ କରିବାକୁ ପ୍ରସ୍ତାବ ଦେଇଥିଲା ଓଡ଼ିଶା ଡ୍ରଗ୍ସ କଣ୍ଟ୍ରୋଲର ଅଫିସର୍ସ ଆସୋସିଏସନ । ସେତେବେଳେ ସ୍ୱାସ୍ଥ୍ୟ ବିଭାଗ ଏହା ଉପରେ ତର୍ଜମା କରି ସବୁଜ ସଙ୍କେତ ଦେଇଥିଲା । ମାତ୍ର ପରବର୍ତ୍ତୀ ପର୍ଯ୍ୟାୟରେ ଏଥିପ୍ରତି ଆଉ ଆନ୍ତରିକତା ଦେଖାଉନଥିବାରୁ ଏବେ ଉକ୍ତ ପ୍ରସ୍ତାବଟି ଶୀତଳ ଭଣ୍ଡାରରେ ପଡ଼ିଛି । 

ରାଜ୍ୟରେ ଔଷଧର ମାନ ଓ ଗୁଣବତ୍ତା ଯାଞ୍ଚ କରିବାକୁ ଲାବୋରେଟୋରୀ ନାହିଁ । ଏହାର ଫାଇଦା ନେଉଛନ୍ତି ନକଲି ଔଷଧ ପ୍ରସ୍ତୁତକାରୀ କମ୍ପାନୀ । ଭେଷଜ ଭିଜିଲାନ୍ସ ଓ ଏସଟିଏଫ ଏସଂପର୍କରେ ତତ୍କାଳୀନ ସ୍ୱାସ୍ଥ୍ୟ ମନ୍ତ୍ରୀ ନବ ଦାସଙ୍କୁ ସୂଚନା ଦେଇଥିଲା । ବିଭିନ୍ନ ଗୁଇନ୍ଦା ସୂଚନା ଆଧାରରେ ସେତେବେଳେ କିଛି କମ୍ପାନୀ ଉପରେ ଚଢ଼ଉ ମଧ୍ୟ ହୋଇଥିଲା । ମାତ୍ର ପରବର୍ତ୍ତୀ ସମୟରେ ତାହା ମଧ୍ୟ ଶୀଥିଳ ପଡ଼ିଯାଇଛି । ଫଳରେ ପୁଣି ନକଲି ଔଷଧ ବଜାରକୁ ଆସୁଥିବା ଅଭିଯୋଗ ହୋଇଛି । 

ଓଡ଼ିଶା ଡ୍ରଗ୍ସ କଣ୍ଟ୍ରୋଲର ଅଫିସର ଆସୋସିଏସନ୍‌ ସାଧାରଣ ସମ୍ପାଦକ ଚନ୍ଦନ କୁମାର ଗିରି କହିଛନ୍ତି, ଔଷଧ ଡାଟାବ୍ୟାଙ୍କ ଡାଟାବେସ୍‌ ସଫ୍ଟୱେୟାର ପ୍ରସ୍ତୁତ ଲାଗି ଆସୋସିଏସନ ପକ୍ଷରୁ ପ୍ରସ୍ତାବ ଯାଇଥିଲା । ସରକାରଙ୍କ ଅନୁମୋଦନ ପରେ ଏହାକୁ ବିଧିବଦ୍ଧ ଭାବେ ଗ୍ରହଣ କରାଯିବ । ଏହି ଡାଟା ବ୍ୟାଙ୍କରେ ସମସ୍ତ କମ୍ପାନିର ତାଲିକା ଏବଂ ଔଷଧ ସମ୍ବନ୍ଧୀୟ ସୂଚନା ରହିବ । ରାଜ୍ୟରେ କେଉଁ କମ୍ପାନି ଔଷଧ କାରବାର କରୁଛନ୍ତି, ତାର ସୂଚନା ସ୍ୱାସ୍ଥ୍ୟ ବିଭାଗ ଓ ଭେଷଜ ନିର୍ଦ୍ଦେଶାଳୟ ପାଖରେ ରହିବ । ଯାହାଫଳରେ ବେନାମୀ କମ୍ପାନିର କାରବାର ଉପରେ ନଜର ରଖିହେବ ବୋଲି ସେ କହିଛନ୍ତି ।