ଚେନ୍ନାଇ: ଲୋକପ୍ରିୟ ତାମିଲ୍‌ ୟୁଟ୍ୟୁବ ଚ୍ୟାନେଲ ‘Red Pix’ର ମୁଖ୍ୟ ଫେଲିକ୍ସ ଗେରାଲ୍ଡ ଗିରଫ । ଶୁକ୍ରବାର ତ୍ରିଚି ଜିଲ୍ଳା ସାଇବର ଥାନା ପୁଲିସ୍‌ ତାଙ୍କୁ ନୋଏଡାରୁ ଗିରଫ କରିଛି । ଲୋକପ୍ରିୟ ୟୁଟ୍ୟୁବର ସବୁକ୍କୁ ଶଙ୍କରଙ୍କ ସହ ଏକ ଇଣ୍ଟଭ୍ୟୁ ପରେ ଚର୍ଚ୍ଚାକୁ ଆସିଥିଲେ ଫେଲିକ୍ସ । ମହିଳା ଏବଂ ମହିଳା ପୁଲିସଙ୍କ ବିରୋଧରେ ଅପମାନଜନକ ଟିପ୍ପଣୀ କରିବାକୁ ନେଇ ଉଭୟ ଶଙ୍କର ଏବଂ ଫେଲିକ୍ସ ବିବାଦ ଘେରକୁ ଆସିଥିଲେ । ଏହା ପରେ ଉଭୟ ୟୁଟ୍ୟୁବରଙ୍କ ନାଁରେ ମାମଲା ରୁଜୁ ହୋଇଥିଲା । ପ୍ରଥମେ ଶଙ୍କରଙ୍କୁ ଗିରଫ କରାଯିବା ପରେ ଫେଲିକ୍ସ ମାଡ୍ରାସ ହାଇକୋର୍ଟରେ ଆଗୁଆ ଜାମିନ ପାଇଁ ଆବେଦନ କରିଥିଲେ । 

ଫେଲିକ୍ସଙ୍କ ଆବେଦନ ଉପରେ ଶୁଣାଣି କରି ୟୁଟ୍ୟୁବରେ ପ୍ରସାରିତ ହେଉଥିବା ଅଶ୍ଳୀର କଣ୍ଟେଟକୁ ନେଇ ହାଇକୋର୍ଟ ଚର୍ଚ୍ଚିତ ଟିପ୍ପଣୀ କରିଥିଲେ । ସବସ୍କ୍ରାଇବର ବଢ଼ାଇବାକୁ କେତେକ ୟୁଟ୍ୟୁବ ଚ୍ୟାନେଲ୍‌ ଅଶ୍ଳୀଳ କଣ୍ଟେଣ୍ଟ ପବ୍ଲିଶ କରୁଛନ୍ତି ବୋଲି କହିବା ସହ ଏହା ସମାଜ ପାଇଁ ବିପଦ ବୋଲି କହିଥିଲେ ମାଡ୍ରାସ ହାଇକୋର୍ଟ । ସେପଟେ ଏଭଳି ଚ୍ୟାନେଲ୍‌ ଉପରେ କାର୍ଯ୍ୟାନୁଷ୍ଠାନ ନେବାକୁ ଉଭୟ ସରକାର ଏବଂ ସୋସିଆଲ ମିଡିଆ ପ୍ଲାଟଫର୍ମକୁ ନିର୍ଦ୍ଦେଶ ଦେଇଛନ୍ତି ଜଷ୍ଟିସ କୁମାରେଶ ବାବୁଙ୍କ ଏକକ ଖଣ୍ଡପୀଠ ।  

ଏହି ମାମଲରେ ଶଙ୍କର ଭଳି ଗେରାଲ୍ଡ ମଧ୍ୟ ସମାନ ଭାବରେ ଦାୟୀ ବୋଲି କୋର୍ଟ କହିଥିଲେ । ଏହା ପରେ ରେଡ୍‌ ପିକ୍ସ ୟୁଟ୍ୟୁବ ଚ୍ୟାନେଲ୍‌ର ମୁଖ୍ୟ ଫେଲିକ୍ସ ଗେରାଲ୍ଡଙ୍କୁ ସାଇବର ଥାନା ପୋଲିସ ଗିରଫ କରିଛି । ଗେରାଲ୍ଡଙ୍କୁ ଟ୍ରେନ୍‌ ଯୋଗେ ନୋଏଡାରୁ ତ୍ରିଚି ଅଣାଯାଇଥିବା ବେଳେ ତାଙ୍କୁ ମାଜିଷ୍ଟେ୍ରଟଙ୍କ ସାମ୍ନାରେ ହାଜର କରାଯାଇଛି ।