ନୂଆଦିଲ୍ଲୀ, ୨୪।୩: ପ୍ରାୟ ପ୍ରତ୍ୟେକ ବ୍ୟକ୍ତିଙ୍କ ପ୍ରିୟ ରଙ୍ଗ ଥାଏ । କିଏ ନିଜ ମନ ପସନ୍ଦ ରଙ୍ଗର ଗାଡ଼ି କିଣିଥାଏ ତ ଆଉ କିଏ ପୋଷାକ, ଜୋତା ଆଦି କିଣିଥାନ୍ତି । ତେବେ ଏମିତି କିଛି ଲୋକ ଅଛନ୍ତି, ଯେଉଁମାନେ ଗୋଟିଏ ନିର୍ଦ୍ଦିଷ୍ଟ ରଙ୍ଗ ପ୍ରତି ଏତେ ମାତ୍ରାରେ ଆସକ୍ତ ଥାନ୍ତି, ଯେ ନିଜ ଆଖାପାଖର ସମସ୍ତ ଜିନିଷକୁ ସେହି ରଙ୍ଗରେ ପରିଣତ କରିଦିଅନ୍ତି । ସେମିତି ଜଣେ ମହିଳା ହେଉଛନ୍ତି ଆମେରିକା ବ୍ରୁକଲିନ୍ ୮୬ ବର୍ଷୀୟା ଏଲିଜାବେଥ୍ ସ୍ୱିଟହାର୍ଟ । ବର୍ତ୍ତମାନ ସେ ବେଶ୍ ଚର୍ଚ୍ଚାରେ ଅଛନ୍ତି । ପ୍ରକୃତି ସମସ୍ତଙ୍କୁ ପସନ୍ଦ । ପ୍ରକୃତିର ସବୁଜଭରା ରଙ୍ଗ ପରିବେଶକୁ ସୁନ୍ଦର କରାଏ । ଏଲିଜାବେଥ୍ ଏହି ସବୁଜ ରଙ୍ଗ ମୋହରେ ଏତେ ମାତ୍ରାରେ ପଡ଼ିଛନ୍ତି ଯେ, ତାଙ୍କ ଚତୁଃପାର୍ଶ୍ୱର ସମସ୍ତ ସାମଗ୍ରୀକୁ ସବୁଜ ରଙ୍ଗ କରିଦେଇଛନ୍ତି । 

ତାଙ୍କର ଘର, ଗାଡ଼ି, ପୋଷାକ ସବୁକିଛି ସବୁଜ ରଙ୍ଗର । କେବଳ ଏତିକି ନୁହେଁ, ତାଙ୍କ ଘରର ସୋଫା, ବେଡ୍, ବାସନକୁସନ, କାଉଣ୍ଟର ଟପ୍ ଓ ବ୍ଲେଣ୍ଡର ସମେତ ପ୍ରତ୍ୟେକ ସାଜସଜ୍ଜା ଉପକରଣ ମଧ୍ୟ ସବୁଜ ରଙ୍ଗର । ଏହି ରଙ୍ଗ ପ୍ରତି ତାଙ୍କର ଏତେ ଦୁର୍ବଳତା ଦେଖି ତାଙ୍କୁ ବିଶ୍ୱର ସବୁଜ ମହିଳା ରୂପେ ଜାଣୁଛନ୍ତି । ତେବେ ଏହି ରଙ୍ଗ ପାଇଁ ତାଙ୍କର ଦୁର୍ବଳତାକୁ ନେଇ ସେ କୁହନ୍ତି ଯେ, ରଙ୍ଗ ମଣିଷକୁ ଖୁସି ରଖିବାରେ ସାହାଯ୍ୟ କରେ । ସବୁଜ ରଙ୍ଗ ମୋର ଅହେତୁକ ଦୁର୍ବଳତା । ଏହି ରଙ୍ଗକୁ ଦେଖିବା ମାତ୍ରେ ମୋତେ ଆନନ୍ଦ ଅନୁଭବ ହୁଏ । ଏହି ରଙ୍ଗ ମୋ ଭିତରେ ଏକ ଭିନ୍ନ ଧରଣର ଶକ୍ତି ଆଣିଥାଏ । 

ଏଲିଜାବେଥ୍ ଜଣେ ଭଲ ଆର୍ଟିଷ୍ଟ । ଦୀର୍ଘ ୨୦ ବର୍ଷ ଧରି ସେ ନିଜ ମନ ପସନ୍ଦର ରଙ୍ଗ ସବୁଜ ରଙ୍ଗ ସହ ଜୀବନ ବିତାଇଆସୁଛନ୍ତି । ଏପରିକି ନିଜ କେଶକୁ ମଧ୍ୟ ସବୁଜ ରଙ୍ଗ କରିଛନ୍ତି । ସେ ଆଣ୍ଟିକ୍ ଜିନିଷର ବ୍ୟବସାୟ କରନ୍ତି । ବାପାଙ୍କର ପ୍ରକୃତି ପ୍ରେମରୁ ପ୍ରେରିତ ହୋଇ ସେ ଏହି ସବୁଜ ରଙ୍ଗ ବାଛିଛନ୍ତି । ତେବେ ସବୁଜ ରଙ୍ଗ ଭିତରେ ତାଙ୍କ ଜୀବନ ବିତିବାର ଶୈଳୀର ଫଟୋ ଓ ଭିଡିଓ କରିଥାନ୍ତି । ଯାହାକୁ ସେ ନିଜ ଇନଷ୍ଟାଗ୍ରାମ୍ ଆକାଉଣ୍ଟରେ ସେୟାର କରିଥାନ୍ତି । ଏସବୁ ଭିଡିଓ ଲୋକଙ୍କୁ ଆକର୍ଷିତ କରେ । ଏମିତିକି ତାଙ୍କର ଇନଷ୍ଟାଗ୍ରାମରେ ପାଖାପାଖି ୫ ଲକ୍ଷ ଅଧିକ ଫଲୋଅର୍ସ ଅଛନ୍ତି । ସେ ବାହାରକୁ ଗଲେ ତାଙ୍କୁ ଦେଖି ଲୋକ ଖୁସି ହୁଅନ୍ତି ଓ ତାଙ୍କ ସହ ସେଲଫି ନିଅନ୍ତି । ଲୋକଙ୍କୁ ଖୁସି ହେବାର ଦେଖି ସେ ମଧ୍ୟ ଖୁସି ହୁଅନ୍ତି ବୋଲି କହନ୍ତି । ଏହା ତାଙ୍କ ମନରେ ସକାରତ୍ମକ ଭାବନା ସୃଷ୍ଟି କରେ ।