ଭୁବନେଶ୍ୱର,୧୯/୦୮:  ରାକ୍ଷୀପୂର୍ଣ୍ଣିମାରେ ପୂର୍ଣ୍ଣଚନ୍ଦ୍ର ୨୦୨୪  ମସିହାର ପ୍ରଥମ "ସୁପରମୁନ’ ଭାବରେ  ଦେଖାଯିବ  । "ସୁପରମୁନ’ ଶବ୍ଦଟି ପ୍ରଥମେ  ଆମେରିକାର ଜ୍ୟୋତିଷ ରିଚାର୍ଡ ନଲ ୧୯୭୯ ମସିହାରେ ପ୍ରଚଳନ କରିଥିଲେ ।  ଧୀରେ ଧୀରେ "ସୁପରମୁନ’ ଶବ୍ଦଟି ଖୁବ୍‌ ଲୋକପ୍ରିୟ ହୋଇ ଏବେ ବହୁଳ ଭାବରେ  ବ୍ୟବହାର ହେଉଛି । 

୨୦୨୪ ମସିହାରେ  "୪-ସୁପରମୁନ ସିରିଜ'ର ପ୍ରଥମ  "ସୁପରମୁନ୍‌’ ଦେଖାଯିବ । ଚନ୍ଦ୍ରଟି ଆମକୁ ସାଧାରଣ ଦିନର ପୂର୍ଣ୍ଣଚନ୍ଦ୍ର ଠାରୁ ପ୍ରାୟ ୯ ପ୍ରତିଶତ ବଡ ସହ ୨୦  ପ୍ରତିଶତ ଉଜ୍ୱଳ ଦେଖାଯିବ । ଜ୍ୟୋତିଷ ରିଚାର୍ଡ ନଲ୍‌ଙ୍କ ଭାଷାରେ ଯଦି ଚନ୍ଦ୍ର ଆମଠାରୁ ସାଧାରଣ ଦୂରତାର ୧୦ ପ୍ରତିଶତ ବା ତା'ଠାରୁ କମ୍‌ ଦୂରତାରେ ଥିବା ସମୟରେ ଏକ ପୂର୍ଣ୍ଣମୀ ପଡେ ତାହାକୁ ସୁପରମୁନ୍‌ କୁହାଯିବ । ଅର୍ଥାତ  ଯଦି ଚନ୍ଦ୍ର ଅମଠାରୁ ୩.୬୦ ଲକ୍ଷ  କିଲୋମିଟର ବା ତା'ଠାରୁ କମ୍‌ ଦୂରରେ  ଥିବା ସମୟରେ ଏକ ପୂର୍ଣ୍ଣମୀ ପଡିଥାଏ  ତା'ହେଲେ ସେହି ଚନ୍ଦ୍ରକୁ "ସୁପରମୁନ୍‌’ କୁହାଯାଏ କାରଣ ସେ ସମୟରେ ତାହା  ଆମକୁ ବଡ଼ ଓ ଉଜ୍ୱଳ ଦେଖାଯାଏ । ପ୍ରାୟ  ପ୍ରତ୍ୟେକ ବର୍ଷ ଏହିଭଳି ଘଟଣା ଘଟିଥାଏ । ଏହା ଏକ ବିରଳ ଘଟଣା ହୋଇଥିବାରୁ  ଏହାର ଏଭଳି ନାମକରଣ କରାଯାଇଛି । ତେବେ ଚନ୍ଦ୍ରର ରଙ୍ଗ ସହ ଏହାର କୌଣସି ସମ୍ପର୍କ ନାହିଁ ବୋଲି ସେ କହିଛନ୍ତି ।