କଟକ, ୦୩/୦୯ : ଚଳିତ ବର୍ଷ ଗଣେଶ ପୂଜାକୁ ଅଧିକ ଆକର୍ଷଣୀୟ କରିବା ପାଇଁ ତୁଳସୀପୁର ସ୍ଥିତ ଶ୍ରୀରାମ କ୍ଲବ୍‌ ପକ୍ଷରୁ ଉଦ୍ୟମ ଆରମ୍ଭ ହୋଇଛି । ପୂଜା ଆୟୋଜନଠୁ ଆରମ୍ଭକରି ଭସାଣି ପର୍ଯ୍ୟନ୍ତ ସବୁକିଛି କଟକ ସହରର ବିଭିନ୍ନ କ୍ଲବ୍‌ ତୁଳନାରେ ଆକର୍ଷଣୀୟ ରହିବ ବୋଲି କ୍ଲବ୍‌ ପକ୍ଷରୁ ଆଶା କରାଯାଇଛି । କାରଣ ଏଥର ଭସାଣିରେ କଟକକୁ ପ୍ରଥମ ଥର ଦକ୍ଷିଣ ଭାରତର ଏକ ସ୍ୱତନ୍ତ୍ର ଡ୍ୟାନ୍ସ ଷ୍ଟାଇଲ୍‌ ପ୍ରଦର୍ଶିତ କରାଯିବ । ଏହି ଡ୍ୟାନ୍ସ ଷ୍ଟାଇଲ୍‌ ଏବେ ସୋସିଆଲ୍‌ ମିଡିଆରେ ଟ୍ରେଣ୍ଡିଂରେ ରହିଛି । 

ତୁଳସୀପୁର ଅଞ୍ଚଳର ଶ୍ରୀରାମ କ୍ଲବ୍‌ ୧୯୯୮ ମସିହାରେ ମଠସାହି ଅଞ୍ଚଳରେ ଗଢ଼ି ଉଠିଥିଲା । ଏହି କ୍ଲବରେ ୩୦ରୁ ଅଧିକ ସଦସ୍ୟ ରହିଛନ୍ତି । ପ୍ରତିବର୍ଷ ସଦସ୍ୟମାନଙ୍କ ସହଯୋଗରେ ପୂଜା ବେଶ୍‌ ଧୁମଧାମ୍‌ରେ ପାଳନ କରାଯାଏ । ପ୍ରତିବର୍ଷ ଭିନ୍ନ ଭିନ୍ନ ଶୈଳୀରେ ମୂର୍ତ୍ତି ନିର୍ମାଣ କରାଯାଇ ପୂଜା କରାଯାଏ । ଏଥର ପ୍ରାୟ ୬ ଫୁଟ୍‌ ଉଚ୍ଚର ମୂର୍ତ୍ତି ମଣ୍ଡପରେ ପୂଜା ପାଇବେ । ଚଳିତ ବର୍ଷର ପୂଜା ପାଇଁ ୨.୫ ଲକ୍ଷ ଟଙ୍କାର ବଜେଟ୍‌ ସ୍ଥିର କରାଯାଇଛି । ଗତ ବର୍ଷ ଏହି କମିଟି ପ୍ରଥମ ଥର ପାଇଁ ଓଡ଼ିଶାକୁ କେରଳ ପ୍ରସିଦ୍ଧ ଥାମ୍ୱୁଲମ୍‌ ବାଜା ସହ ରାଜସ୍ଥାନୀ ନୃତ୍ୟ ପରିବେଷଣ କରାଇ କଟକ ସହରରେ ଚର୍ଚ୍ଚାରେ ରହିଥିଲା । ଏହି କମିଟି ପକ୍ଷରୁ ପୂଜାକୁ ବିଶେଷ ଗୁରୁତ୍ୱ ଦିଆଯାଇଥାଏ । ଅଯୋଧ୍ୟାରେ ହୋଇଥିବା ଶ୍ରୀରାମଲାଲାଙ୍କ ଆକୃତିର ଗଣେଶ କୁମ୍ଭାର ସାହି ଅଞ୍ଚଳ କାରିଗର ସୁରଜ ମୁଦୁଲି ନିର୍ମାଣ କରୁଛନ୍ତି । ଚଳିତ ବର୍ଷ ବିଶେଷ ଆକର୍ଷଣ ଭାବେ କଟକକୁ ପ୍ରଥମ ଥର ପାଇଁ ଆସିବାକୁ ଯାଉଛି ଦକ୍ଷିଣ ଭାରତର ସ୍ୱତନ୍ତ୍ର ଡ୍ୟାନ୍ସ ଷ୍ଟାଇଲ୍‌ । ଏହାସହ ସମ୍ୱଲପୁରର ରାଧାକୃଷ୍ଣ ଘଣ୍ଟ ବାଦ୍ୟ ସହ ଲାଇଟ୍‌କୁ ସାମିଲ କରାଯିବ । ଜିଲ୍ଲା ପ୍ରଶାସନ, ପୁଲିସ ପ୍ରଶାସନ ଓ ଶାନ୍ତି କମିଟି ନିଷ୍ପତ୍ତି ଅନୁଯାୟୀ ଡିଜେ ମୁକ୍ତ ଓ ନିଶା ମୁକ୍ତ ଭସାଣି ଅନୁଷ୍ଠିତ ହେବ । ପ୍ରଶାସନର ଗାଇଡ୍‌ଲାଇନ୍‌ ଅନୁଯାୟୀ ପୂଜା ଓ ଭସାଣି ଉତ୍ସବ ପାଳନ କରାଯିବ ବୋଲି ସଭାପତି ସଞ୍ଜୀବ ସାହୁ, ସମ୍ପାଦକ ଅଭିନାଶ ସୁତାର, ଉପସଭାପତି ଭାଗ୍ୟଧର ସାହୁ, ସାଧାରଣ ସମ୍ପାଦକ ସନ୍ଦୀପ କୁମାର ସାହୁ, କୋଷାଧ୍ୟକ୍ଷ ମନୋଜ କୁମାର ସାହୁ ଏବଂ କୃଷ୍ଣ ଚନ୍ଦ୍ର ସାହୁ ସୂଚନା ଦେଇଛନ୍ତି ।