ରାୟଗଡ଼, ୧୮/୧୦ : ଗଜପତି ଜିଲ୍ଲା ରାୟଗଡ଼ ବ୍ଲକ ମହେନ୍ଦ୍ରଗିରି ବନାଞ୍ଚଳରେ ବାଘ ଆତଙ୍କ। ଗଣ୍ଡାହାତୀ ପଞ୍ଚାୟତର ସନ୍ତୋଷପୁର ଗ୍ରାମର ନୃସିଂହ ନାୟକଙ୍କ ଗୁହାଳରେ ବନ୍ଧା ହୋଇଥିବା ଗାଈକୁ ରାତିରେ କେହି ଅଜଣା ଜନ୍ତୁ ଘୋଷଡ଼ି ନେଇଛି। ବୁଧବାର ସକାଳୁ ପାଖ ଜଙ୍ଗଲରୁ ଗାଈର ମୃତଦେହ ଉଦ୍ଧାର ହୋଇଛି। ନିକଟରେ ଏକ ଜନ୍ତୁର ପାଦ ଚିହ୍ନ ପଡ଼ିଛି। ଏହା ବାଘର ପାଦ ଚିହ୍ନ ହୋଇଥିବା ଆଶଙ୍କା କରି ସ୍ଥାନୀୟ ଲୋକେ ଭୟଭୀତ ହୋଇପଡ଼ିଛନ୍ତି।
ବାଘ ଗାଁରେ ପଶି ଗାଈ ଖାଇ ଦେଇଥିବା ଖବର ପ୍ରଚାରିତ ହେବା ପରେ ଅଞ୍ଚଳବାସୀ ଆତଙ୍କିତ ହୋଇପଡ଼ିଛନ୍ତି। ଖବର ପାଇ ବନ ବିଭାଗ ଘଟଣା ସ୍ଥଳରେ ପହଞ୍ଚି ତଦନ୍ତ ଚଳାଇଥିବା ବେଳେ ତାହା ବାଘ ନା କୌଣସି ଅଜଣା ଜନ୍ତୁ ତାହା ଚିହ୍ନଟ ହେଲେ ସ୍ପଷ୍ଟ ଜଣାପଡିବ ବୋଲି ବନ ବିଭାଗ ପକ୍ଷରୁ ସୂଚନା ମିଳିଛି। ତୁରନ୍ତ ବନ ବିଭାଗ ଅଜଣା ଜନ୍ତୁକୁ ଚିହ୍ନଟ କରି ନୃସିଂହଙ୍କୁ କ୍ଷତିପୂରଣ ଦେବାକୁ ଏବଂ ଜନ୍ତୁକୁ ଘଉଡ଼ାଇବା ସହ ଅନ୍ୟ ଗୃହପାଳିତ ପଶୁଙ୍କୁ ସୁରକ୍ଷା ଦେବାପାଇଁ ସାଧାରଣରେ ଦାବି ହୋଇଛି।