ବିଶାଖାପାଟନମ୍‌,୨୭/୦୯: ଆନ୍ଧ୍ରପ୍ରଦେଶର ତିରୁପତି ସ୍ଥିତ ବିଶ୍ୱ ପ୍ରସିଦ୍ଧ ଶ୍ରୀ ଭେଙ୍କଟେଶ୍ୱର ସ୍ବାମୀ ମନ୍ଦିରର ପ୍ରସାଦରେ ପଶୁ ଚର୍ବି ମିଶ୍ରଣକୁ ନେଇ ବିବାଦ ବଢ଼ିବାରେ ଲାଗିଛି। ବର୍ତ୍ତମାନ ଏହି ଘଟଣାର ଅନୁସନ୍ଧାନ ପାଇଁ ଏକ ସ୍ୱତନ୍ତ୍ର ଅନୁସନ୍ଧାନକାରୀ ଦଳ (ଏସ୍‌ଆଇଟି) ଗଠନ କରାଯାଇଛି। ଲଡୁ ଏବଂ ଆନ୍ନ ପ୍ରସାଦରେ ଅପମିଶ୍ରିତ ଘିଅର ବ୍ୟବହାର ଯାଞ୍ଚ ପାଇଁ ୯ ଜଣ ସଦସ୍ୟଙ୍କ ଏକ ସ୍ୱତନ୍ତ୍ର ଅନୁସନ୍ଧାନକାରୀ ଦଳ ଗଠନ କରାଯାଇଛି। ଏହି ଦଳ ଗୁଣ୍ଟୁର ରେଞ୍ଜର ଆଇଜିପି ସର୍ବଶ୍ରେଷ୍ଠ ତ୍ରିପାଠୀଙ୍କ ଦ୍ୱାରା ପରିଚାଳିତ ହେବ।

ଆଇଜିପି ସର୍ବଶ୍ରେଷ୍ଠ ତ୍ରିପାଠୀ ପ୍ରସାଦକୁ ନେଇ ଏହି ଅନୁସନ୍ଧାନରେ ଗଠିତ ସ୍ୱତନ୍ତ୍ର ଦଳକୁ ନିର୍ଦ୍ଦେଶ ଦେବେ ଏବଂ ଏଥି ସହିତ ଏହି ଦଳରେ ଆଉ ୮ ଜଣ ସଦସ୍ୟଙ୍କୁ ସାମିଲ କରାଯିବ। ବିଶାଖାପାଟନମ୍ ରେଞ୍ଜର ଉପମହାନିରିକ୍ଷକ ଡିଆଇଜି ଗୋପୀନାଥ ଜେଟ୍ଟି, କଡପ୍ପା ପୋଲିସ୍ ଅଧୀକ୍ଷକ ହର୍ଷବର୍ଦ୍ଧନ ରାଜୁ, ଭେଙ୍କଟା ରାଓ, ଅତିରିକ୍ତ ପୋଲିସ ଅଧୀକ୍ଷକ ଜି. ସୀତାରାମ ରାଓ, ଡେପୁଟି ପୋଲିସ୍ ଅଧୀକ୍ଷକ ଜେ. ଶିବନାରାୟଣ ସ୍ବାମୀ, ଟି. ସତ୍ୟନାରାୟଣ, ଇନ୍ସପେକ୍ଟର କେ. ଉମାହେଶ୍ୱର ଏବଂ  ଏମ.ସର୍ଯ୍ୟନାରାୟଣ ଏହି ଦଳରେ ସାମିଲ ହୋଇଛନ୍ତି। 

ଏହାପୂର୍ବରୁ ଏହି ପ୍ରସଙ୍ଗରେ ସୁପ୍ରିମକୋର୍ଟରେ ଏକ ପିଟିସନ ଦାଖଲ କରାଯାଇଥିଲା। ସୁରଜିତ ଯାଦବ ନାମକ ଜଣେ ବ୍ୟକ୍ତି ଏହି ପିଟିସନରେ ଦାବି କରିଛନ୍ତି ଯେ, 'ଏହି ଘଟଣାର ତଦନ୍ତ ପାଇଁ କୋର୍ଟ କେନ୍ଦ୍ର ସରକାରଙ୍କୁ ଏସଆଇଟି ଗଠନ କରିବାକୁ ନିର୍ଦ୍ଦେଶ ଦିଅନ୍ତୁ। ବିଶ୍ୱାସ ସହିତ ଖେଳିବା ପାଇଁ ଦାୟୀ ବ୍ୟକ୍ତିଙ୍କ ବିରୋଧରେ ଉପଯୁକ୍ତ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ ବୋଲି ଆବେଦନକାରୀ କହିଛନ୍ତି।' ତେବେ ବର୍ତ୍ତମାନ ତମାମ ମାମଲାର ପୁଙ୍ଖାନୁପୁଙ୍ଖ ଅନୁସନ୍ଧାନ ପାଇଁ ଏକ ତଦନ୍ତ କମିଟି ଗଠନ କରାଯାଇଛି।

ମନ୍ଦିରର ପବିତ୍ର ନୈବେଦ୍ୟ (ଲଡୁ ପ୍ରସାଦ)ରେ ଅପମିଶ୍ରଣର ଖବର ସାମ୍ନାକୁ ଆସିବା ପରେ ଏହା ଉପରେ ଅନେକ ରାଜନୀତି ଚାଲିଛି। ଏହି କାରଣରୁ ବର୍ତ୍ତମାନ ଘଟଣାର ଅନୁସନ୍ଧାନ ପାଇଁ ଏକ ଏସଆଇଟି ଗଠନ କରାଯାଇଛି। ଏହି ବିବାଦ ସମ୍ପର୍କରେ ଆନ୍ଧ୍ରପ୍ରଦେଶର ଡେପୁଟି ସିଏମ୍ ପୱନ କଲ୍ୟାଣ କହିଛନ୍ତି ଯେ ପୂର୍ବତନ ମୁଖ୍ୟମନ୍ତ୍ରୀ ଓ୍ବାଇ.ଏସ୍‌. ଜଗନ୍ ମୋହନ ରେଡ୍ଡୀ ନିଜକୁ ରକ୍ଷା କରିବାର ଆବଶ୍ୟକତା ନାହିଁ। କାରଣ ତମାମ ବ୍ୟଭିଚାର ପଛରେ ପୂର୍ବତନ ସରକାରଙ୍କର ସମ୍ପୃକ୍ତି ରହିଛି।