ଭୁବନେଶ୍ୱର,୨୨/୦୩: । ଶୁକ୍ରବାରଠୁ ଯୁକ୍ତ ୨ ପରୀକ୍ଷା ଖାତା ଦେଖା ଆରମ୍ଭ ହେବ । ଏନେଇ ଉଚ୍ଚ ମାଧ୍ୟମିକ ଶିକ୍ଷା ପରିଷଦ (ସିଏଚ୍ଏସ୍ଇ) ପକ୍ଷରୁ ପ୍ରସ୍ତୁତି ଶେଷ ହୋଇଛି । ୨ଟି ପର୍ଯ୍ୟାୟରେ ମୂଲ୍ୟାୟନ କରାଯିବ । ଉଭୟ ଅନ୍ଲାଇନ୍ ଏବଂ ଅଫଲାଇନ୍ ମୋଡ୍ରେ ମୂଲ୍ୟାୟନ କରାଯିବ । ଅଫଲାଇନ୍ ମୂଲ୍ୟାୟନ ପାଇଁ ୬୯ ଜୋନ୍ କରାଯାଇଛି । ସେହିପରି ଅନ୍ଲାଇନ୍ ମୂଲ୍ୟାୟନ ପାଇଁ ୪୧ ଜୋନ୍ର ବ୍ୟବସ୍ଥା ହୋଇଛି ।
ଶୁକ୍ରବାରଠୁ ପ୍ରଥମ ପର୍ଯ୍ୟାୟ ମୂଲ୍ୟାୟନ ଆରମ୍ଭ ହୋଇ ଏପ୍ରିଲ୍ ୨ ପର୍ଯ୍ୟନ୍ତ ଚାଲିବ । ଦ୍ୱିତୀୟ ପର୍ଯ୍ୟାୟ ମୂଲ୍ୟାୟନ ଏପ୍ରିଲ୍ ୪ରୁ ୧୫ ପର୍ଯ୍ୟନ୍ତ ହେବ । ପ୍ରଥମ ପର୍ଯ୍ୟାୟରେ ହେବାକୁ ଥିବା ଅନ୍ଲାଇନ୍ ମୂଲ୍ୟାୟନରେ ୨୮୦୦ ଶିକ୍ଷକଙ୍କୁ ନିୟୋଜିତ କରାଯାଇଛି । ଦ୍ୱିତୀୟ ପର୍ଯ୍ୟାୟ ଅଫଲାଇନ୍ ମୂଲ୍ୟାୟନରେ ମୋଟ ୩୭୦୦ ଶିକ୍ଷକଙ୍କୁ ନିୟୋଜିତ କରାଯାଇଛି । ଖାତା ଦେଖିବା ପାଇଁ ମୋଟ ୬୫୦୦ ଶିକ୍ଷକ ନିୟୋଜିତ କରାଯାଇଛି । ମେ ୧୫ ତାରିଖ ସୁଦ୍ଧା ପରୀକ୍ଷା ଫଳ ପ୍ରକାଶ କରିବାକୁ ଲକ୍ଷ୍ୟ ରଖାଯାଇଛି । ପରୀକ୍ଷା ଖାତା ମୂଲ୍ୟାୟନ କିପରି ସୁରୁଖୁରୁରେ ହେବ ସେନେଇ ସମସ୍ତ ପ୍ରକାରର ବ୍ୟବସ୍ଥା କରାଯାଇଛି ବୋଲି ସିଏଚ୍ଏସ୍ଇ ପରୀକ୍ଷା ନିୟନ୍ତ୍ରକ ଅଶୋକ କୁମାର ନାୟକ କହିଛନ୍ତି । ଉଲ୍ଲେଖଯୋଗ୍ୟ, ଚଳିତ ବର୍ଷ ମୋଟ ୩ ଲକ୍ଷ ୮୬ ହଜାର ୨୫୦ ଜଣ ପରୀକ୍ଷା ଦେଇଛନ୍ତି । ପରୀକ୍ଷାରେ କପି କରି ରାଜ୍ୟର ବିଭିନ୍ନ ସ୍ଥାନରୁ ୬୪୯ଜଣ ଏମ୍ପି ହୋଇଛି ।
