ଅନୁଗୁଳ,୧୩/: ଅନୁଗୁଳ ଜିଲ୍ଲାରେ ଜମିଲାଣି ନିର୍ବାଚନୀ ପ୍ରଚାର । ହାତରେ ଆଉ ଦିନ କେଇଟା ଥିବାରୁ ପ୍ରାର୍ଥୀମାନେ ପ୍ରଚାରରେ ଜୀ ଜାନ୍ ଲଗାଇ ଦେଇଛନ୍ତି । ସେପଟେ ଆଜି ଜିଲ୍ଲାକୁ ଷ୍ଟାର୍ ପ୍ରଚାରକ ଓ ହେଭିୱେଟ୍ ନେତାଙ୍କ ଆଗମନ ହେଉଛି । ବିଜେଡିର ବରିଷ୍ଠ ନେତା କାର୍ତ୍ତିକ ପାଣ୍ଡିଆନ୍ ଅନୁଗୁଳ ଜିଲ୍ଲା ଗସ୍ତରେ ଆସି ଦଳୀୟ ପ୍ରାର୍ଥୀଙ୍କ ପାଇଁ ଭୋଟ୍ ମାଗିବାର କାର୍ଯ୍ୟକ୍ରମ ଅଛି ।
ସୋମବାର ଅପରାହ୍ଣରେ ପ୍ରଥମେ ପାଣ୍ଡିଆନ୍ ପାଳଲହଡାରେ ରୋଡ୍ ସୋ’ କରିବେ । ପରେ ତାଳଚେରରେ ରୋଡ୍ ସୋ’ କରି ବିଧାୟକ ପ୍ରାର୍ଥୀ ବ୍ରଜକିଶୋର ପ୍ରଧାନ ଓ ସାଂସଦ ପ୍ରାର୍ଥୀ ଡା. ଅବିନାଶ ସାମଲଙ୍କ ପାଇଁ ଭୋଟ୍ ମାଗିବେ । ସନ୍ଧ୍ୟାରେ ଅନୁଗୁଳ ସହରରେ ମଧ୍ୟ ରୋଡ୍ ସୋ’ କାର୍ଯ୍ୟକ୍ରମ ରହିଛି । ହୋଟେଲ୍ କମଲେଶଠାରୁ ଏହି ରୋଡ୍ ସୋ’ ଆରମ୍ଭ ହେବ । ନୂଆ ବସଷ୍ଟାଣ୍ଡ୍ ସାମ୍ନା ଦେଇ ରାଜ୍ ହୋଟେଲ୍ ଛକ, ସେଠାରୁ ଶିମିଳିପଡା, ଅମଲାପଡ଼ା, ବାଳିକା ହାଇସ୍କୁଲ ସାମ୍ନା ଦେଇ ପୁରୁଣା ବସଷ୍ଟାଣ୍ଡ୍ ରାଜା ଛକ ଠାରେ ପହଞ୍ଚିବେ । ସେଠାରୁ ବଜାର ଛକ ଦେଇ ହରିମହୁରୀ ଛକ, ହୁଲୁରିସିଂହା ଛକ ହେଇ ଗାନ୍ଧିମାର୍ଗରେ ହେମସୁରପଡା ଛକରେ ପହଞ୍ଚିବେ । ଡିଆଇସି ଛକ ଦେଇ ଜୁଭେନାଇଲ୍ ଛକ ଦେଇ ରାଜା ଛକ, ଥାନା ଛକ ଦେଇ ହୋଟେଲ୍ କମଲେଶରେ ପହଞ୍ଚିବେ । ହୋଟେଲ କମଲେଶ୍ରେ ରାତ୍ରି ରହଣି ପରେ ସକାଳେ ଶୈଳଶ୍ରୀକ୍ଷେତ୍ରରେ ପ୍ରଭୁ ଶ୍ରୀଜଗନ୍ନାଥ ଓ ମା’ ବୁଢ଼ୀ ଠାକୁରାଣୀ ମନ୍ଦିରରେ ଦର୍ଶନ ସାରି ପ୍ରତ୍ୟାବର୍ତ୍ତନ କରିବାର କାର୍ଯ୍ୟକ୍ରମ ରହିଥିବା ବିଜେଡି ସୂତ୍ରରୁ ସୂଚନା ମିଳିଛି । ପାଣ୍ଡିଆନ୍ ଓ ମୁଖ୍ୟମନ୍ତ୍ରୀଙ୍କ କାର୍ଯ୍ୟକ୍ରମକୁ ନେଇ ଦଳୀୟ ପ୍ରାର୍ଥୀଙ୍କଠାରୁ କର୍ମୀ ଯାଏଁ, ସମସ୍ତେ ଉତ୍ସାହିତ ଥିବା ବେଳେ ଦୁଇ ହେଭିୱେଟ୍ର ଆଗମନ ଦଳ ପାଇଁ ଭୋଟ୍ ଭିଡ଼ିବାରେ ସହାୟକ ହେବ ବୋଲି କୁହାଯାଉଛି ।