ଚଣ୍ଡିଗଡ଼, ୨୩/୦୩: ପଞ୍ଜାବର ସଙ୍ଗରୁରରେ ବିଷାକ୍ତ ମଦ ପିଇ ମୃତ୍ୟୁବରଣ କରିବା ସଂଖ୍ୟା ବଢ଼ିବାରେ ଲାଗିଛି । ଏବେ ସୁଦ୍ଧା ବିଷାକ୍ତ ମଦ ପିଇ ୨୧ ଜଣଙ୍କ ମୃତ୍ୟୁ ହେଲାଣି । ଶନିବାର ଆଉ ୫ ଜଣ ଆଖି ବୁଜିଛନ୍ତି । ଯେତେବେଳେ କି ଶୁକ୍ରବାର ଆଖି ବୁଜିଥିଲେ ୮ ଜଣ । 

ସଙ୍ଗରୁରରେ ଡାକ୍ତର କୃପାଳ ସିଂଙ୍କ ଅନୁସାରେ, ହସ୍ପିଟାଲରେ ପ୍ରାୟ ୪୦ ଜଣ ଭର୍ତ୍ତି ହୋଇଥିଲେ । ଯେଉଁଥିରୁ ପ୍ରାୟ ୨୧ ଜଣ ଆଖି ବୁଜି ଦେଇଛନ୍ତି । ପଟିଆଲାର ରାଜେନ୍ଦ୍ର ହସ୍ପିଟାଲରେ ମଧ୍ୟ ଆଉ ୧୦ ଜଣ ଭର୍ତ୍ତି ହୋଇଛନ୍ତି । ମାମଲାରେ ପୋଲିସ ଏବେ ସୁଦ୍ଧା ପ୍ରାୟ ୮ ଜଣଙ୍କୁ ଗିରଫ କରିଛି ।

ଗିରଫ ଅଭିଯୁକ୍ତଙ୍କ ଅନୁସାରେ, ଏହି ବିଷାକ୍ତ ମଦ ଘରେ ପ୍ରସ୍ତୁତ ହେଉଥିଲା । ମଦ ତିଆରି ହେଉଥିବା ସ୍ଥାନରୁ ପୋଲିସ ୨୦୦ ଲିଟର ଏଥେନାଲ୍ ସହ ଖାଲି ବୋତଲ, ଷ୍ଟିକର ଏବଂ ପ୍ରିଣ୍ଟର ଜବତ କରିଛି । ଏସବୁ ସାମଗ୍ରୀ ମଦ ତିଆରି ଲାଗି ବ୍ୟବହାର କରା ଯାଉଥିଲା ।

ତେବେ ବିଷାକ୍ତ ମଦ ପିଇଥିବା ସମସ୍ତ ଲୋକ ଦଳିତ ପରିବାରର । ଜିଲ୍ଲା ଡେପୁଟି କମିଶନର ଜିତେନ୍ଦ୍ର ଜୋରୱାଲ୍ କହିଛନ୍ତି, ବିଷାକ୍ତ ମଦ ମୃତ୍ୟୁ ମାମଲାର ତଦନ୍ତ ପାଇଁ ଏସଆଇଟି ଗଠନ କରାଯାଇଛି । ୭୨ ଘଣ୍ଟା ମଧ୍ୟରେ ଏସଆଇଟି ରିପୋର୍ଟ ଦେବ । ଅଭିଯୁକ୍ତଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ।