ନୂଆଦିଲ୍ଲୀ,୨୨/୦୮: ସେପ୍ଟେମ୍ବର ପହିଲାରୁ  ବେଆଇନ ଉତ୍ସରୁ ଆସୁଥିବା ମେସେଜ ଉପରେ ଲଗାମ ଲାଗିବ । ଯଦି କୌଣସି କମ୍ପାନିଗୁଡିକର ଲିଙ୍କ୍‌ ବୈଧ ଭାବେ ପଞ୍ଜୀକୃତ ହୋଇ ନ ଥିବ ତାକୁ  ସେୟାରିଂ କରିବେନି ଟେଲିକମ କମ୍ପାନି । ଏଭଳି ସନ୍ଦିଗ୍ଧ ଲିଙ୍କ୍‌ରୁ ଆସୁଥିବା ମେସେଜକୁ କମ୍ପାନିଗୁଡିକ ବ୍ୟାନ କରିବେ । ଭାରତୀୟ ଟେଲିକମ ନିୟାମକ  କର୍ତ୍ତୃପକ୍ଷ (ଟ୍ରାଇ) ଏ ନେଇ ଟେଲିକମ କମ୍ପାନି ଗୁଡିକୁ  କଡା ନିର୍ଦ୍ଦେଶ ଦେଇଛି । 

ବେଆଇନ ୟୁଆର୍‌ଏଲ, ଏପିକେଏସ୍‌,  ଓଟିଟି ଲିଙ୍କ ଏବଂ କଲ୍‌ ବ୍ୟାକ୍‌ ନମ୍ବର ଗୁଡିକ  ହ୍ୱାଇଟଲିଷ୍ଟ ବା ବୈଧ ହୋଇଥିବା ଆବଶ୍ୟକ । ଏକ  ପ୍ରେସବିବୃତ୍ତିରେ ଟ୍ରାଇ କହିଛି ଯେ, ସମସ୍ତ ଆକସେସ୍‌  ସେବା ଯୋଗାଣକାରୀ ହ୍ୱାଇଟ୍‌ଲିଷ୍ଟ ହୋଇ ନ ଥିବା  ୟୁଆର୍‌ଏଲ, ଏପିକେଏସ୍‌, ଓଟିଟି ଲିଙ୍କ ଏବଂ କଲ୍‌  ବ୍ୟାକ୍‌ ନମ୍ବର ଗୁଡିକ ସହ ଜଡିତ ମେସେଜ ପଠାଇ  ପାରିବେ ନାହିଁ ।  

ମେସେଜ ବ୍ୟବସ୍ଥାକୁ ସ୍ୱଚ୍ଛ ଏବଂ ନିରାପଦ କରିବା  ଦିଗରେ ଟ୍ରାଇ ଏଭଳି ବିଭିନ୍ନ କାର୍ଯ୍ୟକ୍ରମ ଗ୍ରହଣ  କରିଛି । ବେଆଇନ କାର୍ଯ୍ୟକଳାପକୁ ରୋକିବା ଏବଂ  ଗ୍ରାହକଙ୍କ ସ୍ୱାର୍ଥ ରକ୍ଷା ଦିଗରେ ଏଭଳି କାର୍ଯ୍ୟକ୍ରମ  ଗ୍ରହଣ କରାଯାଉଛି । ଏହି ଦିଗରେ ଉନ୍ନତ ମନିଟରିଂ  ଏବଂ ନିୟନ୍ତ୍ରଣ ପାଇଁ ଆକସେସ୍‌ ସେବା ଯୋଗାଣକାରୀ  ଟେଲି ମାର୍କେଟିଂ କଲ୍‌ ଗୁଡିକୁ ଆରମ୍ଭର ୧୪୦ ସଂଖ୍ୟା  ବଦଳରେ ଅନଲାଇନ ଡିଏଲ୍‌ଟି ପ୍ଲାଟଫର୍ମକୁ ସ୍ଥାନାନ୍ତର  କରିବେ । 

ସେହିଭଳି ବେଆଇନ କାର୍ଯ୍ୟକଳାପ ଲାଗି  ମେସେଜିଂ ସେବାର ଅପବ୍ୟବହାର ଉପରେ ରୋକ  ଲଗାଇବାକୁ ମଧ୍ୟ କଡାକଡି ଭାବେ ନିର୍ଦ୍ଦେଶ ଦେଇଛି  ଟ୍ରାଇ । ନଭେମ୍ବର ୧ ରୁ ମେସେଜ ପଠାଉଥିବା  ବ୍ୟକ୍ତି ଏବଂ ମେସେଜ ପାଉଥିବା ବ୍ୟକ୍ତିଙ୍କ ସୂଚନା  ମଧ୍ୟ ଜଣାପଡିବା ନେଇ ଅନୁମତି ଦେଇଛି ଟ୍ରାଇ ।  ସେହିଭଳି ଟେମ୍ପେ୍ଲଟ ଏଂ ପ୍ରମୋଶନାଲ କଣ୍ଟେଣ୍ଟର  ଖରାପ ବ୍ୟବହାର ରୋକିବା ଉପରେ କଡା ଆଭିମୁଖ୍ୟ  ଗ୍ରହଣ କରିଛି ଟ୍ରାଇ । 

ଏ କ୍ଷେତ୍ରରେ ଯଦି ଗୋଟିଏ ବର୍ଗରେ ପଞ୍ଜୀକୃତ  କରି ସେହି ସେବା ବଦଳରେ ଅନ୍ୟ ସେବା  ଯୋଗାଉଥାନ୍ତି ସେ କ୍ଷେତ୍ରରେ ବ୍ଲାକଲିଷ୍ଟ ହେବାର  ଢ଼େର ସମ୍ଭାବନା ରହିଛି । ଯଦି ବାରମ୍ବାର ନିୟମ  ଉଲ୍ଲଘଂନ କରୁଥିବା ନଜରକୁ ଆସିଲା ସେଣ୍ଡର ସର୍ଭିସ  ମାସେ ଯାଏ ବାତିଲ ରହିବ । ଗାଇଡଲାଇନ ମୁତାବକ  ଡିଏଲ୍‌ଟିରେ ହେଡର ଏବଂ କଣ୍ଟେଣ୍ଟ ଟେମ୍ପେ୍ଲଟ  ପଞ୍ଜୀକୃତ ହେବା ଆବଶ୍ୟକ । 

ସେହିଭଳି ସିଙ୍ଗଲ୍‌ କଣ୍ଟେଣ୍ଟ ଟେମ୍ପଲେଟ  ଏକାଧିକ ହେଡର ସହ ସଂଯୋଗ କରାଯାଇପାରିବ  ନାହିଁ । ମେସେଜ ପଠାଇଥିବା କୌଣସି ସଂସ୍ଥା ଏବଂ  ବ୍ୟକ୍ତି ବିଶେଷଙ୍କ ଦ୍ୱାରା ହେଡର ଏବଂ କଣ୍ଟେଣ୍ଟ  ଟେମ୍ପେ୍ଳଟ ବେଆଇନ ବ୍ୟବହାର ହେଉଥିବା ଟ୍ରାଇ  ନଜରକୁ ଆସିଲେ ଏହାକୁ ତ୍ୱରୀତ ଭିତ୍ତିରେ ବାତିଲ  କରାଯିବ ।  

କାର୍ଯ୍ୟାନୁଷ୍ଠାନ ପରେ ପୁଣି ଥରେ ସେବା ଆରମ୍ଭ  ହେବ କି ନାହିଁ ସେ ନେଇ ବିଚାର କରିବ ଟ୍ରାଇ ।  ଯଦି ଡେଲିଭରି କରୁଥିବା ଟେଲିମାର୍କେଟର ମାନେ  ବେଆଇନ କାର୍ଯ୍ୟକଳାପକୁ ରୋକିବାରେ ୨ ଦିନ  ମଧ୍ୟରେ କୌଣସି କାର୍ଯ୍ୟପନ୍ଥା ଗ୍ରହଣ କରୁ ନାହାନ୍ତି  ତାଙ୍କ ବିରୋଧରେ ମଧ୍ୟ କଡା କାର୍ଯ୍ୟାନୁଷ୍ଠାନ ହେବ ।