ଭୁବନେଶ୍ୱର,୧୮/୦୯: ବଲାଙ୍ଗିର ଜିଲ୍ଲା କଣ୍ଟାବାଞ୍ଜିରେ ହେବ ୱାଗନ୍ ମରାମତି(ମେଣ୍ଟେନାନ୍ସ୍) କାରଖାନା । ଏଠାରେ ୨ଶହ ୱାଗନ୍ର ମରାମତି ବା ପିରିୟଡିକାଲ୍ ଓଭରହଲ୍(ପିଓଏଚ୍) କରିବାକୁ ଯୋଜନା ଚାଲିଛି । ଏ ବାବଦରେ ୨୬୫ କୋଟି ଟଙ୍କା ଖର୍ଚ୍ଚ ହେବ ବୋଲି ଆକଳନ କରାଯାଇଛି । ଏ ନେଇ ରେଳ ବୋର୍ଡର ଅନୁମୋଦନ ପାଇଁ ଅପଲୋଡ୍ କରାଯାଇଛି । ବୋର୍ଡର ଆର୍ଥ ବିଭାଗ ନିକଟରେ ଫାଇଲ୍ ଥିବା ପୂର୍ବତଟ ରେଳପଥ ପକ୍ଷରୁ ସୂଚନା ଦିଆଯାଇଛି । ବଲାଙ୍ଗିର ସାଂସଦ ସଙ୍ଗୀତା କୁମାରୀ ସିଂହଦେଓଙ୍କ ପ୍ରଶ୍ନର ଉତ୍ତରରେ ପୂର୍ବତଟ ରେଳପଥର ଜୋନାଲ୍ ରେଳ ବ୍ୟବହାରକାରୀ ପରାମର୍ଶଦାତା କମିଟି (ଜେଡ୍ଆରୟୁସିସି) ବୈଠକରେ ସୂଚନା ଦିଆଯାଇଛି । ସେହିପରି ପାଟଣାଗଡ଼ ଦେଇ ବଲାଙ୍ଗିରରୁ ନୂଆପଡ଼ାକୁ ଏକ ନୂଆ ରେଳ ଲାଇନ୍ ଯିବାର ପ୍ରସ୍ତାବ ରହିଛି । ଯାହାର ଚୂଡାନ୍ତ ଲୋକେସନ୍ ସର୍ଭେ ଜାରି ରହିଛି । ବିସ୍ତୃତ ପ୍ରକଳ୍ପ ରିପୋର୍ଟ(ଡିପିଆର୍) ପ୍ରସ୍ତୁତି କରାଯାଉଛି । ଯାହା ଚଳିତ ମାସ ଶେଷ ସୁଦ୍ଧା ରେଳ ବୋର୍ଡ ନିକଟରେ ଦାଖଲ କରାଯିବ ବୋଲି କୁହାଯାଇଛି ।
ଅପରପକ୍ଷେ ସମ୍ବଲପୁରରୁ ଗୋପାଳପୁର ନୂଆ ରେଳ ପ୍ରକଳ୍ପ ଦାୟିତ୍ୱ ଓଡ଼ିଶା ରେଳ ଭିତ୍ତିଭୂମି ବିକାଶ ଲିମିଟେଡ୍(ଓରିଡିଏଲ୍) କୁ ଦିଆଯାଇଛି । ରେଳ ବୋର୍ଡ ଓରିଡିଏଲ୍କୁ ଏହି ଦାୟିତ୍ୱ ଦେଇଥିବା ବେଳେ ବୌଦ୍ଧ ଦେଇ ରେଢାଖୋଲରୁ ଗୋପାଳପୁର ଡିପିଆର୍ ପ୍ରସ୍ତୁତ ସରିଛି । ଯାହା ବୋର୍ଡ ନିକଟରେ ଓରିଡିଏଲ୍ ଦାଖଲ କରିଛି । ତେବେ ସୋନପୁର ଦେଇ ସମ୍ବଲପୁରରୁ ଗୋପାଳପୁର ଏହି ପ୍ରକଳ୍ପକୁ ନେବାକୁ ଏବେ ଦାବି ଆସୁଛି ।
ଏପରି କରାଗଲେ ଫିଲ୍ଡ ସର୍ଭେ ସହିତ ଡିପିଆର୍ ସଂଶୋଧନ ଆବଶ୍ୟକ । ତେଣୁ ସୋନପୁର ଦେଇ ସମ୍ବଲପୁରରୁ ଗୋପାଳପୁର ରେଳ ପ୍ରକଳ୍ପ ନେଇ ରେଳ ବୋର୍ଡ ନିଷ୍ପତ୍ତି ନେବ ବୋଲି ପୂର୍ବତଟ ରେଳପଥର ଅଧିକାରୀ ସୂଚନା ଦେଇଛନ୍ତି । ସମ୍ବଲପୁର-ପୁରୀ ଇଣ୍ଟରସିଟିକୁ ବଲାଙ୍ଗିର ପର୍ଯ୍ୟନ୍ତ ଚଳାଇବାକୁ ମଧ୍ୟ ଦାବି ଆସିଛି । ଯାହା ଦ୍ୱାରା ରାଜସ୍ୱ ବୃଦ୍ଧି ହେବ ବୋଲି କୁହାଯାଇଛି । ମାତ୍ର ଟ୍ରେନର ପ୍ରତିଦିନ ହେଉଥିବା ମରାମତି ବା ମେଣ୍ଟିନାନ୍ସର ବ୍ୟବସ୍ଥା ନାହିଁ । ତେଣୁ ଏବେ ସମ୍ବଲପୁର-ପୁରୀ ଇଣ୍ଟରସିଟିକୁ ବଲାଙ୍ଗିର ପର୍ଯ୍ୟନ୍ତ ଚଳାଇବା ସମ୍ଭବ ନୁହଁ ବୋଲି କୁହାଯାଇଛି ।
ଭୁବନେଶ୍ୱର-ବଲାଙ୍ଗିର ଇଣ୍ଟରସିଟିକୁ ଟିଟିଲାଗଡ଼ ଦେଇ ରାୟଗଡ଼ା ଚଳାଇବାକୁ ପ୍ରସ୍ତାବ ଦିଆଯାଇଛି । ଏହି ଟ୍ରେନ୍ ଦୈନିକ ଚାଲୁଛି । ତେବେ ଏହାକୁ ରାୟଗଡ଼ା ପର୍ଯ୍ୟନ୍ତ ସମ୍ପ୍ରସାରଣ କରିବାକୁ ବୋର୍ଡ ପାଖରେ ଦରଖାସ୍ତ ହୋଇଛି । ଅତିରିକ୍ତ ଗୋଟିଏ ର୍ୟାକ୍ ସହିତ ଏହାକୁ ଚଳାଇବା ପାଇଁ ପ୍ରସ୍ତାବ ଦିଆଯାଇଥିବା ବେଳେ ବୋର୍ଡର ସବୁଜ ସଙ୍କେତକୁ ଅପେକ୍ଷା କରାଯାଇଛି ।
