ଯାଜପୁର,୦୮/୦୯: ଭାରସାମ୍ୟ ହରାଇ ଟ୍ରକ୍‌କୁ ପଛପଟୁ ଧକ୍କା ଦେଲା ଆମ୍ବୁଲାନ୍ସ । ଏହି ଦୁର୍ଘଟଣାରେ ଆମ୍ବୁଲାନ୍ସ କର୍ମଚାରୀ ହେମନ୍ତ ଆଚାର୍ଯ୍ୟଙ୍କ ମୃତ୍ୟୁ ହୋଇଥିବାବେଳେ ଆମ୍ବୁଲାନ୍ସ ଡ୍ରାଇଭର ଗୋବର୍ଦ୍ଧନ ଜେନା ଓ ଫାର୍ମାସିଷ୍ଟ ଗିରିଜା ସେଠୀ ଗୁରୁତର ହୋଇଛନ୍ତି । ୧୬ ନମ୍ୱର ଜାତୀୟ ରାଜପଥ ରଥିଆ ପେଟ୍ରୋଲ ପମ୍ପ ନିକଟରେ ଏହି ଦୁର୍ଘଟଣା ଘଟିଛି । 

ସୂଚନା ମୁତାବକ, ୧୦୮ ଆମ୍ବୁଲାନ୍ସଟି କଟକ ସ୍ଥିତ ଶିଶୁ ଭବନରେ ରୋଗୀଙ୍କୁ ଛାଡ଼ି ରବିବାର ସକାଳୁ କେନ୍ଦୁଝର ଫେରୁଥିଲା । ଏହି ସମୟରେ କେନ୍ଦୁଝର ଫେରୁଥିବା ରାସ୍ତାରେ ରଥିଆ ଛକ ନିକଟସ୍ଥ ପେଟ୍ରୋଲ ପମ୍ପ ପାଖାପାଖି ଭାରସାମ୍ୟ ହରାଇ ଆମ୍ୱୁଲାନ୍ସଟି ଟ୍ରକ୍‌କୁ ପଛ ପଟୁ ଧକ୍କା ଦେଇଥିଲା । ଫଳରେ ଆମ୍ୱୁଲାନ୍ସରେ ଥିବା କର୍ମଚାରୀ ହେମନ୍ତ ଆଚାର୍ଯ୍ୟ ପ୍ରାଣ ହରାଇଛନ୍ତି ଏବଂ ଗାଡ଼ିର ଡ୍ରାଇଭର, ଫାର୍ମାସିଷ୍ଟ ଗୁରୁତର ହୋଇଛନ୍ତି । ଏହା ଦେଖି ସ୍ଥାନୀୟଲୋକେ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏଥି ସହିତ ଗାଡ଼ିର ଡ୍ରାଇଭର ଏବଂ ଫାର୍ମାସିଷ୍ଟଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଇଛି ପୋଲିସ । ଏହା ସହ ଘଟଣାର ତଦନ୍ତ ଆରମ୍ଭ କରିଛି ପୋଲିସ ।