ନୂଆଦିଲ୍ଲୀ: ସନାତନ ଧର୍ମ ଟିପ୍ପଣୀ ମାମଲାରେ ତାମିଲନାଡୁ ସରକାରଙ୍କ ମନ୍ତ୍ରୀ ତଥା ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନଙ୍କ ପୁଅ ଉଦୟନିଧି ଷ୍ଟାଲିନ ଏବେ ଅସୁବିଧାର ସମ୍ମୁଖୀନ ହୋଇଛନ୍ତି । ସୁପ୍ରିମକୋର୍ଟର ଓକିଲ ତଥା ସାମାଜିକ କର୍ମୀ ବିନୀତ ଜିନ୍ଦଲ ଉଦୟନିଧିଙ୍କ ବିରୋଧରେ ଦିଲ୍ଲୀ ପୋଲିସ ନିକଟରେ ଅଭିଯୋଗ କରିଛନ୍ତି ।

 ଦିଲ୍ଲୀ ପୋଲିସ ଉଦୟନିଧି ଷ୍ଟାଲିନଙ୍କ ବିରୋଧରେ ସନାତନ ଧର୍ମ ସମ୍ବନ୍ଧରେ ଉତ୍ତେଜନାମୂଳକ, ଉସକାଇବା ତଥା ଅପମାନଜନକ ବିବୃତ୍ତି ଦେବା ନେଇ ଭାରତୀୟ ଦଣ୍ଡ ସଂହିତା (ଆଇପିସି) ଏବଂ ଆଇଟି ଅଧିନିୟମର ଧାରା 120B, 153A, 295, 504 ଅନୁଯାୟୀ ମାମଲା ରୁଜୁ କରିଛି । 

 ଶନିବାର (ସେପ୍ଟେମ୍ବର ୨)) ଚେନ୍ନାଇରେ ଏକ ସମ୍ମିଳନୀକୁ ସମ୍ବୋଧିତ କରିବା ବେଳେ ଉଦୟନିଧି ସନାତନ ଧର୍ମକୁ ମଶା ଏବଂ ଡେଙ୍ଗୁ, ମ୍ୟାଲେରିଆ ଭଳି ରୋଗ ସହ ତୁଳନା କରିଥିଲେ । ସେ କହିଛନ୍ତି ଯେ, "କିଛି ଜିନିଷ ଅଛି ଯାହାକୁ ଆମେ ହଟାଇବାକୁ ପଡିବ ଏବଂ ଆମେ କେବଳ ପ୍ରତିରୋଧ କରିପାରିବୁ ନାହିଁ । ମଶା, ଡେଙ୍ଗୁ, କରୋନା ଏବଂ ମ୍ୟାଲେରିଆ ଏପରି ଜିନିଷ ଯାହାକୁ ଆମେ ପ୍ରତିରୋଧ କରିପାରିବୁ ନାହିଁ। ଆମକୁ ସେଗୁଡିକୁ ହଟାଇବାକୁ ପଡିବ । ସନାତନମ୍ (ସନାତନ ଧର୍ମ) ଏହା ମଧ୍ୟ ସମାନ । ଆମର ପ୍ରଥମ କାର୍ଯ୍ୟ ହେଉଛି ସନାତନଙ୍କୁ ବିରୋଧ କରିବା ନୁହେଁ, ବରଂ ଏହାକୁ ବିଲୋପ କରିବା । "

 ତେବେ ଉଦୟନିଧିଙ୍କ ବିବୃତ୍ତିରେ ବିଜେପି ଆକ୍ରୋଶିତ ହୋଇଛି। ବିଜେପି ଆଇଟି ସେଲ୍ ମୁଖ୍ୟ ଅମିତ ମାଲଭିୟ ‘ଏକ୍ସ’ ଉପରେ ଲେଖିଛନ୍ତି, "ଉଦୟାନିଧି ଷ୍ଟାଲିନ ସନାତନ ଧର୍ମକୁ ମ୍ୟାଲେରିଆ ଏବଂ ଡେଙ୍ଗୁ ସହିତ ଯୋଡିଛନ୍ତି । ସେ ବିଶ୍ୱାସ କରନ୍ତି ଯେ ଏହାକୁ କେବଳ ବିରୋଧ କରାଯିବା ଉଚିତ ନୁହେଁ ବରଂ ଏହାକୁ ବିଲୋପ କରାଯିବା ଉଚିତ। ଭାରତରେ ସନାତନ ଧର୍ମକୁ ୮୦ ପ୍ରତିଶତ ଲୋକ ଅନୁସରଣ କରନ୍ତି । ଏହାର ଅର୍ଥ ୮୦ ପ୍ରତିଶତ ଲୋକଙ୍କୁ ବିଲୋପ କରିବାକୁ ଉଦୟନିଧି କହିଛନ୍ତି ।