ନୂଆଦିଲ୍ଲୀ,୨୮/୦୯: ଜାତିସଂଘ ସୁରକ୍ଷା ପରିଷଦ (ୟୁଏନ୍ଏସ୍ସି)ରେ ଭାରତର ସ୍ଥାୟୀ ସଦସ୍ୟତା ଦାବିକୁ ବ୍ରିଟେନ ପ୍ରଧାନମନ୍ତ୍ରୀ କୈର ଷ୍ଟାର୍ମର ଦୃଢ଼ ସମର୍ଥନ କରିଛନ୍ତି ।
ଜାତିସଂଘର ୭୯ତମ ସାଧାରଣ ଅଧିବେଶନରେ ଗୁରୁବାର ସେ ୟୁଏନ୍ଏସ୍ସିରେ ଭାରତର ସ୍ଥାୟୀ ପ୍ରତିନିଧିତ୍ୱକୁ ସପୋର୍ଟ କରି କହିଛନ୍ତି, ପ୍ରତିନିଧିତ୍ୱର ପରିସର ବଢ଼ାଇବା ଲାଗି ୟୁଏନ୍ଏସ୍ସିରେ ପରିବର୍ତ୍ତନ ଆବଶ୍ୟକ । ପରିଷଦରେ ବ୍ରାଜିଲ, ଭାରତ, ଜାପାନ ଏବଂ ଜର୍ମାନୀଙ୍କୁ ସ୍ଥାୟୀ ସଦସ୍ୟ ଭାବେ ଦେଖିବାକୁ ଚାହୁଁ ବୋଲି ସେ କହିଥିଲେ । ଏହା ପୂର୍ବରୁ ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନ୍ ଏବଂ ଆମେରିକା ରାଷ୍ଟ୍ରପତି ଜୋ ବାଇଡେନ୍ ଭାରତର ସ୍ଥାୟୀ ସଦସ୍ୟତା ଦାବିକୁ ସମର୍ଥନ କରିଥିଲେ । ଏବେ ୟୁଏନ୍ଏସ୍ସିରେ ୫ ସ୍ଥାୟୀ ସଦସ୍ୟ ଏବଂ ୧୦ ଅସ୍ଥାୟୀ ସଦସ୍ୟ ଅଛନ୍ତି । ସ୍ଥାୟୀ ସଦସ୍ୟମାନେ ହେଲେ ରୁଷ୍, ବ୍ରିଟେନ, ଚୀନ୍, ଫ୍ରାନ୍ସ ଏବଂ ଆମେରିକା । ଅସ୍ଥାୟୀ ସଦସ୍ୟମାନେ ଜାତିସଂଘ ସାଧାରଣ ପରିଷଦ ଦ୍ୱାରା ୨ ବର୍ଷ କାର୍ଯ୍ୟକାଳ ପାଇଁ ମନୋନୀତ ହୋଇଥାନ୍ତି।
