ନୂଆଦିଲ୍ଲୀ: ଭାରତରେ ଖଲିସ୍ତାନୀ ସମର୍ଥକଙ୍କ କାର୍ଯ୍ୟକଳାପ ଉପରେ ବଢୁଥିବା ଚିନ୍ତାକୁ ନେଇ ବଡ ବୟାନ ଦେଇଛନ୍ତି ବ୍ରିଟେନ ପ୍ରଧାନମନ୍ତ୍ରୀ ଋଷି ସୁନକ । ଏନେଇ ସେ ଆଜି (ବୁଧବାର) କହିଛନ୍ତି ଯେ, ଖାଲିସ୍ତାନ ସମର୍ଥକଙ୍କ କଟ୍ଟରବାଦକୁ ମୁକାବିଲା କରିବା ପାଇଁ ବ୍ରିଟେନ ଭାରତ ସରକାରଙ୍କ ସହ ମିଶି ଘନିଷ୍ଠ ଭାବରେ କାର୍ଯ୍ୟ କରୁଛି ।

 ନ୍ୟୁଜ୍ ଏଜେନ୍ସି ପିଟିଆଇକୁ ଦେଇଥିବା ଏକ ସାକ୍ଷାତକାରରେ ଋଷି ସୁନାକ କହିଛନ୍ତି ଯେ, ବ୍ରିଟେନରେ କଟ୍ଟରବାଦର କୌଣସି ରୂପ ଗ୍ରହଣୀୟ ନୁହେଁ । ଏହି ସମୟରେ ସୁନକ କହିଛନ୍ତି ଯେ ୨୦୨୩ ଭାରତ ପାଇଁ ଏକ ବଡ ବର୍ଷ । ଭାରତ ଏଭଳି ଭାବରେ ବିଶ୍ୱସ୍ତରୀୟ ନେତୃତ୍ୱ ଦେଖାଇବା ଏକ ଆଶ୍ଚର୍ଯ୍ୟଜନକ । 

 ସେ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀଙ୍କ ସହ ମୋର ସାକ୍ଷାତରେ ମୁଁ ବୈଶ୍ବିକ ଆହ୍ବାନ ବିଷୟରେ ଏବଂ ସେଗୁଡିକ ସହ ମୁକାବିଲା କରିବାରେ ବ୍ରିଟେନ ଏବଂ ଭାରତର ପ୍ରମୁଖ ଭୂମିକା ବିଷୟରେ କହିବାର ସୁଯୋଗ ପାଇବି । ମୁଁ ପ୍ରଧାନମନ୍ତ୍ରୀ ହେବା ସମୟରେ ଭାରତୀୟ ଲୋକଙ୍କ ପ୍ରତିକ୍ରିୟା ଜବରଦସ୍ତ ଓ ନମ୍ର ଥିଲା । ଯାହା ବ୍ରିଟେନ-ଭାରତ ସମ୍ପର୍କକୁ ବାସ୍ତବରେ ସ୍ୱତନ୍ତ୍ର କରିଥାଏ । ଏହା ହେଉଛି ଆମ ଦୁଇ ଦେଶ ମଧ୍ୟରେ ଜୀବନ୍ତ ସେତୁ, ଯେଉଁଥିରେ ବ୍ରିଟେନରେ ୧୬ ଲକ୍ଷ ପ୍ରବାସୀ ଭାରତୀୟ ସାମିଲ ଅଛନ୍ତି । 

 ସୁନକ କହିଛନ୍ତି ଯେ ମତେ ମୋର ଭାରତୀୟ ମୂଳ ଏବଂ ଭାରତ ସହ ମୋର ସମ୍ପର୍କ ପାଇଁ ମୁଁ ଅତ୍ୟଧିକ ଗର୍ବିତ । ମୋ ପତ୍ନୀ ଭାରତୀୟ ଏବଂ ଜଣେ ଗୌରବାନ୍ବିତ ହିନ୍ଦୁ ଭାବରେ ମୋର ଭାରତ ଏବଂ ଏହାର ଲୋକଙ୍କ ସହ ସର୍ବଦା ସମ୍ପର୍କ ରହିବ । ମତେ ମୋର ଶାଶୁ-ଶ୍ବଶୂର ଏବଂ ସେମାନଙ୍କ ସଫଳତା ପାଇଁ ମୁଁ ବହୁତ ଗର୍ବିତ । ସେମାନେ ଶୂନରୁ ଦୁନିଆର ସବୁଠାରୁ ସମ୍ମାନଜନକ କମ୍ପାନୀ ମାନଙ୍କ ମଧ୍ୟରୁ ଗୋଟିଏ ଛିଡା କରିବା ପାଇଁ ଏକ ଦୀର୍ଘ ରାସ୍ତା ଅତିକ୍ରମ କରିଛନ୍ତି ।