ସୀତାପୁର,୧୧।୫: ଉତ୍ତରପ୍ରଦେଶର ସୀତାପୁରରେ ଘଟିଛି ଏକ ଲୋମଟାଙ୍କୁରା ହତ୍ୟା ମାମଲା। ଜଣେ ବ୍ୟକ୍ତି ପ୍ରଥମେ ନିଜ ପରିବାରର ପାଞ୍ଚ ଜଣଙ୍କୁ ହତ୍ୟା କରିବା ପରେ ନିଜେ ଗୁଳି କରି କରିଛି ଆତ୍ମହତ୍ୟା। ମଥୁରା ଥାନା ଅଧୀନ ପହ୍ଲାପୁର ଗାଁରେ ଏହି ସାଂଘାତିକ ଘଟଣା ଘଟିଛି। ଗାଁର ଅନୁରାଗ ସିଂହ (୪୫) ଗତ ରାତିରେ ନିଜ ହାତରେ ନିଜ ପରିବାରକୁ କରିଦେଇଛି ନିଶ୍ଚିହ୍ନ।
ଅଭିଯୁକ୍ତ ଅନୁରାଗ ପ୍ରଥମେ ସେ ନିଜ ମା’ ୬୨ ବର୍ଷୀୟା ସାବିତ୍ରୀ ଦେବୀଙ୍କୁ ଗୁଳି ମାରିଥିଲା। ଏହା ପରେ ପତ୍ନୀ ପ୍ରିୟଙ୍କା ସିଂହଙ୍କ ମୁଣ୍ଡକୁ ହାତୁଡ଼ିରେ ପିଟି କରିଥିଲା ହତ୍ୟା। ସେତିକିରେ ମନ ବୁଝିନଥିଲା ନିଶାସକ୍ତ ଅଭିଯୁକ୍ତର। ନିଜର ୩ ଛୁଆ ୧୨ ବର୍ଷୀୟା ଓ ୮ ବର୍ଷୀୟା ଝିଅ ଓ ୪ ବର୍ଷର ପୁଅକୁ ଛାତକୁ ନେଇ ତଳକୁ ଫୋପାଡ଼ି ଦେଇଥିଲା। ଫଳରେ ୩ ସନ୍ତାନଙ୍କର ମୃତ୍ୟୁ ହୋଇଛି। ପରିବାରର ୫ ଜଣଙ୍କୁ ଅତି ନିର୍ମମ ଭାବେ ହତ୍ୟା କରିବା ପରେ ଅଭିଯୁକ୍ତ ନିଜେ ଗୁଳି କରି ଆତ୍ମହତ୍ୟା କରିଥିଲା।
ପୋଲିସ ଘଟଣାସ୍ଥଳରେ ପହଁଞ୍ଚି ସମସ୍ତ ମୃତଦେହକୁ ଜବତ କରିବା ପରେ ପୋଷ୍ଟମର୍ଟମ ପାଇଁ ପଠାଇ ଦିଆଯାଇଛି। ହତ୍ୟା କାରଣ ନେଇ ମୃତକଙ୍କ ସମ୍ପର୍କୀୟ ଏବଂ ଆଖପାଖ ଲୋକଙ୍କୁ ପୋଲିସ ପଚରା ଉଚରା କରିଛି। ପ୍ରାଥମିକ ତଦନ୍ତ ପରେ ଜଣାପଡିଛି ଯେ, ଅଭିଯୁକ୍ତର ପରିବାର ନିଶାମୁକ୍ତି କେନ୍ଦ୍ରକୁ ତାକୁ ପଠାଇବାକୁ ଚାହୁଁଥିଲେ। ଏହି କାରଣରୁ ଅନୁରାଗର ପରିବାର ସହିତ ଝଗଡା ହୋଇଥିଲା। ଏହାପରେ ସେ ପରିବାରର ସବୁ ସଦସ୍ୟଙ୍କୁ ଗୋଟି ଗୋଟି କରି ମାରିଥିଲା।