ଭୁବନେଶ୍ୱର, ୧୮।୯: ସ୍କୁଲରେ ଏଣିକି ଆଉ କାଗଜ କଲମରେ ରହିବନି କୌଣସି ତଥ୍ୟ । ସବୁ ରହିବ ଅନ୍ଲାଇନରେ । ପିଲାଙ୍କ ଉପସ୍ଥାନଠୁ ନେଇ ଆର୍ଥିକ କାରବାର ସମ୍ପର୍କିତ ସବୁ ତଥ୍ୟ ସିଧା ଅନ୍ଲାଇନରେ ଅପଲୋଡ୍ ହେବ । ସ୍କୁଲରେ ଟାବ୍ ବ୍ୟବହାର କରାଯାଇ ସମସ୍ତ କାର୍ଯ୍ୟକ୍ରମର ତଥ୍ୟ ଡିଜିଟାଇଜ୍ କରାଯିବ । ସମଗ୍ର ଶିକ୍ଷା ଅଧୀନରେ ଏହାକୁ କାର୍ଯ୍ୟକାରୀ କରିବା ପାଇଁ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ଏଭଳି ପଦକ୍ଷେପ ନିଆଯାଇଛି । ଆସନ୍ତା ୨୧ ତାରିଖରେ ହେବାକୁ ଥିବା ଚତୁର୍ଥ ମାସିକ କ୍ଲଷ୍ଟରସ୍ତରୀୟ ବୈଠକରେ ଏ ସଂକ୍ରାନ୍ତରେ ବ୍ୟାପକ ଆଲୋଚନା କରାଯିବ । ଜ୍ଞାନ ଓ ଦକ୍ଷତା ବୃଦ୍ଧିରେ ଏହା ସହାୟକ ହେବ । ସୂଚନାଯୋଗ୍ୟ, ସମସ୍ତ ସ୍କୁଲକୁ ଟାବ୍ଲେଟ୍ ବଣ୍ଟନ କରାଯାଇଛି । ଶିକ୍ଷକଙ୍କୁ ପାଠ ପଢ଼ାଇବା ପାଇଁ ଟାବ୍ ବଣ୍ଟନ କରାଯାଇଥିବା ବେଳେ ସ୍କୁଲର ସମସ୍ତ ତଥ୍ୟ ଓ କାର୍ଯ୍ୟକ୍ରମକୁ ଏହା ମାଧ୍ୟମରେ ଷ୍ଟୋର କରିବାକୁ ମାର୍ଗଦର୍ଶିକା ଜାରି କରାଯାଇଥିଲା ।
ସେହି ଅନୁଯାୟୀ, ସ୍କୁଲ କର୍ତ୍ତୃପକ୍ଷଙ୍କୁ ତାଲିମ ଦିଆଯିବାକୁ ଗତ ଜୁନ୍ ମାସରେ କୁହାଯାଇଥିଲା । ଏବେ ଏହାକୁ ବ୍ଲକ ଶିକ୍ଷା ଅଧିକାରୀମାନେ କଡ଼ାକଡ଼ି ପାଳନ କରିବେ । ଟାବ୍ରେ ମୋବାଇଲ୍ ଡିଭାଇସ୍ ମ୍ୟାନେଜମେଣ୍ଟ (ଏମ୍ଡିଏମ୍) ଅପଲୋଡ୍ କରାଯିବ । କେବଳ ଆବଶ୍ୟକ ଆପ୍ ଇନ୍ଷ୍ଟଲ୍ ହେବ । ୟୁଡାଇସ୍ ପ୍ଲସ୍ ଅପଡେଟ୍ କରାଯିବ । ଫଳରେ ଡାଟା ଏଣ୍ଟ୍ରି ତଥା ପିଲାଙ୍କ ଉପସ୍ଥାନ, ଶିକ୍ଷକଙ୍କ ଉପସ୍ଥାନ, ଲାଇବ୍ରେରୀ ମଡ୍ୟୁଲ୍, ପରୀକ୍ଷା ମଡ୍ୟୁଲ୍ ଆଦି ଏଥିରେ ରହିବ । ଆର୍ଥିକ କାରବାରକୁ ଏହି ଟାବ୍ ମାଧ୍ୟମରେ ରେକର୍ଡ କରାଯିବ । ଟାବ୍ ବ୍ୟବହାର ନେଇ ଓସେପା ପକ୍ଷରୁ ଏକ ସ୍ୱତନ୍ତ୍ର ଗାଇଡ୍ଲାଇନ ଜାରି କରାଯାଇଛି । ଏପରିକି ସ୍କୁଲ ପ୍ରଧାନଶିକ୍ଷକ ଓ ସିଆର୍ସିସିଙ୍କୁ ଟାବ୍ ବ୍ୟବହାର ନେଇ ତାଲିମ ଦିଆଯିବ । ନିପୁଣ ଓଡ଼ିଶା କାର୍ଯ୍ୟକ୍ରମ ସଫଳ କରିବା ପାଇଁ ଏଫ୍ଏଲ୍ଏନ୍ ସଂପର୍କିତ ପାଠ୍ୟକ୍ରମ ଏଥିରେ ରହିବ । ସେହିପରି ଏଥିରେ ଶିକ୍ଷକମାନେ ଦୀକ୍ଷା, ନିଷ୍ଠା ଆଦି ତାଲିମ ନେଇପାରିବେ । ଟାବ୍ରେ ଦୀକ୍ଷା ଆପ୍, ମଧୁ ଆପ୍, ୟୁଟ୍ୟୁବ୍, ହ୍ୱାଟ୍ସ୍ଆପ୍, ଇ-ପାଠଶାଳା ପ୍ରଭୃତିରୁ ବିଷୟବସ୍ତୁ ନେଇ ଶିକ୍ଷାଦାନ କରିପାରିବେ । ମାତ୍ର ଇଣ୍ଟରନେଟ୍ ସମସ୍ୟା ଏବଂ ମନୋବଳର ଅଭାବ ଯୋଗୁ ଏହାକୁ ବ୍ୟବହାର କରାଯାଉ ନାହିଁ । ଟାବ୍କୁ ସ୍କୁଲ ଲକରରେ ରଖିଦେଉଛନ୍ତି । ତେଣୁ ସ୍କୁଲରେ ଏହି ଟାବ୍ ବ୍ୟବହାରକୁ ନିଶ୍ଟିତ କରିବା ଲାଗି ଅଣ୍ଟା ଭିଡ଼ିଛି ଗଣଶିକ୍ଷା ବିଭାଗ ।
