ଡେରାଡୁନ୍,୧୬/୧୧: ୯୦ ଘଣ୍ଟା ବିତିଗଲାଣି । ଉତ୍ତରକାଶୀ ସୁଡ଼ଙ୍ଗରେ ଏବେ ବି ଫସିଛନ୍ତି ୪୦ ଶ୍ରମିକ । ମାଟି ଅତଡ଼ା ଯେତେ ବାହାରୁଛି, ସେତେ ନୂଆ ମାଟି ଧସି ବାଟ ଓଗାଳୁଛି । ଫଳରେ ଆଜି ବି ସଫଳ ହୋଇପାରିନି ଉଦ୍ଧାର ଅଭିଯାନ । ଚତୁର୍ଥ ଦିନରେ ସାମିଲ ହୋଇଛି ସେନା । ଭାରୀ ଡ୍ରିଲିଙ୍ଗ୍ ମେସିନ୍ ସହ ଯବାନମାନେ ପହଞ୍ଚି ମିଶନରେ ଲାଗିଛନ୍ତି । ଗୁରୁବାର ରାତି ସୁଦ୍ଧା ଶ୍ରମିକମାନଙ୍କୁ ଉଦ୍ଧାର କରାଯିବା ନେଇ ଆଶା ଉଜ୍ଜୀବିତ ହୋଇଛି ।
କୁହାଯାଉଛି ଯେ ୫୦ ମିଟର ପର୍ଯ୍ୟନ୍ତ ସୁଡ଼ଙ୍ଗ ଧସିଛି । ଧସିଥିବା ମାଟି ଯୋଗୁ ବାଟ ବନ୍ଦ ହୋଇଯାଇଛି । ଏନ୍ଡିଆର୍ଏଫ୍, ଏସ୍ଡିଆର୍ଏଫ୍, ବିଆର୍ଓ, ସ୍ଥାନୀୟ ପ୍ରଶାସନ ଓ ପୁଲିସ ବଳ ଆଦିର ମୋଟ ୨୦୦ରୁ ଅଧିକ ଲୋକ ଟିମ୍ ବନାଇ ଉଦ୍ଧାର କାମରେ ଲାଗିଛନ୍ତି । ଶ୍ରମିକମାନେ ଯେଉଁଠାରେ ଫସିଛନ୍ତି, ତାହାର ଠିକ୍ ଆଗରେ ୫୦ ମିଟର ପର୍ଯ୍ୟନ୍ତ ଭଗ୍ନାବଶେଷ ଜମିରହିଛି । ଚିନ୍ତାର ବିଷୟ ହେଉଛି ସୁଡ଼ଙ୍ଗର ଉକ୍ତ ଅଂଶ ଅତ୍ୟନ୍ତ ଦୁର୍ବଳ । ଶ୍ରମିକଙ୍କୁ ଉଦ୍ଧାର ପାଇଁ ଯେତେ ମାଟି ବାହାର କରାଯାଉଛି, ସେତେ ମାଟି ଅତଡ଼ା ଧସି ପ୍ରତିବନ୍ଧକ ସୃଷ୍ଟି କରୁଛି ।
ଉଦ୍ଧାରକାରୀ ଟିମ୍ ମଙ୍ଗଳବାର ଷ୍ଟିଲ୍ ପାଇପ୍ ଦ୍ୱାରା ଉଦ୍ଧାର ପ୍ରକ୍ରିୟା ଆରମ୍ଭ କରିଥିଲେ । ଏଥିପାଇଁ ଅଗର୍ ଡ୍ରିଲିଙ୍ଗ୍ ମେସିନ୍ ଏବଂ ହାଇଡ୍ରଲିକ୍ ଜ୍ୟାକ୍ ସହାୟତାରେ ୩୫ ଇଞ୍ଚ୍ ମୋଟେଇର ଷ୍ଟିଲ୍ ପାଇପ୍ ସୁଡ଼ଙ୍ଗ ମଧ୍ୟରେ ପ୍ରବେଶ ଲାଗି ଚେଷ୍ଟା କରାଯାଇଥିଲା । କିନ୍ତୁ ଏହା ଫେଲ୍ ମାରିଥିଲା । ଏହାପରେ ଉଦ୍ଧାର କାର୍ଯ୍ୟ ତଦାରଖ କରୁଥିବା ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମ୍ଓ) ସେନାକୁ ଡକାଇଥିଲା । ଯବାନମାନେ ବୁଧବାର ମାଲବାହୀ ବିମାନ ହର୍କୁଲସ୍ ଯୋଗେ ଭାରୀ ଡ୍ରିଲିଙ୍ଗ୍ ମେସିନ୍ ସହ ପହଞ୍ଚିଛନ୍ତି । ଏଠାରୁ ମେସିନ୍କୁ ସିଲ୍କ୍ୟାରା ନିଆଯାଇ ଉଦ୍ଧାର ମିଶନରେ ନିୟୋଜିତ କରାଯାଇଛି ।
ଇଞ୍ଜିନିୟର୍ ତଥା ଡ୍ରିଲିଙ୍ଗ୍ ବିଶେଷଜ୍ଞ ଆଦେଶ ଜୈନ କହିଛନ୍ତି, ନଭେମ୍ବର ୧୪ ପର୍ଯ୍ୟନ୍ତ ସୁଡ଼ଙ୍ଗରେ ୬ ଥର ମାଟି ଅତଡ଼ା ଧସିସାରିଲାଣି । ଫଳରେ ଏହାର ସୀମା ୬୦ ମିଟର ପର୍ଯ୍ୟନ୍ତ ବଢ଼ିଯାଇଛି । ପୂର୍ବରୁ ଯେଉଁ ଡ୍ରିଲିଙ୍ଗ୍ ମେସିନ୍ ଥିଲା, ତାହା କେବଳ ୪୫ ମିଟର ପର୍ଯ୍ୟନ୍ତ କାର୍ଯ୍ୟ କରିପାରିବ । ତେଣୁ ବଡ଼ ମେସିନ୍ ଅଣାଯାଇଛି । ସୁଡ଼ଙ୍ଗରେ ଫସିଥିବା ଶ୍ରମିକମାନେ ଶତପ୍ରତିଶତ ସୁରକ୍ଷିତ ଅଞ୍ଚନ୍ତି ।ଗୁରୁବାର ସନ୍ଧ୍ୟା କିମ୍ବା ରାତି ସୁଦ୍ଧା ସମସ୍ତଙ୍କୁ ସୁରକ୍ଷିତ ଭାବେ ଉଦ୍ଧାର କରାଯିବା ନେଇ ଆଶା ।
ନରୱେ ଓ ଥାଇଲାଣ୍ଡ ବିଶେଷଜ୍ଞଙ୍କ ପରାମର୍ଶ ବି ନିଆଯାଉଛି । ଉତ୍ତରାଖଣ୍ଡ ଡିଜିପି ଅଶୋକ କୁମାର କହିଛନ୍ତି, ହେଭି ଡ୍ରିଲିଙ୍ଗ୍ ମେସିନ୍ ଚିନ୍ୟାଲିସୌଡ଼ ହେଲିପ୍ୟାଡରୁ ସିଲ୍କ୍ୟାରା ସୁଡ଼ଙ୍ଗରେ ପହଞ୍ଚି ସାରିଛି । ଏହାକୁ ସଂସ୍ଥାପନ ଲାଗି ବେସ୍ ପ୍ରସ୍ତୁତ କରାଯାଇଥିଲା । ଆସେମ୍ବଲ୍ ପରେ ଏହାକୁ କାର୍ଯ୍ୟରେ ନିୟୋଜିତ କରାଯାଇଛି । ଶୁଖିଲା ଖାଦ୍ୟ ଓ ଅକ୍ସିଜେନ୍ ମଧ୍ୟ ଅନ୍ୟ ଏକ ପାଇପ୍ ଯୋଗେ ପହଞ୍ଚୁଛି । ସେପଟେ ବୁଧବାର ସକାଳେ ସୁଡ଼ଙ୍ଗ ବାହାରେ କିଛି ଶ୍ରମିକ ଉଦ୍ଧାର କାର୍ଯ୍ୟକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି । ଏହି ସମୟରେ ପୁଲିସ ସହ ସେମାନଙ୍କର ଝଗଡ଼ା ହୋଇଛି । ଉଦ୍ଧାର କାର୍ଯ୍ୟ ବିଳମ୍ବ ହେବାକୁ ନେଇ ସେମାନେ ନିରାଶ ହୋଇଛନ୍ତି । ଏମିତିକି ସେମାନେ ସୁଡ଼ଙ୍ଗ ମଧ୍ୟରେ ପଶିବାକୁ ପ୍ରଶାସନକୁ ଅନୁମତି ମାଗିଛନ୍ତି । ସେମାନେ ସୁଡ଼ଙ୍ଗରୁ ବନ୍ଧୁମାନଙ୍କୁ ସୁରକ୍ଷିତ ଭାବେ ଉଦ୍ଧାର କରିବେ ବୋଲି କହିଛନ୍ତି । କିନ୍ତୁ ଅନୁମତି ଦିଆଯାଇ ନାହିଁ ।
ନଭେମ୍ବର ୧୨ରେ ଦେଶବାସୀ ଦୀପାବଳି ପର୍ବକୁ ନେଇ ଉତ୍ସାହିତ ଥିଲା ବେଳେ ଭୋର ୪ଟାରେ ଉତ୍ତରାଖଣ୍ଡର ଉତ୍ତରକାଶୀସ୍ଥିତ ବ୍ରହ୍ମଖାଲ-ଯମୁନୋତ୍ରୀ ଜାତୀୟ ରାଜପଥରେ ସିଲ୍କ୍ୟାରା ଓ ଡଣ୍ଡଲଗାଓଁ ମଧ୍ୟରେ ଥିବା ନିର୍ମାଣାଧୀନ ସୁଡ଼ଙ୍ଗଟି ଭୁଶୁଡ଼ି ପଡ଼ିଥିଲା । ଏହା ମଧ୍ୟରେ କାର୍ଯ୍ୟରତ ଝାଡ଼ଖଣ୍ଡର ୧୫, ଉତ୍ତର ପ୍ରଦେଶର ୮, ଓଡ଼ିଶାର ୫, ବିହାରର ୪, ପଶ୍ଚିମବଙ୍ଗର ୩, ଉତ୍ତରାଖଣ୍ଡର ୨, ଆସାମର ୨ ଓ ହିମାଚଳ ପ୍ରଦେଶର ଜଣେ ଶ୍ରମିକ ଫସିଯାଇଥିଲେ । ଅଘଟଣ ପରେ ସେମାନଙ୍କ ସହ ୱାକିଟକି ସହାୟତାରେ ଯୋଗାଯୋଗ କରାଯାଇଥିଲା । ବର୍ତ୍ତମାନ ସମସ୍ତେ ସୁରକ୍ଷିତ ଅଛନ୍ତି । ପାଇପ୍ ସହାୟତାରେ ଖାଦ୍ୟ, ପାଣି ଓ ଅକ୍ସିଜେନ୍ ପହଞ୍ଚାଯାଉଛି ।
