ନୂଆଦିଲ୍ଲୀ,୨୧/୮: କୋଲକାତା ମହିଳା ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ମାମଲା। ଏନେଇ ଆର୍ଜି କର ମେଡିକାଲ କଲେଜ ଓ ହସ୍ପିଟାଲ ପରିସରରେ ହୋଇଥିବା ଭଙ୍ଗାରୁଜା ଘଟଣାରେ ୩ ପୁଲିସକର୍ମୀ ନିଲମ୍ବିତ ହୋଇଛନ୍ତି। ଚାକିରିରେ ଅବହେଳା କରିବା ଅଭିଯୋଗରେ କୋଲକାତା ପୋଲିସ ଦୁଇ ଜଣ ଆସିଷ୍ଟାଣ୍ଟ କମିଶନର ଓ ଜଣେ ଇନ୍ସପେକ୍ଟରଙ୍କୁ ନିଲମ୍ବିତ କରିଛି।
ସୂଚନା ମୁତାବକ, ଅଗଷ୍ଟ ୯ ତାରିଖରେ ଡାକ୍ତରଖାନାରେ ଜଣେ ମହିଳା ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ହୋଇଥିଲା । ଏନେଇ ଅଗଷ୍ଟ ୧୪ ତାରିଖ ରାତିରେ ୪୦ରୁ ୫୦ ଦୁବୃର୍ତ୍ତ ହସ୍ପିଟାଲର ଏମରଜେନ୍ସି ଓ୍ୱାର୍ଡରେ ପଶି ଭଙ୍ଗାରୁଜା କରିଥିଲେ। ଏମାନେ ହତ୍ୟାକାଣ୍ଡର ପ୍ରମାଣ ନଷ୍ଟ କରିବାକୁ ଚେଷ୍ଟା କରିଥିବା ଅଭିଯୋଗ ହୋଇଛି। ଏହି ଘଟଣା ଘଟିବା ଦିନ ଏହି ତିନି ଜଣ ପୁଲିସ କର୍ମୀ ସେଠାରେ ଡ୍ୟୁଟିରେ ଥିଲେ। ତେବେ ପୁଲିସ ଉପସ୍ଥିତିରେ ଏଭଳି ଘଟିଥିବା ଯୋଗୁଁ ଡ୍ୟୁଟିରେ ଅବହେଳା କରିଥିବା ଅଭିଯୋଗରେ ଏହି ତିନି ଜଣଙ୍କୁ ନିଲମ୍ବିତ କରାଯାଇଛି। ଏସିପି ଶାକିର ଉଦ୍ଦିନ ସର୍ଦ୍ଦାର, ରମେଶ ଶାହା ଚୌଧୁରୀ ଏବଂ ଇନ୍ସପେକ୍ଟର ରାକେଶ ମିଞ୍ଜଙ୍କ ବିରୋଧରେ ବିଭାଗୀୟ ତଦନ୍ତ ମଧ୍ୟ ଆରମ୍ଭ କରାଯାଇଛି। ଅଗଷ୍ଟ ୧୫ ଭଙ୍ଗାରୁଜା ଘଟଣାରେ ପୁଲିସର ଭୂମିକାକୁ ନେଇ ସୁପ୍ରିମକୋର୍ଟ ଗୁରୁତର ପ୍ରଶ୍ନ ଉଠାଇବା ପରେ ଏହି ତିନି ଅଧିକାରୀଙ୍କୁ ନିଲମ୍ବିତ କରିବାକୁ ନଗର ପୁଲିସ କର୍ତ୍ତୃପକ୍ଷଙ୍କ ନିଷ୍ପତ୍ତି ନେଇଥିବା ସୂଚନା ମିଳିଛି।
