ନୂଆଦିଲ୍ଲୀ,୩୧/୦୫: ଦିଲ୍ଲୀର ତିସ୍ ହାଜାରି କୋର୍ଟ ସ୍ବାତି ମାଲିୱାଲ ମାମଲାର ଅଭିଯୁକ୍ତ ବିଭବ କୁମାରଙ୍କୁ ୧୪ ଦିନ ପାଇଁ ବିଚାର ବିଭାଗୀୟ ହାଜତକୁ ପଠାଇଛନ୍ତି। ଦିଲ୍ଲୀ ପୋଲିସ ସ୍ବାତି ମାଲିଓ୍ବାଲ ମାମଲାର ଅଭିଯୁକ୍ତ ବିଭବ କୁମାରଙ୍କୁ ମେ ୧୮ ତାରିଖରେ ଗିରଫ କରିଥିଲା। ବିଚାର ବିଭାଗୀୟ ହାଜତକୁ ପଠାଯିବା ପୂର୍ବରୁ ବିଭବ କୁମାର ଦିଲ୍ଲୀ ପୋଲିସର ହେପାଜତରେ ଥିଲେ। ଏହାପୂର୍ବରୁ ମେ ୨ ରେ କୋର୍ଟ ବିଭବ କୁମାରଙ୍କୁ ଆଉ ତିନି ଦିନ ପାଇଁ ପୋଲିସ ହେପାଜତକୁ ପଠାଇଥିଲେ।
ପୋଲିସ ୫ ଦିନ ରିମାଣ୍ଡ ମାଗିଥିଲେ, କିନ୍ତୁ କୋର୍ଟ ମାତ୍ର ତିନି ଦିନ ସମୟ ଦେଇଥିଲେ। ବିଭବ କୁମାରଙ୍କୁ ଦିଲ୍ଲୀ ହାଇକୋର୍ଟରୁ ମଧ୍ୟ ଆଶ୍ବସ୍ଥି ମିଳିନାହିଁ। ଶୁକ୍ରବାର ଦିନ ବିଭବ କୁମାରଙ୍କ ଦ୍ୱାରା ଦାଖଲ ହୋଇଥିବା ଆବେଦନର ଶୁଣାଣି କରିବାକୁ ମନା କରିଦେଇଥିଲେ କୋର୍ଟ। ହାଇକୋର୍ଟ ବିଭବ କୁମାରଙ୍କ ଆବେଦନକୁ ଏମ୍ପି-ଏମ୍ଏଲ୍ଏ କୋର୍ଟକୁ ପଠାଇଛନ୍ତି। ଯେଉଁଠାରେ, ଜଷ୍ଟିସ୍ ସ୍ବର୍ଣ୍ଣ କାନ୍ତ ଶର୍ମାଙ୍କ ଖଣ୍ଡପୀଠ ବିଭବ କୁମାରଙ୍କ ଆବେଦନର ଶୁଣାଣି କରିପାରନ୍ତି।
ଏହି ଆବେଦନରେ ବିଭବ କୁମାର ଗିରଫଦାରୀକୁ ଚ୍ୟାଲେଞ୍ଜ କରିଥିଲେ। ଏହି ଆବେଦନରେ ବିଭବଙ୍କ ପକ୍ଷରୁ ଯୁକ୍ତି ଦର୍ଶାଯାଇଥିଲା ଯେ ତାଙ୍କୁ ଜବରଦସ୍ତ ପୋଲିସ ହେପାଜତରେ ରଖାଯାଇଛି। ଗତ ଶୁଣାଣି ସମୟରେ ଦିଲ୍ଲୀ ପୋଲିସ ପକ୍ଷରୁ ହାଜର ହୋଇଥିବା ଓକିଲ ଅତୁଲ ଶ୍ରୀବାସ୍ତବ ଯୁକ୍ତି ଦର୍ଶାଇଥିଲେ ଯେ ସୁରକ୍ଷା ଦୃଷ୍ଟିରୁ ମୁଖ୍ୟମନ୍ତ୍ରୀଙ୍କ ବାସଭବନ ଅତ୍ୟନ୍ତ ସମ୍ବେଦନଶୀଳ ଏବଂ ଯଦି ସେଠାରେ କିଛି ଘଟିଲା, ତା’ହେଲେ ତାଙ୍କ ପକ୍ଷରୁ ୧୧୨ ନମ୍ବରରେ କଲ୍ କାହିଁକି କରାଗଲା ନାହିଁ? ଓକିଲ କହିଛନ୍ତି ଯେ ବିଭବଙ୍କୁ ଏହି ପଦବୀରୁ ହଟାଇବା ପରେ ମଧ୍ୟ ଲୋକମାନେ ତାଙ୍କୁ ଭେଟିବାକୁ କଲ୍ କରନ୍ତି, ତେଣୁ ସ୍ବାତୀ ମାଲିୱାଲ ମଧ୍ୟ ତାଙ୍କୁ କଲ୍ କରିଥିଲେ।
ପୋଲିସ କୋର୍ଟଙ୍କୁ କହିଛି ଯେ ଘଟଣା ଦିନ କେବଳ ସ୍ବାତୀ ମାଲିୱାଲ ୧୧୨ କୁ ଫୋନ କରିଥିଲେ, ତାଙ୍କ ବ୍ୟତୀତ ମୁଖ୍ୟମନ୍ତ୍ରୀଙ୍କ ବାସଭବନରୁ କେହି କୌଣସି କଲ କରିନାହାଁନ୍ତି। ସ୍ବାତୀ ମାଲିୱାଲ ବର୍ତ୍ତମାନ ସଂସଦର ସଦସ୍ୟ ଅଛନ୍ତି, ଦିଲ୍ଲୀ ମହିଳା ଆୟୋଗର ଅଧ୍ୟକ୍ଷ ଭାବେ ମଧ୍ୟ ସେ କାର୍ଯ୍ୟ କରିଛନ୍ତି, ଦଳର ମୁଖ୍ୟ ତାଙ୍କୁ ଲେଡି ସିଙ୍ଘମ୍ ବୋଲି କୁହନ୍ତି। ଦଳର ମୁଖିଆଙ୍କୁ ଭେଟିବା ପାଇଁ କ'ଣ ବିଭବଙ୍କ ଅନୁମତିର ଆବଶ୍ୟକତା ଥିଲା କି?'
You can also read: ଉଡ଼ାଣରେ ୨୦ ଘଣ୍ଟା ବିଳମ୍ବ; ଏୟାର ଇଣ୍ଡିଆ ଉପରେ ଆକ୍ସନ୍ ମୋଡ୍ରେ ମନ୍ତ୍ରାଳୟ, ଜାରି କଲେ ନୋଟିସ
