ନୂଆଦିଲ୍ଲୀ,୨୦/୦୪: ଭାଇସ୍ ଆଡମିରାଲ ଦିନେଶ ତ୍ରିପାଠୀ ଭାରତୀୟ ନୌସେନାର ନୂଆ ମୁଖ୍ୟ ନିଯୁକ୍ତ ହୋଇଛନ୍ତି । ଗୁରୁବାର ବିଳମ୍ବିତ ରାତିରେ କେନ୍ଦ୍ର ସରକାରଙ୍କ ପକ୍ଷରୁ ଏହି ଘୋଷଣା କରାଯାଇଛି । ଦିନେଶ ତ୍ରିପାଠୀ ଏବେ ନୌସେନା ମୁଖ୍ୟ ଆଡ୍ମିରାଲ ଆର୍. ହରିକୁମାରଙ୍କ ସ୍ଥାନ ନେବେ ।
ଆର୍. ହରିକୁମାର ଆସନ୍ତା ୩୦ ତାରିଖରେ ଅବସର ନେବାକୁ ଥିବାବେଳେ ଦିନେଶ ତ୍ରିପାଠୀ ସେହିଦିନ ଦାୟିତ୍ୱ ନେବେ । ଦିନେଶ ଏବେ ନୌସେନାର ଷ୍ଟାଫ୍ର ଉପପ୍ରମୁଖ ଅଛନ୍ତି । ଏହା ପୂର୍ବରୁ ସେ ପଶ୍ଚିମ ନୌସେନା କମାଣ୍ଡ୍ର ଫ୍ଲାଗ୍ ଅଫିସର କମାଣ୍ଡିଂ-ଇନ୍-ଚିଫ୍ ରହିଥିଲେ । ନିଜ ୩୯ ବର୍ଷର କ୍ୟାରିୟରରେ ସେ ଭାରତୀୟ ନୌସେନାର ଅନେକ ଗୁରୁତ୍ୱପୂର୍ଣ୍ଣ ଅଭିଯାନରେ କାମ କରିଛନ୍ତି ।
୧୯୮୫ ଜୁଲାଇ ୧ରେ ସେ ଭାରତୀୟ ନୌସେନାରେ ଭର୍ତ୍ତି ହୋଇଥିଲେ । ସେ କମ୍ୟୁନିକେଶନ ଏବଂ ଇଲେକ୍ଟ୍ରୋନିକ ୱାରଫେୟାର ସ୍ପେଶାଲିଷ୍ଟ । ନୌସେନାର ଆଗଧାଡ଼ିର ଯୁଦ୍ଧଜାହାଜରେ ସେ ସିଗ୍ନାଲ କମ୍ୟୁନିକେଶନ ଅଫିସର ଏବଂ ଇଲେକ୍ଟ୍ରୋନିକ୍ ୱାରଫେୟାର ଅଫିସର ଥିଲେ। ୨୦୧୯ ଜୁନ୍ରେ ଭାଇସ୍ ଆଡ୍ମିରାଲ ଭାବେ ତାଙ୍କର ପଦୋନ୍ନତି ହୋଇଥିଲା ।୨୦୨୦ ଜୁଲାଇରୁ ୨୦୨୧ ମେ ପର୍ଯ୍ୟନ୍ତ ସେ ନୌସେନା ପରିଚାଳନାର ମହାନିର୍ଦ୍ଦେଶକ ଥିଲେ । ୨୦୨୧ ଜୁନ୍ରୁ ୨୦୨୩ ଫେବ୍ରୁଆରୀ ପର୍ଯ୍ୟନ୍ତ ପର୍ସୋନେଲ୍ ହେଡ୍ ଥିଲେ। ୨୦୨୪ ଜାନୁଆରୀ ୪ରେ ତାଙ୍କୁ ନୌସେନା ଷ୍ଟାଫ୍ର ଉପପ୍ରମୁଖ ନିଯୁକ୍ତ କରାଯାଇଥିଲା।