ଭୁବନେଶ୍ୱର,୩୦/୦୩: ଅପେକ୍ଷା କରନ୍ତୁ । ଆଉ ଟିକେ ଧୈର୍ଯ୍ୟ ଧରନ୍ତୁ । ୨ଦିନରେ ଆସିବ ଓଡ଼ିଶାର ବାକି ବିଜେପି ପ୍ରାର୍ଥୀଙ୍କ ନାଁ । ଆମେ ଏଥର ଓଡ଼ିଶାରେ ସରକାର ଗଢିବୁ । ଭାରତୀୟ ଜନତା ପାର୍ଟିର ଡବଲ୍ ଇଞ୍ଜିନ୍ ସରକାର ହେବ ବୋଲି ଦିଲ୍ଲୀରୁ ଫେରିବା ପରେ କହିଛନ୍ତି ପ୍ରଭାରୀ ବିଜୟ ପାଲ ସିଂ ତୋମାର । ସେହିପରି ବିଜେପି ରାଜ୍ୟ ସଭାପତି ମନମୋହନ ସାମଲ ମଧ୍ୟ ବିଜେପି କୋର୍ କମିଟି ବୈଠକରେ ଯୋଗ ଦେଇ ଫେରିଛନ୍ତି ।
ସେ କହିଛନ୍ତି, କୋର କମିଟି ବୈଠକରେ ଯାହା ସବୁ ଆଲୋଚନା ହେବା କଥା ତାହା ହୋଇଛି । ଏବେ କେନ୍ଦ୍ରୀୟ ନିର୍ବାଚନ କମିଟି ଚୂଡାନ୍ତ ନିଷ୍ପତ୍ତି ହେବ । ଶୀଘ୍ର ୩ ଲୋକସଭା ସହ ବିଧାନସଭା ପ୍ରାର୍ଥୀ ତାଲିକା ବିଜେପି ଘୋଷଣା କରିବ ବୋଲି ଶ୍ରୀ ସାମଲ ସୂଚନା ଦେଇଛନ୍ତି । ସେହିପରି ମନମୋହନ ଦିଲ୍ଲୀରୁ ଫେରିବା ପରେ ଶନିବାର ବିଜେପି ରାଜ୍ୟ କାର୍ଯ୍ୟାଳୟରେ ଏକ ବଡ଼ ଧରଣର ମିଶ୍ରଣ ପର୍ବ ହେବ ବୋଲି ସୂଚନା ମିଳିଛି । ଏହି ମିଶ୍ରଣ ପର୍ବରେ ଏକାମ୍ରରୁ ଗତଥର ନିର୍ବାଚନ ଲଢିଥିବା କଂଗ୍ରେସ ନେତ୍ରୀ ରଶ୍ମି ମହାପାତ୍ରଙ୍କ ସମେତ ଅନ୍ୟ ଦଳର ନେତା ଓ ନେତ୍ରୀ ଯୋଗ ଦେବେ ବୋଲି ଜଣାପଡ଼ିଛି ।
