ଭଞ୍ଜନଗର, ୨୮/୦୩ : ଭଞ୍ଜନଗରରୁ ୧୯୯୫ ମସିହାରୁ ଅପରାଜେୟ ରହିଥିବା ବିକ୍ରମ କେଶରୀ ଆରୁଖଙ୍କୁ ବିଜେଡି ପୁଣି ଟିକଟ ଦେଇଛି । ସେପଟେ ସୋରଡାରେ ଏଥର ଟିକଟ ପାଇଛନ୍ତି ବର୍ତ୍ତମାନର ବିଧାୟକ ପୂର୍ଣ୍ଣଚନ୍ଦ୍ର ସ୍ୱାଇଁଙ୍କ ପତ୍ନୀ ସଂଘମିତ୍ରା ସ୍ୱାଇଁ । ବିଜେଡି ଏଠାରେ ମହିଳା କାର୍ଡ ଖେଳିଛି । ତେବେ ଆସିକା ବିଧାନସଭା କ୍ଷେତ୍ରକୁ ନେଇ ସସପେନ୍‌ସ ହଟିନି । ଦଳ ମଧ୍ୟରେ ଅନ୍ତଃକନ୍ଦଳ ତୀବ୍ର ଥିବାରୁ ଏହା ବିଳମ୍ବିତ ହୋଇଥିବା ଅନୁମାନ କରାଯାଉଛି । 

କବିସୂର୍ଯ୍ୟନଗରରୁ ଲତିକା ପ୍ରଧାନ ଓ ପୋଲସରାରୁ ଶ୍ରୀକାନ୍ତ ସାହୁଙ୍କ ଉପରେ ଦଳ ପୁଣି ଆସ୍ଥା ପ୍ରକଟ କରିଛି । ଆସିକା ସଂସଦୀୟ କ୍ଷେତ୍ରର ସୋରଡା, କବିସୂର୍ଯ୍ୟନଗର, ପୋଲସରା, ହିଞ୍ଜିଳିକାଟୁ ଆଦି ସ୍ଥାନରୁ ବିଜେଡି ପ୍ରାର୍ଥୀ ଘୋଷଣା କରିଥିବା ବେଳେ ପରବର୍ତ୍ତୀ ପର୍ଯ୍ୟାୟରେ ଆସିକା, ସାନଖେମୁଣ୍ଡି ଓ ଖଲ୍ଲିକୋଟ ଆଦି ଆସନ ନିମନ୍ତେ ପ୍ରାର୍ଥୀ ଘୋଷଣା କରିବ । ଭଞ୍ଜନଗରରେ ଅର୍ଥ ମନ୍ତ୍ରୀ ବିକ୍ରମଙ୍କ ନାମ ଘୋଷଣା ପରେ ଦଳୀୟ ନେତାମାନେ ପରସ୍ପରକୁ ମିଠା ଖୁଆଇ ଖୁସି ମନାଇଛନ୍ତି । ସେମାନେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ୫-ଟି ଅଧ୍ୟକ୍ଷ ଭି.କେ. ପାଣ୍ଡିଆଙ୍କୁ ସାଧୁବାଦ ଜଣାଇଛନ୍ତି । ଅନ୍ୟପକ୍ଷରେ ସୋରଡା ବିଧାନସଭା କ୍ଷେତ୍ରରେ ଲଗାତର ୩ ଥର ବିଜେଡି ପୂର୍ଣ୍ଣ ସ୍ୱାଇଁଙ୍କୁ ଦଳ ଟିକଟ ନଦେଇ ତାଙ୍କ ପତ୍ନୀଙ୍କୁ ପ୍ରାର୍ଥୀ କରିଛି । ବିଧାୟକ ପୂର୍ଣ୍ଣଚନ୍ଦ୍ର ବୋଧେ ଏମିତି କିଛି ଆଭାସ ପାଇଥିଲେ । ତେଣୁ ସେ ଗତ କିଛି ମାସ ଧରି ବିଭିନ୍ନ ସ୍ଥାନରେ କାର୍ଯ୍ୟକ୍ରମ ବେଳେ ପତ୍ନୀ ସଂଘମିତ୍ରାଙ୍କୁ ନେଇ ରୋଡ୍‌ ସୋ’ କରୁଥିବା ଦେଖିବାକୁ ମିଳିଥିଲା ।