ନୂଆଦିଲ୍ଲୀ,୦୯/୮:  ଭିନେଶ ଫୋଗଟଙ୍କୁ ମିଳିବ କି ନ୍ୟାୟ। ତାଙ୍କୁ ରୌପ୍ଯ ପଦକ ପ୍ରଦାନ କରାଯିବ କି ନାହିଁ ଏନେଇ ଆଜି କୋର୍ଟ ଅଫ୍ ଆର୍ବିଟ୍ରେସନ ଅଫ୍ ସ୍ପୋର୍ଟସରେ ହେବ ଶୁଣାଣି। ଅପରାହ୍ନ ସାଢ଼େ ଗୋଟାଏରେ ଏହି ଶୁଣାଣି ହେବ। ମାତ୍ର ଶହେ ଗ୍ରାମ ଅଧିକ ଓଜନ ପାଇଁ ସ୍ବର୍ଣ୍ଣ ପଦକ ମୁକାବିଲାରୁ ବାଦ୍ ପଡ଼ିଥିଲେ ଭିନେଶ। ଫାଇନାଲରେ ପହଞ୍ଚିଥିଲେ ମଧ୍ଯ ଲଢ଼ିପାରିନଥିଲେ। ଏହା ବିରୋଧରେ ସେ କୋର୍ଟ ଅଫ୍ ଆର୍ବିଟ୍ରେସନ ଅଫ୍ ସ୍ପୋର୍ଟସରେ ଅପିଲ କରିଛନ୍ତି। ନିଜ ଆବେଦନରେ ସେ ଦର୍ଶାଇଛନ୍ତି ଯେ, ଓଜନ ସମେତ ସବୁ ନିୟମ ଭିତରେ ରହି ସେ ଫାଇନାଲରେ ପହଞ୍ଚିଥିଲେ। ତେଣୁ ରୌପ୍ଯ ପଦକ ପାଇବାକୁ ସେ ଯୌଗ୍ୟ। ତାଙ୍କୁ ଯୁଗ୍ମ ଭାବେ ରୌପ୍ଯ ପଦକ ପ୍ରଦାନ କରାଯାଉ। ଏହା ଉପରେ ଆଜି ଅପରାହ୍ନ ୧ଟା ୩୦ରେ କୋର୍ଟ ଅଫ୍ ଆର୍ବିଟ୍ରେସନ ଅଫ୍ ସ୍ପୋର୍ଟ୍ସରେ ଶୁଣାଣି ହେବ।

ଭିନେଶଙ୍କ ପକ୍ଷରୁ ୩ ଜଣ ବଡ଼ ବଡ଼ ଓକିଲ ଲଢିବେ ବୋଲି ଜଣାପଡ଼ିଛି। ଭାରତର ବିଶିଷ୍ଟ ଓକିଲ ହରିଶ ସାଲଭେ ଏହି ଟିମର ନେତୃତ୍ଵ ନେବେ ବୋଲି ଜଣାପଡ଼ିଛି। ଯଦି ରାୟ ତାଙ୍କ ସପକ୍ଷରେ ଯାଏ, ତେବେ ଭିନେଶଙ୍କୁ ରୌପ୍ଯ ପଦକ ମିଳିବାର ସମ୍ଭାବନା ଅଛି। ଆଉ ଥରେ ଓଜନ କରାଇ ଫାଇନାଲ ଖେଳିବାକୁ ମଧ୍ଯ ସେ ଆବେଦନ କରିଥିଲେ। ଏହାକୁ କିନ୍ତୁ ଖାରଜ କରାଯାଇଛି। ଫାଇନାଲର ଠିକ୍ ପୂର୍ବରୁ ହୋଇଥିବା ଓଜନରେ ଭିନେଶ ଶହେ ଗ୍ରାମ ଅଧିକ ଥିବାରୁ ସେ ଫାଇନାଲ ମୁକାବିଲା ଲଢ଼ିପାରିନଥିଲେ। ହେଲେ ଫାଇନାଲ ଯାଇଥିବାରୁ ହାରିଥିଲେ ମଧ୍ଯ ଅତି କମରେ ଭିନେଶଙ୍କୁ ମିଳିଥାନ୍ତା ରୌପ୍ଯ ପଦକ। ଅଲିମ୍ପିକ୍ସ ଝଟକା ପରେ ଭିନେଶ ଅବସର ଘୋଷଣା କରିଛନ୍ତି।