ନୂଆଦିଲ୍ଲୀ: ବୁଧବାର ରାଜ୍ୟସଭାରେ କେରଳର ୱାୟାନାଡ ଭୂସ୍ଖଳନ ପ୍ରସଙ୍ଗରେ ଅମିତ ଶାହାଙ୍କ ବିବୃତ୍ତି ଉପରେ ଅଭିଯୋଗ ଉଠାଇଛି କଂଗ୍ରେସ । ଏନେଇ କଂଗ୍ରେସର ସାଧାରଣ ସମ୍ପାଦକ ଜୟରାମ ରମେଶ ଆଜି (ଶୁକ୍ରବାର) ରାଜ୍ୟସଭା ଅଧ୍ୟକ୍ଷ ଜଗଦୀପ ଧନଖଡଙ୍କୁ ଏକ ଚିଠି ଲେଖିଛନ୍ତି । ରାଜ୍ୟସଭାରେ ପ୍ରକ୍ରିୟା ତଥା କାର୍ଯ୍ୟ ସଂଚାଳନ ନିୟମ ୧୮୭ ଅନୁଯାୟୀ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ବିରୋଧରେ ବିଶେଷ ଅଧିକାର ଉଲ୍ଲଂଘନ କରିଥିବା ନେଇ ଅଭିଯୋଗ କରି କାର୍ଯ୍ୟାନୁଷ୍ଠାନ ଦାବି କରିଛନ୍ତି ।

ଜୟରାମ ରମେଶ ଚିଠିରେ ଲେଖିଛନ୍ତି ଯେ, ଜୁଲାଇ ୩୧ (ବୁଧବାର) ରେ କେରଳର ୱାୟାନାଡ ଭୂସ୍ଖଳନ ଘଟଣା ସମ୍ପର୍କରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ରାଜ୍ୟସଭାରେ ତାଙ୍କ ପକ୍ଷ ଉପସ୍ଥାପନ କରିଛନ୍ତି । ଏହି ସମୟ ମଧ୍ୟରେ ସେ ପ୍ରାରମ୍ଭିକ ଚେତାବନୀ ଉପରେ ଅନେକ ଦାବି କରିଥିଲେ । ୱାୟାନାଡ ଦୁଃଖଦ ଘଟଣା ପୂର୍ବରୁ କେରଳ ସରକାରଙ୍କୁ ଏହି ବିପର୍ଯ୍ୟୟ ବିଷୟରେ କେନ୍ଦ୍ର ସରକାର କିପରି ଚେତାବନୀ ଦେଇଛନ୍ତି ସେ କହିଥିଲେ । ଏଥିସହ ସେ ଦାବି କରିଥିଲେ ଯେ ସତର୍କ ସୂଚନା ଜାରି କରାଯିବା ପରେ ବି କେରଳ ସରକାର କୌଣସି ସତର୍କତା ଅବଲମ୍ବନ କରିନାହାଁନ୍ତି।

କଂଗ୍ରେସର ମୁଖ୍ୟ ସଚେତକ ଜୟରାମ ରମେଶ ଆହୁରି ମଧ୍ୟ ଚିଠିରେ ଲେଖିଛନ୍ତି ଯେ, ଗୃହମନ୍ତ୍ରୀ ଅମିତ ଶାହାଙ୍କ ଏହି ଦାବି ଉପରେ ଗଣମାଧ୍ୟମରେ ଫ୍ୟାକ୍ଟ ଚେକ୍ କରାଯାଇଛି। ଏହି ସମୟରେ ଆଜି (ଶୁକ୍ରବାର) ହିନ୍ଦୁରେ ପ୍ରକାଶିତ ଏକ ଫ୍ୟାକ୍ଟ ଚେକ୍ ରିପୋର୍ଟ ମଧ୍ୟ ଏଥିରେ ଅନ୍ତର୍ଭୁକ୍ତ ରହିଛି । ଜୟରାମ ଦାବି କରିଛନ୍ତି ଯେ ଏଭଳି ପରିସ୍ଥିତିରେ କେନ୍ଦ୍ର ସରକାର ଦେଇଥିବା ପୂର୍ବ ଚେତାବନୀ ଉପରେ ଗୃହମନ୍ତ୍ରୀ ଅମିତ ଶାହା ନିଜର ଦୃଢ ବିବୃତ୍ତି ସହ ବିଭ୍ରାନ୍ତ କରିଛନ୍ତି । ଆଉ ସେହି ଦାବି ଗୁଡିକ ସମ୍ପୂର୍ଣ୍ଣ ମିଥ୍ୟା ବୋଲି ଏବେ ପ୍ରମାଣିତ ହୋଇଛି । 

ଏହା ପରେ ରାଜ୍ୟସଭା ସାଂସଦ ଜୟରାମ ରମେଶ ଅଭିଯୋଗ କରିଛନ୍ତି ଯେ ଜଣେ ମନ୍ତ୍ରୀ କିମ୍ବା ସଦସ୍ୟଙ୍କ ଦ୍ୱାରା ଗୃହକୁ ବିଭ୍ରାନ୍ତ କରିବା ଗୃହର ଅଧିକାର ଏବଂ ଅବମାନନା ବୋଲି ବିବେଚନା କରାଯାଏ । ଏହି ପରିସ୍ଥିତିରେ ଆମେ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ବିରୋଧରେ ଅଧିକାର ଉଲ୍ଲଂଘନ ପାଇଁ ପ୍ରକ୍ରିୟା ଆରମ୍ଭ କରିବାକୁ ଦାବି କରୁଛୁ।