ଭୁବନେଶ୍ୱର,୦୬/୦୯: ଉତ୍ତର ଆନ୍ଧ୍ର ପ୍ରଦେଶରେ ସୃଷ୍ଟି ହୋଇଥିବା ଘୁର୍ଣ୍ଣିବଳୟ ଗୁରୁବାର ଲଘୁଚାପରେ ପରିଣତ ହୋଇଛି । ଗୁରୁବାର ଅପରାହ୍ନ ୪ଟାରେ ବିଶାଖାପାଟଣା  ସଂଲଗ୍ନ ଉତ୍ତର-ପଶ୍ଚିମ ବଙ୍ଗୋପସାଗରରେ ଏହା ସକ୍ରିୟ ରହିଛି । ପ୍ରଭାବରେ  ରାଜ୍ୟରେ ୭ରୁ ୯ ତାରିଖ ମଧ୍ୟରେ ଦକ୍ଷିଣ ଉପକୂଳ ଓ ଦକ୍ଷିଣ ଆଭ୍ୟନ୍ତରୀଣ  ଜିଲ୍ଲାରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ଏପରି ଆକଳନ କରିଛନ୍ତି ବରିଷ୍ଠ ପାଣିପାଗ ବିଶେଷଜ୍ଞ ସୁରେନ୍ଦ୍ର ନାଥ ପଶୁପାଳକ । 

ଶୁକ୍ରବାର ଠାରୁ ବର୍ଷା ଜାରି ରହିବ । ୭ ତାରିଖ ଗଣେଶ ପୂଜା ଦିନ ଉପକୂଳ  ଓଡିଶାରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ଘଡ଼ଘଡ଼ି ସହ ବର୍ଷା ନେଇ ୧୮  ଜିଲ୍ଲାକୁ ୟେଲୋ ଆଲର୍ଟ ଜାରି କରିଛି ପାଣିପାଗ କେନ୍ଦ୍ର । ସେଥିମଧ୍ୟରେ ରହିଛି ବାଲେଶ୍ୱର,  ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ, ଜଗତସିଂହପୁର, ପୁରୀ, ଖୋର୍ଦ୍ଧା, ନୟାଗଡ଼,  ଗଞ୍ଜାମ, ଗଜପତି, ରାୟଗଡ଼ା, କୋରାପୁଟ, ମାଲକାନଗିରି, ନବରଙ୍ଗପୁର, କଳାହାଣ୍ଡି,  ନୂଆପଡ଼ା ଓ ବଲାଙ୍ଗିର । ସେହିପରି ୯ ତାରିଖ ପର୍ଯ୍ୟନ୍ତ ବିଭିନ୍ନ ଜିଲ୍ଲାରେ ବଜ୍ରପାତ ନେଇ  ସତର୍କତା ଜାରି କରାଯାଇଛି । ଏହି ସବୁ ଜିଲ୍ଲାରେ ୭୦ ରୁ ୧୧୦ ମିଲିମିଟର ପର୍ଯ୍ୟନ୍ତ ବର୍ଷା  ହୋଇପାରେ । 

ଶୁକ୍ରବାର ଦକ୍ଷିଣ ଉପକୂଳରେ ପ୍ରବଳ ବର୍ଷା ସମ୍ଭାବନା ରହିଛି । ଏଥିପାଇଁ  ୧୨ଟି ଜିଲ୍ଲାକୁ ବଜ୍ରପାତ ବର୍ଷା ନେଇ ୟେଲୋ ଆଲର୍ଟ ଜାରି କରାଯାଇଛି । ଗୁରୁବାର ସକାଳ  ସମୟରେ ଟୁଇନ୍‌ ସିଟିରେ ପ୍ରବଳ ଖରା ଅନୁଭବ ହୋଇଥିଲେ ମଧ୍ୟ ଅପରାହ୍ନରେ  ଘଡ଼ଘଡ଼ି ବିଜୁଳି ସହ ବର୍ଷା ସାମାନ୍ୟ ଆଶ୍ୱସ୍ତି ଆଣିଛି । ଆସନ୍ତା ୯ ତାରିଖ ପର୍ଯ୍ୟନ୍ତ ବର୍ଷା  ହେଲେ ମଧ୍ୟ ଗରମ ଗୁଳୁଗୁଳି ଜାରି ରହିବ ବୋଲି ପାଣିପାଗ କେନ୍ଦ୍ର କହିଛି । 

ଶ୍ରୀ  ପଶୁପାଳକ ବର୍ଷାକୁ ଆଖି ଆଗରେ ରଖି କୃଷି ପରାମର୍ଶ ଜାରି କରିଛନ୍ତି । ସେ କହିଛନ୍ତି,  ଏହି ସମୟରେ ଅଳସୀ, ମୁଗ, ବିରି, ରାଶି ଆଦି ପ୍ରାକ- ରବି ଫସଲ ଲଗାନ୍ତୁ । ଧାନରେ  ଶୀର୍ଷ ସାର ପ୍ରୟୋଗ କରିବାକୁ ହେଲେ ପାଣି ବାନ୍ଧି ରଖିବାକୁ ପରାମର୍ଶ ଦେଇଛନ୍ତି ।