ଭୁବନେଶ୍ୱର,୨୦/୦୬: ଆସନ୍ତା ୨୭ ତାରିଖରେ ଉତ୍ତର ବଙ୍ଗୋପସାଗରରେ ଘୂର୍ଣ୍ଣିବଳୟ ସୃଷ୍ଟି ହେବ । ଏହା ପ୍ରଭାବରେ ରାଜ୍ୟରେ ପ୍ରବଳ ବର୍ଷା ହୋଇପାରେ । ଆସନ୍ତା ୨୪ ତାରିଖ ପରେ କିଛି ସ୍ଥାନରେ ଓ ୩୦ ସୁଦ୍ଧା ରାଜ୍ୟର ସବୁ ସ୍ଥାନରେ ମୌସୁମୀ ପ୍ରଭାବରେ ବର୍ଷା ହେବ । ବରିଷ୍ଠ ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକ ଏହି ପୂର୍ବାନୁମାନ କରିଛନ୍ତି ।
ତାଙ୍କ ଆକଳନ କହୁଛି, ୨୮ ତାରିଖ ଯାଏ ରାଜ୍ୟର ଅଧିକାଂଶ ସ୍ଥାନରେ ମେଘୁଆ ବା ଆଂଶିକ ମେଘୁଆ ପାଗ ରହିବ । ଅନେକ ସ୍ଥାନରେ ଘଡ଼ଘଡ଼ି ସହିତ ବର୍ଷା ହେବ । କିନ୍ତୁ ଗରମ ଓ ଗୁଳୁଗୁଳି ରହିବ । ୨୪ ଓ ୨୫ରୁ ଆଭ୍ୟନ୍ତରୀଣ ଓଡ଼ିଶାର ବିଭିନ୍ନ ସ୍ଥାନରେ ବର୍ଷା ବଢ଼ିବା ସହ ତାପମାତ୍ରା ୩୬ ଡିଗ୍ରୀ ତଳକୁ ଖସିବ । ୨୮ ତାରିଖ ଯାଏ ମାଲକାନଗିରି, ମୟୂରଭଞ୍ଜ, ସୁନ୍ଦରଗଡ଼ ଓ କୋରାପୁଟ ଜିଲ୍ଲାରେ ମୋଟ ୬୦ରୁ ୧୦୦ମିଲିମିଟର ବର୍ଷା ହେବ । ସେହିଭଳି ଉପକୂଳ ଓ ସଂଲଗ୍ନ ଜିଲ୍ଲାରେ ୧୦ ଦିନରେ ୪୦ରୁ ୫୦ ମିମି ବର୍ଷା ହୋଇପାରେ । ଅନେକ ସ୍ଥାନରେ ସ୍ୱାଭାବିକଠାରୁ କମ୍ ବର୍ଷା ହେବ । ଏବେ ନିଅଣ୍ଟିଆ ବର୍ଷା ପରିମାଣ ୪୮% ରହିଛି । ମାସ ଶେଷ ସୁଦ୍ଧା ରାଜ୍ୟରେ ୩୦%ରୁ ଅଧିକ ନିଅଣ୍ଟିଆ ବର୍ଷା ହେବ ବୋଲି ସେ କହିଛନ୍ତି ।
ବୁଧବାର ସୁଦ୍ଧା ରାଜ୍ୟର ଅଧିକାଂଶ ସ୍ଥାନର ମାଟି ୧୫ରୁ ୨୦% ଓଦା ରହିଛି । ଆସନ୍ତା ସପ୍ତାହ ଭିତରେ ଏହି ଓଦା ସ୍ଥିତି କମିବନି । ମୟୂରଭଞ୍ଜ, ମାଲକାନଗିରି, କୋରାପୁଟ, ସୁନ୍ଦରଗଡ଼ରେ ମାଟି ଅଧିକ ଓଦା ରହିବ । ବାଲେଶ୍ୱର, ଉପକୂଳ ଗଞ୍ଜାମ, ଗଜପତି, ରାୟଗଡ଼ା, କନ୍ଧମାଳ, ବୌଦ୍ଧରେ ବି ମାଟି ଓଦା ରହିବ । ଏଥିପାଇଁ ଖାଲ ଜମିରେ ଧାଡ଼ିରେ ଧାନ ବୁଣିବାକୁ ପ୍ରଫେସର ପଶୁପାଳକ ପରାମର୍ଶ ଦେଇଛନ୍ତି । ମଧ୍ୟମ କିସମ ଜମିରେ ମାଟି ଓଦାକୁ ଦେଖି ତଳି ପକାନ୍ତୁ । ୨୪ରୁ ୨୮ ତାରିଖ ଭିତରେ ବୁଣନ୍ତୁ । ଅଭ୍ୟନ୍ତର ଢିପ ଜମିରେ ମାଟି ଓଦା ନ ଥିଲେ ଜୁଲାଇ ପ୍ରଥମ ସପ୍ତାହକୁ ଅପେକ୍ଷା କରିବାକୁ ସେ ପରାମର୍ଶ ଦେଇଛନ୍ତି । ଏବେ ଅଣଧାନ ଫସଲ ଲଗାଇବାକୁ ମଧ୍ୟ ସେ ପରାମର୍ଶ ଦେଇଛନ୍ତି ।
ମାଲକାନଗିରିରେ ମୌସୁମୀ ସକ୍ରିୟ ହୋଇଛି ଏବଂ ପ୍ରବଳ ବର୍ଷା ହୋଇଛି । ଗତ ୨୪ ଘଣ୍ଟାରେ ୨୯.୪ମିମି ବର୍ଷା ହୋଇଛି । ଭୁବନେଶ୍ୱର, କଟକ, ଢେଙ୍କାନାଳ ଓ କେନ୍ଦ୍ରାପଡ଼ାରେ ମଧ୍ୟ ବର୍ଷା ହୋଇଛି । ଗୁରୁବାର ସୁଦ୍ଧା ଭୁବନେଶ୍ୱର ସମେତ ଉପକୂଳ ଓଡ଼ିଶାର ବିଭିନ୍ନ ସ୍ଥାନକୁ ମୌସୁମୀ ଅଗ୍ରସର ହୋଇପାରେ ବୋଲି ସୋଆ ଜଳବାୟୁ ଓ ପାଣିପାଗ କେନ୍ଦ୍ର ନିର୍ଦ୍ଦେଶକ ଡ. ଶରତ ସାହୁ କହିଛନ୍ତି ।୨୦ରୁ ୨୩ ତାରିଖ ଯାଏ ରାଜ୍ୟର ବିଭିନ୍ନ ସ୍ଥାନରେ ଘଡ଼ଘଡ଼ି ସହିତ ବର୍ଷା ହୋଇପାରେ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି ।
