ଭୁବନେଶ୍ୱର,୦୮/୦୯: ଲଘୁଚାପ ଧୀରେ ଧୀରେ  ଦୁର୍ବଳ ହୋଇଛି । ତେବେ ସକ୍ରିୟ ଘୂର୍ଣ୍ଣିବଳୟ ପ୍ରଭାବରେ ଗୁରୁବାର ରାଜ୍ୟର ବିଭିନ୍ନ ସ୍ଥାନରେ ବର୍ଷା ହୋଇଛି । ରାଜଧାନୀ  ଭୁବନେଶ୍ୱର ସମେତ ଢେଙ୍କାନାଳ, ବାରିପଦା, କଟକ ଭଳି  ସ୍ଥାନରେ ତୁହାକୁ ତୁହା ପ୍ରବଳ ବର୍ଷା ହୋଇଛି । 

ଶୁକ୍ରବାରଠାରୁ  ରାଜ୍ୟରେ ବର୍ଷା କମିଯିବ । ତେବେ ୧୨ ତାରିଖରେ ପୁଣି  ଘୂର୍ଣ୍ଣିବଳୟ ସୃଷ୍ଟି ହେବ । ଏହା ପ୍ରଭାବରେ ଆଭ୍ୟନ୍ତରୀଣ ଓଡ଼ିଶାର କିଛି ସ୍ଥାନରେ ପ୍ରବଳରୁ ଅତିପ୍ରବଳ ବର୍ଷା ହେବ  ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପୂର୍ବାନୁମାନ କରିଛି । ଘୂର୍ଣ୍ଣିବଳୟ ପ୍ରଭାବରେ ଗୁରୁବାର ଢେଙ୍କାନାଳରେ  ୪୬ମିମି ବର୍ଷା ହୋଇଛି । କଟକରେ ୨୮.୬, ବାରିପଦାରେ  ୨୬.୮, ଜଗତସିଂହପୁରରେ ୨୦.୪, ଜଗତସିଂହପୁରରେ  ୨୦.୪, ବଲାଙ୍ଗୀରରେ ୧୯ ବର୍ଷା ହୋଇଛି । ସେହିଭଳି ଗତ  ୨୪ ଘଣ୍ଟାରେ ନବରଙ୍ଗପୁରରେ ୯୫.୬, ପାରଳାଖେମୁଣ୍ଡିରେ  ୮୬.୨, କୋରାପୁଟରେ ୭୩, ମାଲକାନଗିରିରେ ୬୦.୬,  ହୀରାକୁଦରେ ୪୯.୬, ରାୟଗଡ଼ାରେ ୪୭.୨ ଓ ବାରିପଦାରେ ୩୧.୬ମିମି ବର୍ଷା ହୋଇଛି । 

୧୨ ତାରିଖରେ ହେବାକୁ ଥିବା ଘୂର୍ଣ୍ଣିବଳୟ  ଯୋଗୁ ଆଭ୍ୟନ୍ତରୀଣ ଓଡ଼ିଶାର ବିଭିନ୍ନ ସ୍ଥାନରେ ୭୦ରୁ  ୨୦୦ମିମି ପର୍ଯ୍ୟନ୍ତ ବର୍ଷା ହୋଇପାରେ ବୋଲି ପାଣିପାଗ  ବିଜ୍ଞାନ କେନ୍ଦ୍ର ଆକଳନ କରିଛି । ଆଇଏମ୍‌ଡି ସୂଚନା  ଅନୁସାରେ, ୧୨ ତାରିଖରେ ପୁଣି ଏକ ଘୂର୍ଣ୍ଣିବଳୟ ସୃଷ୍ଟି ହେବା ସହ ରାଜ୍ୟରେ ସ୍ୱାଭାବିକ ବର୍ଷା ହେବ ।