ଭୁବନେଶ୍ୱର, ୦୧/୦୯: ଆସନ୍ତା ୪ ତାରିଖରେ ପଶ୍ଚିମ କେନ୍ଦ୍ରୀୟ ବଙ୍ଗୋପସାଗରରେ ଆଉ ଏକ ଲଘୁଚାପ  ସୃଷ୍ଟି ହୋଇପାରେ । ଏହା ସମୁଦ୍ରରେ ୪ ଦିନ ରହି ବଳ ଜୁଟାଇବା ପରେ ଅବପାତରେ ପରିଣତ ହେବ । ଏହାର ପ୍ରଭାବରେ ୭ ଓ ୮ ତାରିଖ  ଦୁଇ ଦିନ ନୂଆପଡ଼ା, ନବରଙ୍ଗପୁର,  କଳାହାଣ୍ଡି, କୋରାପୁଟ, ରାୟଗଡ଼ା ଓ  ଗଜପତିର କିଛି ସ୍ଥାନରେ ପ୍ରବଳ ବର୍ଷା ହେବ । ବରିଷ୍ଠ ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକ  ଏହି ପୂର୍ବାନୁମାନ କରିଛନ୍ତି । 

ପଶ୍ଚିମ କେନ୍ଦ୍ରୀୟ ଓ ସଂଲଗ୍ନ  ଉତ୍ତର ଆନ୍ଧ୍ରପ୍ରଦେଶ, ଦକ୍ଷିଣ  ଓଡ଼ିଶାରେ ସୃଷ୍ଟି ହୋଇଥିବା ଅବପାତ  ଏବେ ଉତ୍ତର-ଉତ୍ତର ପଶ୍ଚିମ ଦିଗରେ ଗତି କରୁଛି। ଶନିବାର ମଧ୍ୟରାତ୍ରିରେ  ଏହା ବିଶାଖପାଟଣା ଓ ଗୋପାଳପୁର  ମଝିରେ ଅତିକ୍ରମ କରିବ । ଅବପାତ  ପ୍ରଭାବରେ ବିଜୟୱାଡ଼ା, ହାଇଦ୍ରାବାଦ  ଓ ସୋଲାପୁର ଅଞ୍ଚଳରେ ପ୍ରବଳ ବର୍ଷା  ହୋଇପାରେ ବୋଲି ଡ. ପଶୁପାଳକ କହିଛନ୍ତି । ଅବପାତ ପାଇଁ ରାଜ୍ୟରେ  ଆସନ୍ତା ତିନି ଦିନ ଯାଏ ଉପକୂଳ  ଓଡ଼ିଶା ସମେତ ଦକ୍ଷିଣ ଓଡ଼ିଶାରେ  ସ୍ୱଳ୍ପ ବର୍ଷା ହୋଇପାରେ । ଏ ସବୁ ସ୍ଥାନରେ ହାରାହାରି ୩୦ରୁ ୩୫ମିମି  ବର୍ଷା ହେବ ବୋଲି ସେ କହିଛନ୍ତି । ଆସନ୍ତା ସପ୍ତାହେ ଯାଏ ପଶ୍ଚିମ,  କେନ୍ଦ୍ରୀୟ ଓ ଉତ୍ତର ଓଡ଼ିଶାରେ ବିକ୍ଷିପ୍ତ  ବର୍ଷା ସମ୍ଭାବନା ଅଛି । ଉପକୂଳରେ  ୩୦ରୁ ୩୫ ମିମି ବର୍ଷା ହୋଇପାରେ ବୋଲି ଡ. ପଶୁପାଳକ କହିଛନ୍ତି । 

ପାଣିପାଗ ବିଭାଗର ଆକଳନ  କହୁଛି, ରବିବାର ମାଲକାନଗିରି,  କୋରାପୁଟ, ନବରଙ୍ଗପୁର, କଳାହାଣ୍ଡି  ପ୍ରବଳ ବର୍ଷା ହୋଇପାରେ । ଆଭ୍ୟନ୍ତରୀଣ ଓଡ଼ିଶା  ଓ ଉପକୂଳ ଓଡ଼ିଶାରେ ହାଲୁକା ବର୍ଷା  ସମ୍ଭାବନା ଅଛି । 

ଶନିବାର ଦାରିଙ୍ଗିବାଡ଼ିରେ  ୧୭ ମିମି, କୋରାପୁଟରେ ୧୪.୨,  ଢେଙ୍କାନାଳରେ ୧୧.୨ ଓ ୪ ନୟାଗଡ଼ରେ ୧୦ମିମି ବର୍ଷା ହୋଇଛି । ଏବେ ସଅଳ  କିସମ ଧାନ ଲିଙ୍ଗ ସଞ୍ଚାର ଅବସ୍ଥାକୁ ଆସିଛି । ଏଥିରେ  ଯବକ୍ଷାରଜାନ ଶୀର୍ଷ ସାର ପ୍ରୟୋଗ କରିବାକୁ ସେ  ପରାମର୍ଶ ଦେଇଛନ୍ତି । ଆଗକୁ ବର୍ଷା କମିପାରେ । ଏଥିପାଇଁ ଧାନ କ୍ଷେତରେ ପାଣି ବାନ୍ଧି ରଖିବାକୁ ଡ.  ପଶୁପାଳକ ପରାମର୍ଶ ଦେଇଛନ୍ତି ।