କଟକ,୧୪/୦୫: ନିର୍ବାଚନ ତାରିଖ ପାଖେଇ ଆସୁଥିବାରୁ ହେଭିୱେଟ୍ ନେତାଙ୍କ ଗସ୍ତ କଟକ ରାଜନୀତିକୁ ସରଗରମ କରିବାକୁ ଯାଉଛି । ମଙ୍ଗଳବାର ପାଣ୍ଡିଆନ୍ ମାରାଥନ ପ୍ରଚାର ପାଇଁ କଟକ ଆସୁଥିବାବେଳେ ପରଦିନ ଅର୍ଥାତ୍ ବୁଧବାର ୧୫ ତାରିଖ କେନ୍ଦ୍ର ଗୃହମନ୍ତ୍ରୀ ଅମିତ୍ ଶାହ କଟକରେ ରୋଡ୍ ସୋ’ କରୁଥିବା ଜଣାଯାଇଛି । ବିଶେଷ କରି ବିଜେଡିର ପ୍ରଚାର ଅଭିଯାନକୁ ଟକ୍କର ଦେବା ପାଇଁ ବିଜେପି ପକ୍ଷରୁ ବଡ଼ବଡ଼ କେନ୍ଦ୍ର ନେତା ଘନଘନ ଗସ୍ତ କରିବାର ସୂଚନା ମିଳୁଛି । ଅନ୍ୟପକ୍ଷରେ ଆସନ୍ତା ୨୦ ତାରିଖରେ ନରେନ୍ଦ୍ର ମୋଦୀ କଟକ ଆସିବାର କାର୍ଯ୍ୟକ୍ରମ ରହିଥିବା ବେଳେ ତା’ର ୫ ଦିନ ପୂର୍ବରୁ ଅମିତ ଶାହାଙ୍କ ଏହି ଗସ୍ତ ବିଜେପି ଶିବିରରେ ଉତ୍ସାହ ଭରିଦେଇଛି ।
ମିଳିଥିବା ସୂଚନା ଅନୁସାରେ, ବୁଧବାର କଟକ ଗସ୍ତରେ ଆସି ବାରବାଟୀ-କଟକ ବିଧାନସଭା ମଣ୍ଡଳୀର ଗୋପବନ୍ଧୁ ପାର୍କ ଛକରୁ ରୋଡ ସୋ ଆରମ୍ଭ କରିବେ । ବକ୍ସିବଜାର, ତିନିକୋଣିଆ ବଗିଚା, ଗୌରୀଶଙ୍କର ପାର୍କ, ବାଲୁବଜାର, ନୟାସଡ଼କ ହୋଇ ଚାନ୍ଦିନୀଚୌକ ଯିବେ। ସନ୍ଧ୍ୟା ୬ଟା ୧୫ରୁ ୭ଟା ୧୦ ପର୍ଯ୍ୟନ୍ତ ଏହି ରୋଡସୋ ଚାଲିବ । ଏ ନେଇ ସିଆର୍ପିଏଫ୍ର ଯବାନମାନେ ଆସି ଏହି ରୁଟ୍ ଦେଖି ସାରିଲେଣି । ଶୋଭାଯାତ୍ରା ପାଇଁ ଅନୁମତି ନିମନ୍ତେ ବିଜେପି ପକ୍ଷରୁ ମଙ୍ଗଳବାର ପୁଲିସ ନିକଟରେ ଆବେଦନ କରାଯିବ ବୋଲି ବରିଷ୍ଠ ବିଜେପି ନେତା ବିନୋଦ ଦାଶ ସୂଚନା ଦେଇଛନ୍ତି । ଅନ୍ୟପଟେ କାର୍ଯ୍ୟକ୍ରମକୁ ସଫଳ କରିବା ପାଇଁ ଏବେ କଟକ ବିଜେପିର ନେତୃବୃନ୍ଦ ଲାଗିପଡ଼ିଛନ୍ତି ।
ରାଜ୍ୟର ତୃତୀୟ ପର୍ଯ୍ୟାୟ ଭୋଟ୍ ପାଇଁ ଯେଉଁ ଅନୁସାରେ ଦିନ ପାଖେଇ ଆସୁଛି ସେଭଳି ପ୍ରଚାର ଜମିଜମି ଯାଉଛି । ଏହା ମଧ୍ୟରେ ବିଜେପି ପାଇଁ ପ୍ରଚାର କରିବାକୁ ରାଜସ୍ଥାନ ବିଜେପି ସଭାପତି ସିପି ଯୋଶୀ ଓ ବୈଦେଶିକ ବ୍ୟାପାର ମନ୍ତ୍ରୀ ଏସ୍ ଜୟଶଙ୍କର କଟକ ଆସିସାରିଛନ୍ତି । ବିଜେଡି ପକ୍ଷରୁ ୧୪ ମଙ୍ଗଳବାର ଭିକେ ପାଣ୍ଡିଆନ୍ କଟକ ଆସୁଥିବାବେଳେ ୧୯ ତାରିଖରେ ବିଜେଡିର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ କଟକ ଆସି ଏକ ବିଶାଳ ଜନସଭାକୁ ଉଦ୍ବୋଧନ ଦେବାର କାର୍ଯ୍ୟକ୍ରମ ରହିଛି ।
