ରାଉରକେଲା, ୨୯/୦୩ : ବିଜେଡି ଓ ବିଜେପି ସୁନ୍ଦରଗଡ଼ ସଂସଦୀୟ କ୍ଷେତ୍ର ପାଇଁ ପ୍ରାର୍ଥୀଙ୍କ ନାମ ଘୋଷଣା କରିଛନ୍ତି । କଂଗ୍ରେସ ପ୍ରାର୍ଥୀଙ୍କ ନାମ ଘୋଷଣା ବାକି ରହିଛି । ବିଜେପିରୁ ଜୁଏଲ ଓରାମ ମୁହାଁମୁହିଁ ହେବେ ବିଜେଡି ପ୍ରାର୍ଥୀ ହକି ତାରକା ଦିଲୀପ ତିର୍କୀଙ୍କ ସହ । ଦିଲୀପ ୨୦୧୪ରେ ପ୍ରଥମ ଥର ଲଢ଼ି ଅଳ୍ପ ଭୋଟ୍‌ରେ ଜୁଏଲଙ୍କଠାରୁ ହାରିଥିଲେ । ବିଜେପି ପ୍ରାର୍ଥୀ ଜୁଏଲ ଓରାମ ହିନ୍ଦୁ ହୋଇଥିବା ବେଳେ ଦିଲୀପ ତିର୍କୀ ଖ୍ରୀଷ୍ଟିୟାନ । ଜୁଏଲଙ୍କ ଜନ୍ମମାଟି ବଣେଇ ବିଧାନସଭା କ୍ଷେତ୍ର କେନ୍ଦୁଡିହ ହୋଇଥିବା ବେଳେ ଦିଲୀପ ତିର୍କୀଙ୍କ ଜନ୍ମ ତଳସରା ନିର୍ବାଚନ ମଣ୍ଡଳୀ ସଉନାମୁରାରେ । 

କଂଗ୍ରେସ ଟିକଟ୍‌ ଆବେଦକଙ୍କ ମଧ୍ୟରେ ଗତପାଳି ପ୍ରାର୍ଥୀ ତଥା ପ୍ରାକ୍ତନ ସାଂସଦ ହେମାନନ୍ଦ ବିଶ୍ୱାଳଙ୍କ ଝିଅ ଅମିତା ବିଶ୍ୱାଳ, ପ୍ରାକ୍ତନ ବୀରମିତ୍ରପୁର ବିଧାୟକ ରେମିସ କେର୍କେଟା ଓ ପ୍ରାକ୍ତନ ବଣେଇ ବିଧାୟକ ଜନାର୍ଦ୍ଦନ ଦେହୁରୀଙ୍କ ସମେତ ପ୍ରାକ୍ତନ ପ୍ରଶାସକ ମେଘନାଦ ନାଏକ, ଅନିମା ସୁକାନ୍ତି ମିଞ୍ଜ, ବାସିଲ ଏକ୍କା, ଦେବେନ୍ଦ୍ର ଭିତିରିଆ, ଡ.ସରିତା ଟିଗ୍‌ଗା, ସାରଙ୍ଗଧର ଓରାମ, ଶିବୁ ଓରାମ, ସୁବାସ ତିର୍କୀ,ସୁନୀଲ କୁମାର କିସାନ ଓ ସୁଶୀଲ କୁମାର କିଣ୍ଡୋ ରହିଛନ୍ତି । କଂଗ୍ରେସ ପ୍ରତ୍ୟାଶୀଙ୍କ ମଧ୍ୟରେ ଜିଲ୍ଲା କଂଗ୍ରେସ ସଭାପତି ଥିବା ଜନାର୍ଦ୍ଦନ ଦେହୁରୀ ଓ ପ୍ରାକ୍ତନ ପ୍ରଶାସନିକ ଅଧିକାରୀ ମେଘନାଦ ନାୟକଙ୍କ ନାମ ଅଧିକ ଚର୍ଚ୍ଚାରେ ରହିଛି । ଉଭୟେ ହିନ୍ଦୁ ଓ ଭୂୟାଁ ସମ୍ପ୍ରଦାୟର ।