ନୂଆଦିଲ୍ଲୀ,୨୬।୫: ଆମ୍ ଆଦମୀ ପାର୍ଟିର ରାଜ୍ୟସଭା ସାଂସଦ ସ୍ବାତୀ ମାଲିଓ୍ବାଲ ଦିଲ୍ଲୀର ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ପିଏ ବିଭବକୁମାରଙ୍କ ଉପରେ ତାଙ୍କୁ ମାରପିଟ୍ କରିଥିବା ଅଭିଯୋଗ କରିଛନ୍ତି। ଏହି ଘଟଣା ୧୩ ମଇର ବୋଲି କୁହାଯାଉଛି। ମୁଖ୍ୟମନ୍ତ୍ରୀଙ୍କ ବାସଭବନରେ ତାଙ୍କ ଉପରେ ଆକ୍ରମଣ ପରେ ସେ ସିଭିଲ ଲାଇନ୍ ଥାନାରେ ପହଁଞ୍ଚିଥିଲେ, କିନ୍ତୁ କୌଣସି ଲିଖିତ ଅଭିଯୋଗ ନକରି ସେଠାରୁ ସେ ଫେରି ଆସିଥିଲେ। ଏହାର କିଛି ଦିନ ପରେ ପୋଲିସ ତାଙ୍କ ଘରକୁ ଯିବାପରେ ସେ ପୋଲିସକୁ ଲିଖିତ ଅଭିଯୋଗ କରିଥିଲେ।
ଏହା ଭିତରେ ଏକ ବଡ ପ୍ରଶ୍ନ ସୃଷ୍ଟି ହୋଇଛି ଯେ, ସ୍ବାତୀ ୧୩ ମଇରେ ଲିଖିତ ଅଭିଯୋଗ ନଦେଇ କୁଆଡେ ଯାଇଥିଲେ। ଏବେ ସେ ନିଜେ ଏହାର ଜବାବ୍ ଦେଇଛନ୍ତି। ସେ କହିଛନ୍ତି, ଯେତେବେଳେ ସେ ଥାନାକୁ ଯାଇଥିଲେ, ତାଙ୍କୁ ଅନେକ ଗୁଡିଏ ଫୋନ୍ କଲ ଆସିଥିଲା। ଏହାଫଳରେ ସେ ଏତେ ଭୟଭୀତ ହୋଇଯାଇଥିଲେ ସେ ଦିନ ଫେରି ଆସିଥିଲେ।
ସେ ଏକ ମିଡିଆ ଚ୍ୟାନେଲକୁ ଦେଇଥିବା ଇଣ୍ଟରଭ୍ୟୁରେ କହିଛନ୍ତି, ଯେତେବେଳେ ମୁଁ ପୋଲିସ ଷ୍ଟେସନ୍ ଯାଇଥିଲି ମୋତେ ବହୁ ମିଡିଆ ଲୋକଙ୍କର କଲ୍ ଆସିଥିଳା। ଯେତେବେଳେ ମୋତେ ଏତେ ସବୁ ଗଣମାଧ୍ୟମ ପ୍ରତିନିଧିଙ୍କ କଲ୍ ଆସିଥିଲା, ମୁଁ ଭୟଭୀତ ହୋଇଥିଲେ। ମୋତେ ଲାଗୁଛି, ଯଦି ମୁଁ ଏବେ ଅଭିଯୋଗ କରିବି ତେବେ ବହୁତ ମିଡିଆକର୍ମୀ ଆସିଯିବେ। ମୁଁ ଏହାକୁ ନେଇ କୌଣସି ରାଜନୈତିକ ପ୍ରସଙ୍ଗ କରିନଥିଲି ଓ ଦ୍ବିତୀୟ କଥା ହେଉଛି ମୋତେ ଖୁବ୍ କଷ୍ଟ ବି ହେଉଥିଲା। ସେଥିପାଇଁ ମୁଁ ସେଠାରୁ ଉଠି ଘରକୁ ଚାଲି ଆସିଥିଲି।ଅନ୍ୟପକ୍ଷେ ବିଭବ କୁମାର ଏକ କୋର୍ଟରେ ଜାମିନ୍ ଆବେଦନ କରିଥିଲେ। କୋର୍ଟ ଏ ବିଷୟରେ ଦିଲ୍ଲୀ ପୋଲିସକୁ ଜବାବ୍ ମାଗିଛନ୍ତି।
