ଝାରସୁଗୁଡ଼ା,୨୫/୦୮: ଦାମ୍ପତ୍ୟ କଳହରୁ ହାତ ଉଠାଇ ଦେଲେ ସ୍ୱାମୀଙ୍କ ଉପରକୁ । ଭୁଲ୍ ଥିଲା କେବଳ ଏତିକି । ଏହାର ପରିଣାମ ଅତି ଭୟଙ୍କର ହୋଇଛି । ସମାଜରେ ପ୍ରଚଳିତ ପ୍ରଥାକୁ ନେଇ ନୃଶଂସ ହୋଇପଡ଼ିଲେ ଜାତିଭାଇ । ଭୁଲିଗଲେ ମାନବିକତା । ମହିଳାଙ୍କୁ ଲଣ୍ଡା କଲେ । ବାସନ୍ଦ ଭୟ ଦେଖାଇ ଖାସି ମାଂସ ଭୋଜି ଖାଇଲେ । ଝାରସୁଗୁଡ଼ା ଜିଲ୍ଲା ଲଇକେରା ଥାନା ଜାମମାଲ ପଞ୍ଚାୟତର ରାଉତବାହାଲ ଗ୍ରାମରୁ ଆସିଛି ଜାତିପ୍ରଥାର ଏଭଳି ହୃଦୟ ବିଦାରକ ଚିତ୍ର । ଅସହ୍ୟ ଶାରୀରିକ ଉତ୍ପୀଡ଼ନର ଶିକାର ହୋଇଥିବା ମା’ଙ୍କ ସମ୍ପର୍କରେ ଜାଣିବା ପରେ ତାମିଲ୍ନାଡୁରେ କାମ କରୁଥିବା ପୁଅ ଗାଁକୁ ଫେରି ଅଭିଯୁକ୍ତଙ୍କ ବିରୋଧରେ ସ୍ୱର ଉଠାଇଛନ୍ତି ।
ସମ୍ପୂର୍ଣ୍ଣ ଘଟଣା ଏହିପରି । ମହିଳା ଏବଂ ତାଙ୍କ ସ୍ୱାମୀଙ୍କ ମଧ୍ୟରେ କୌଣସି କାରଣରୁ ଝଗଡ଼ା ହୋଇଥିଲା । ସ୍ତ୍ରୀ କୁଆଡ଼େ ସ୍ୱାମୀଙ୍କ ଉପରକୁ ହାତ ଉଠାଇଥିଲେ । ଏହାକୁ ନେଇ ସ୍ୱାମୀ ଜାତି ସମାଜର ଦ୍ୱାରସ୍ଥ ହୋଇଥିଲେ । ଦାମ୍ପତ୍ୟ କହଳର ସମାଧାନ ପାଇଁ ଗତ ଅଗଷ୍ଟ ୯ରେ ଜାତିଭାଇଙ୍କୁ ନେଇ ଘରେ ସଭା ବସିଥିଲା । ସ୍ୱାମୀଙ୍କୁ ମାଡ଼ ମାରିବା ଅକ୍ଷମଣୀୟ ଅପରାଧ ଓ ଏଥିଲାଗି କଠୋର ଦଣ୍ଡବିଧାନ କରାଯିବ ବୋଲି ରୋକ୍ଠୋକ ଶୁଣାଇଥିଲେ ମୁରବୀ ଶ୍ରେଣୀର ଲୋକେ । ସମାଜର ପୁରୁଖା ଲୋକଙ୍କ ସମ୍ମୁଖରେ ଦଣ୍ଡ ନିଷ୍ପତ୍ତିକୁ ମୁଣ୍ଡପାତି ମାନିନେଇଥିଲେ ମହିଳା ।
ଏହାପରେ ଆରମ୍ଭ ହୋଇଥିଲା ନିର୍ଯାତନା । ଜାତିର ସ୍ଥାନୀୟ ମୁଖ୍ୟ ନବୀନ ପିଙ୍ଗ, ପବିତ୍ର ପିଙ୍ଗ, ଶତ୍ରୁଘ୍ନ କିଷାନଙ୍କ ସମ୍ମୁଖରେ ମହିଳାଙ୍କୁ ସୁଶାନ୍ତ ପିଙ୍ଗ ଲଣ୍ଡା କରିଥିଲେ । ସେତିକିରେ ସରି ନ ଥିଲା ଶାସ୍ତି । ଜାତିରୁ ବାସନ୍ଦ ନ ହେବା ଲାଗି ଖାସି ମାଂସ ସହ ଭୋଜିଭାତ ଆୟୋଜନ କରିବାକୁ କହିଥିଲେ । ଜାତି ସମାଜର ଚାପ ଆଗରେ ମହିଳା ଜଣକ ମୁହଁ ଖୋଲି ନ ପାରି ଖାସି ମାଂସ ଭୋଜି ବ୍ୟବସ୍ଥା କରିଥିଲେ । ଇତିମଧ୍ୟରେ ମା’ଙ୍କୁ ନିର୍ଯାତନା ଦିଆଯାଇଥିବା ସମ୍ପର୍କରେ ସାନ ଭଉଣୀଙ୍କଠାରୁ ଜାଣିବାକୁ ପାଇଥିଲେ ତାମିଲ୍ନାଡୁରେ ରହୁଥିବା ଭାଇ । ଗାଁକୁ ଫେରିଥିଲେ । ଅଭିଯୁକ୍ତଙ୍କୁ କଠୋର ଦଣ୍ଡବିଧାନ କରିବା ଦାବିରେ ପ୍ରଥମେ ସାହାସପୁର ଫାଣ୍ଡିରେ ଅଭିଯୋଗ କରିଥିଲେ । ଏହାପରେ ଶନିବାର ସନ୍ଧ୍ୟାରେ ଲଇକେରା ଥାନାରେ ପହଞ୍ଚି ବିଧିବଦ୍ଧ ଭାବେ ଏତଲା ଦେଇଛନ୍ତି । ଜଣେ ମହିଳାଙ୍କୁ ଲଣ୍ଡା କରି ତାଙ୍କର ସାମାଜିକ ପ୍ରତିଷ୍ଠାହାନି କରିବାର କ୍ଷମତା କିଏ ଦେଲା ବୋଲି ପୁଅ ପ୍ରଶ୍ନ କରିଛନ୍ତି । ଘଟଣାରେ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ନ ନିଆଗଲେ ସେ ଉଚ୍ଚ ଫୋରମ୍ରେ ନ୍ୟାୟ ଭିକ୍ଷା କରିବେ ବୋଲି କହିଛନ୍ତି । ଘଟଣାଟି ସମଗ୍ର ଅଞ୍ଚଳରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି । ଏ ସମ୍ପର୍କରେ ଏସ୍ଡିପିଓ ଉମାଶଙ୍କର ସିଂ କୁହନ୍ତି, ତଦନ୍ତ ପରେ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ।
