ନୂଆଦିଲ୍ଲୀ ୦୧/୦୬: ଶୈଶବରୁ ବୃଦ୍ଧାବସ୍ଥା ପର୍ଯ୍ୟନ୍ତ ଜୀବନବ୍ୟାପୀ ଆମେ କ୍ଷୀରକୁ ନିଜ ଜୀବନଶୈଳୀରେ ସାମିଲ କରିଥାଉ । ଖାସ୍କରି ଭାରତରେ କ୍ଷୀର ଆମ ଖାଦ୍ୟପେୟର ଏକ ଗୁରୁତ୍ୱପୂର୍ଣ୍ଣ ଉପାଦାନ । କ୍ଷୀରକୁ ବିଭିନ୍ନ ଉପାୟରେ ଆମେ ଖାଦ୍ୟପେୟରେ ସାମିଲ କରିଥାଉ । ଶାରୀରିକ ବିକାଶରେ କ୍ଷୀରକୁ ଖୁବ୍ ଗୁରୁତ୍ୱପୂର୍ଣ୍ଣ ବୋଲି ଖାଦ୍ୟ ବିଶେଷଜ୍ଞମାନେ କହିଛନ୍ତି । କ୍ଷୀରକୁ ଏକ ବିଶ୍ୱସ୍ତରୀୟ ଖାଦ୍ୟ ଭାବେ ମାନ୍ୟତା ପ୍ରଦାନ ଲାଗି ୨୦୦୧ ମସିହା, ଜୁନ୍ ୧ ତାରିଖରେ ଜାତିସଂଘର ଫୁଡ୍ ଆଣ୍ଡ ଏଗ୍ରିକଲ୍ଚରାଲ ଅର୍ଗାନାଇଜେସନ୍ ଦ୍ୱାରା ବିଶ୍ୱ ଦୁଗ୍ଧ ଦିବସ ପ୍ରତିଷ୍ଠା ହୋଇଥିଲା । ସେବେଠାରୁ ପ୍ରତି ବର୍ଷ ଏହି ଦିବସ ପାଳିତ ହେଉଛି ।
ଦୁଗ୍ଧ ଜାତୀୟ କ୍ଷେତ୍ର ସହ ସଂଶ୍ଳିଷ୍ଟ କାର୍ଯ୍ୟକଳାପ ପ୍ରତି ଧ୍ୟାନ ଆକର୍ଷଣ ଲାଗି ସୁଯୋଗ ପ୍ରଦାନ କରିବା ଏହି ଦିବସର ଉଦ୍ଦେଶ୍ୟ । ଲୋକଙ୍କ ଜୀବନରେ କ୍ଷୀରର ମୂଲ୍ୟ ସମ୍ପର୍କରେ ଜନ ସଚେତନତା ସୃଷ୍ଟି କରିବା ଏହି ଦିବସର ମୁଖ୍ୟ ଲକ୍ଷ୍ୟ । ଚଳିତ ବର୍ଷ ଏହି ଦିବସର ବିଷୟ ରହିଛି ‘ଦୁଗ୍ଧ ଏକ ଉପଲବ୍ଧ, ସୁଲଭ ଓ ପ୍ରଚୁର ପୁଷ୍ଟିକର ଖାଦ୍ୟ ଏବଂ ସମଗ୍ର ବିଶ୍ୱରେ ସନ୍ତୁଳିତ ଆହାରର ଏକ ଗୁରୁତ୍ୱପୂର୍ଣ୍ଣ ଅଂଶ ।’
