ଓଟାୱା,୦୨/୦୬: ବିଶ୍ୱର ଅନ୍ୟତମ ସବୁଠୁ ଦୁର୍ଦ୍ଦାନ୍ତ ସିରିଏଲ କିଲର ରବର୍ଟ ପିକ୍ଟନ (୭୪)କୁ ହତ୍ୟା କରାଯାଇଛି । ସେ କାନାଡ଼ା ଜେଲରେ ଆଜୀବନ ସଜା କାଟୁଥିଲା । ଜେଲ ପ୍ରଶାସନ ମୁତାବକ, ମେ ୧୯ରେ ରବର୍ଟ ପିକ୍ଟନ ଉପରେ ଘାତକ ଆକ୍ରମଣ ହୋଇଥିଲା । ଏହାପରେ ତାକୁ କ୍ୟୁବେକସ୍ଥିତ ଏକ ହସ୍ପିଟାଲରେ ଭର୍ତ୍ତି କରାଯାଇଥିଲା । ଶୁକ୍ରବାର ରାତିରେ ତା’ର ମୃତ୍ୟୁ ଘଟିଛି ।
ପିକ୍ଟନ ୯୦ ଦଶକରେ ୪୯ ମହିଳାଙ୍କୁ ନିର୍ମମ ଭାବେ ହତ୍ୟା କରିଥିଲା । ଏହି ମାମଲାରେ ତାକୁ ଗିରଫ କରାଯାଇଥିଲା । ତେବେ ସେ ମାତ୍ର ୬ ମହିଳାଙ୍କ ହତ୍ୟା ପାଇଁ ଦୋଷୀ ସାବ୍ୟସ୍ତ ହୋଇଥିଲା । ଅଭିଯୋଗ ରହିଥିଲା ଯେ ପିକ୍ଟନ ଯୌନକର୍ମୀଙ୍କୁ ହତ୍ୟା କରି ସେମାନଙ୍କର ବିଭିନ୍ନ ଅଙ୍ଗକୁ କାଟି ତା’ର ଫାର୍ମରେ ଘୁଷୁରିମାନଙ୍କୁ ଖାଇବାକୁ ଦେଉଥିଲା । ପିକ୍ଟନ କାନାଡାର ବ୍ରିଟିଶ କଲମ୍ବିଆସ୍ଥିତ ଭାଙ୍କୋଭର ଜେଲରେ ଆଜୀବନ କାରାଦଣ୍ଡ କାଟୁଥିଲା ।
ପୁଲିସ ମୁତାବକ ପିକ୍ଟନ୍ ଉପରେ ଆକ୍ରମଣ କରିଥିବା ଜଣେ ୫୧ ବର୍ଷୀୟ କଏଦୀକୁ ପୁଲିସ ହେପାଜତରେ ରଖାଯାଇଛି । ତେବେ ଆକ୍ରମଣକାରୀର ନାମକୁ ପୁଲିସ ଖୁଲାସା କରିନାହିଁ । କ’ଣ ପାଇଁ ସେ ଏଭଳି ଆକ୍ରମଣ କଲା, ତାହା ନେଇ ତଦନ୍ତ ଜାରି ରହିଛି । ପିକ୍ଟନ ଦ୍ୱାରା ବର୍ବରତାର ଶିକାର ହୋଇଥିବା ଜଣେ ପୀଡ଼ିତାଙ୍କ ଭଉଣୀ ସିନ୍ଥିଆ କାର୍ଡିନାଲ କୁହନ୍ତି, ଏହି ଖବର ଶୁଣି ମୁଁ ଅତ୍ୟନ୍ତ ଖୁସି । ଏବେ ମୁଁ ମୋ ଭଉଣୀର ମୃତ୍ୟୁ ଘଟଣାକୁ ଭୁଲି ଆଗକୁ ବଢ଼ିବା ପାଇଁ ଚେଷ୍ଟା କରିବି ।
ପିକ୍ଟନ ୨୦୦୭ରେ ନିଶା ସେବନ କରୁଥିବା ଯୁବତୀ ଓ ଯୌନକର୍ମୀଙ୍କୁ ହତ୍ୟା କରି ସେମାନଙ୍କ ମୃତଦେହକୁ ନିଜ ଘୁଷୁରିମାନଙ୍କୁ ଖାଇବାକୁ ଦେଉଥିଲା । ପୁଲିସ ଜେରା ବେଳେ ସେ ଅତିକମ୍ରେ ୫୦ ମହିଳାଙ୍କୁ ହତ୍ୟା ପାଇଁ ଲକ୍ଷ୍ୟ ରଖିଥିବା ସ୍ୱୀକାର କରିଥିଲା । ଯୌନକର୍ମୀ, ନିଶା ସେବନ କରୁଥିବା ଏବଂ ଘରୁ ପଳାଇ ଆସିଥିବା ମହିଳାଙ୍କୁ ସେ ଟାର୍ଗେଟ୍ ବନାଉଥିଲା । କିନ୍ତୁ ପୁଲିସ ତା ବାବଦରେ ଟେର୍ ପାଉ ନ ଥିଲା । ବ୍ୟାପକ ତଦନ୍ତ ପରେ ୨୦୦୨ରେ ତାକୁ ଗିରଫ କରାଯାଇଥିଲା । ପୁଲିସ ମୁତାବକ ପିକ୍ଟନ ପ୍ରଥମେ ଯୌନକର୍ମୀଙ୍କ ସହ ଶାରୀରିକ ସମ୍ପର୍କ ରଖୁଥିଲା ଏବଂ ପରେ ସେମାନଙ୍କୁ ବିଷ ଇଞ୍ଜେକ୍ସନ ଦେଇ ହତ୍ୟା କରୁଥିଲା । ୧୯୯୫ରେ ସେ ପ୍ରଥମ ହତ୍ୟା କରିଥିଲା । ୨୦୦୧ ପର୍ଯ୍ୟନ୍ତ ସେ ୪୯ ମହିଳାଙ୍କୁ ହତ୍ୟା କରିଥିଲା ।
